Heb 5 | TpjSC | STEP | Opaite pai vasure hekahapyva kuimbaire mbyteivi, ñonoha kuaretare reheĩ mba’apo verã Tũpa hỹnonde hareka Tũpape me’ẽãva mbeu verã hareka mymba jukahava mbai porãmba kuareta japo vekua hejahareiishi verã.

Hebrews 5

1 Opaite pai vasure hekahapyva kuimbaire mbyteivi, ñonoha kuaretare reheĩ mba’apo verã Tũpa hỹnonde hareka Tũpape me’ẽãva mbeu verã hareka mymba jukahava mbai porãmba kuareta japo vekua hejahareiishi verã. 2 Pa‘irã’õ katu hãrõkuaashu pirĩmbijiche’iare hareka mbai porãmba japo’iare, shara hete kangy jyve yngavare rãĩmi, 3 hãrã hai rehe japoñoĩpo mymba jukahava ryheva ha’ei mbai porãmba japo vekua rehe, hareka jyve henta ĩrũ rehe. 4 Mba’ety ha’ei ñymbyvate’i verã hareka iñiñono verã pai vasurã, Tũpa hẽnovaĩ rãnga ñono, Aarón ikohea rãĩmi. 5 Kyrãĩ jyve Cristo õñemomba’eã ha’ei pai vasurã iñiñonorã, Tũpa rãnga ñono; hareka heimbashu: “Nde hai Shyray, ã’ẽ hai ndyrehe nde haiva Shyray” 6 Mbyparahava yngaipe heijy: Nde hai pai vasu opa ara pevarã, Melquisedec heko ryheva rãĩmiva. 7 Cristo ko yvy’ĩãrẽ kuareta rãĩmi ikorã, hỹnatu, hareka jaheo ryheve jurure’asyshu Tũpa, rekova mbaikatu mondojepeshi verã ñymano; hãme ñee hendurã Tũpa hendushu. 8 Ajemaĩ Cristo Tyraytẽvã, jyhasa’asy rupii kuaa marãra katu ñee hendu. 9 Hãrã ñymbyheko kavimarã opa ara pevarã ikoshi pyrỹmondojepe’ia, opaite ĩñee hendushuare pevarã. 10 Hãme rãnga Tũpa ñono Pai Ruvisha vasurã Melquisedec heko rãĩmiva.

Jaikuaa kavivepo Tũpa ryheva

11 Heta’ẽ jaihe verã kova, tẽvã hasy ñambeu kavi verã, shara javaipekuei pikuaaraviĩ verã. 12 Arykaimatẽ pypyrỹmboipi verã, katynga pota hykuaĩ mbe’uajype Tũpa ĩñeepe’õ javaimbatẽvã, jaishu ho’uava tantava peumatẽ verã, kambyĩ pota peupi. 13 Sanjay rãĩmi kambyĩ hou’iare, katuaã kuaaha mbaivara haikavi hareka porãmbava. 14 Tẽvã ho’uava tantava hai opama syryvare pevarã, maĩ kavivare, shara heshakavima mbaivara haikavi hareka porãã.