Heb 4 | TpjSC | STEP | Hãrã jairykyje, ĩmeterijare ñee me’ẽãva jaiche verã Tũpa putuuvaperã, mahẽ ã’ãmo pee pya mbijeta reta hipitymba verã.

Hebrews 4

1 Hãrã jairykyje, ĩmeterijare ñee me’ẽãva jaiche verã Tũpa putuuvaperã, mahẽ ã’ãmo pee pya mbijeta reta hipitymba verã. 2 Shara mbe’uha jyve ñande Ñee Kaviva, haire rãĩmi; tẽvã haire hendu vekua mba’ẽãshu reta, shara ñee hendu vekuare, jyrojakue ĩmerevare mi’ĩrũãshu japo vekuare. 3 Tẽvã ñande jarojava jaichepokui putu’uavape, Tũpa heiva rãĩmi: “Hãmeara shyposhyvape shiñee ameẽpe: Icheãpo retakui atuuvape”. Tẽvã añete Tũpa opa japo opaite japo verã, kova yvy jypyite japorã vekuaivi. 4 Shara ĩme’ẽ Mbyparahava heivape 7 ara ryheva: Tũpa putuu 7 arape opa mbai japo vekuaivi. 5 Hykuaĩ heijy Mbyparahava retape: Mape’ãĩteipo iche retakui aputuu ãĩvape. 6 Tẽvã ĩmeteri’ẽ ndeiteri iche verã hokava putu’uha verãpe, shara tynondeite Ñee kaviva mbe’uhashu vekuare ñee henduããrã icheã reta. 7 Hãrã Tũpa hykuaĩ ñonojy pente ara, haiva “ã’ẽ” heta ara hasa vekuape, he’ika ñande David rupii: “Hokava arape Tũpa ĩñee pyhendurã, avy pyndypya pymytanta”. 8 Josué meẽma hokava putuu ryheva arykairã, Tũpa ijetaveãmatẽhe verã ĩrũ arare. 9 Tẽvã ĩmeteri’ẽ ĩrũ pente putu’uavape haikaviva Tũpa ryhevare pevarã. 10 Shara hokava putu’uava Tũpa ña’ãpovape icheva, putuushi mbai japovaivi, Tũpa putuuva rãĩmi opa mbaivi. 11 Hãrã ñañehããpo jaiche hokava putu’uavape, mahẽ mbava oakui ñee hendumba’iare rãĩmi ikorã. 12 Tũpa ĩñee hai tykove hareka mbaikatu, kyse pukuva hãĩmbeveva hareka kype icheva ñandypyape hareka espiritupe, haipe ñonokaviva typya hareka typya potava, hareka hokava potakue haira haikavivare maĩrã porãmbare. 13 Hãrã mba’ety Tũpa japo vekua kañyshi verã; shara Tũpa opa kavipo hesha hareka mbava hỹnonderãpo opa ñambeukui jajapo vekuare.

Jesucristo hai pai juhuvishavasu

14 Jesús Tũpa tay, hai ñandy pai ruvishavasu ĩmejareva vate arapy ohojy vekua, hãrã jairoja katupohe. 15 Ñandy pai ruvishavasu katupo ñandyparekorã ñanymborykui ñanykangyñaĩrã, shara ñande rãĩmimba heta pyahã’ãha jyve; koñeĩ mbai porãmba japoã hai rãmeĩmba. 16 Hãrã jyrojakue ryheve ñaĩmbojahe Tũpa ñandyraihuva vapy’õpe, ñandypareko verã, hareka ñavãhẽshu verã pyakavi ñaikotẽverã.