Heb 6 | TpjSC | STEP | Hãrã jaha tynonde opa jasyrypeve, jaheja jaraha Cristo ryheva tynondeite ñanymbo’eahe vekua. Avy hykuaĩ jaijyshu mbai javaiveãma ñandevape, jaishu ñaimbeujya ryheva hareka jaheja jajapova pyryrahava ñymanope, jyrojakue Tũpare,

Hebrews 6

1 Hãrã jaha tynonde opa jasyrypeve, jaheja jaraha Cristo ryheva tynondeite ñanymbo’eahe vekua. Avy hykuaĩ jaijyshu mbai javaiveãma ñandevape, jaishu ñaimbeujya ryheva hareka jaheja jajapova pyryrahava ñymanope, jyrojakue Tũpare, 2 ñanymbo’eaheva ñymyngaraiva ryheva, ñandepo ñañonova jyrojavare ĩãrẽ, manovare kuerajya, hareka ñimbivache opambava ryheva. 3 Kova hai jajapo verã, añete Tũpa hei ñonoma ñanderã. 4 Shara katuãã sapeamaheare hareka kuaamava Tũpa meẽreiiva, hareka me’ẽãshu vekuare Espiritu Santo, 5 hareka pya ohohe vekuare Tũpa ĩñee haikaviva hareka mbaikatukuere yvy’ĩãrẽ ou verã ryheva, 6 hykuaĩ oajyrã, katuveãmapo ñymbeujy retakui Tũpape, maĩny haire hykuaĩpo Tũpa Tay jukarã kurusure ñonojy retakui hareka ñymbyhorypohe kuaretare hỹnonde. 7 Kova kuareta reta rãnga hãĩ yvy. Cristo jyrojaheare hãĩ yvy heta haiviheva hareka ñotyãva õhe kavi ma‘ẽty’ia pevarã hareka Tũpa mãĩ kavihe. 8 Tẽvã poi jyrojavare hãĩ yvy kapi’ãti mimoñava; mba’erãveã, hareka Tũpa jahehe. Koñemahea hapyha. 9 Shyryvyre ahaihuva, kyrãte ijetahava, kuaaha kavi pee pimepeĩva tape haikavivevape, jaishu ñymondojepeva hapepe. 10 Shara Tũpa heko kaviva hai, sareãpohe pijapova hareka jyhaihukue pyheshakava jyrojavare pymbory retarã, ã’ẽpeve pijapoteripeĩva rãĩmi. 11 Ore potaha pyheshakañoĩ pyraha hokava kyrẽ’ỹkue ĩmepyreva opapeve, opaite ikopeve pyhãrõ peĩvape. 12 Avy piñymateỹ, kyrãtẽ verã peñehããpo piko jyrojavare hareka hãrõ kuaavare rãĩmi, shara haire hipitypo Tũpa ĩñee meẽ vekua.

Tũpa ĩñee meẽ vekua

13 Tũpa ĩñee Abraham meẽshurã, icheheimba ĩñee meẽ, shara mba’etymba vateve’ẽshiva ĩñee meẽshu verã. 14 Hai heimbashu Abraham: “Ãñete hetakavipo amaĩkavi ndyrehekui hareka jahepo ambyhetavekui ñymoña ndyhevivare”. 15 Abraham pyareheimba’i hãrõrerã, hãrã Tũpa hipitykashu hai heishua meẽshu verã. 16 Shara kuaretare ĩñee meẽrã, mbai vasuveshiare meẽ, hãrã ĩme’ẽ ĩñee meẽvarã, mba’etyma jai verã. 17 Hãrã Tũpa potañoĩ my’añete heshaka verã opaiteva hipity verã kova ĩñee meẽ vekua, yngavamba hekyjy verãpe. 18 Tũpa japuã hairã, mokue mbai katumbaa ỹngaijyva, heiva meẽ verã hareka hai ĩñee meẽva. Hokava tivisha ñanymykyrẽỹ, shara jaipota Tũpa ñyngareko ñandyrehe, hãrã jaroja hai heishu vekua meẽñoĩ ñande verã. 19 Kova jarojava pyrãta’ẽ hareka tanta’ẽ tykovepe, varko mymbytahapya rãĩmi. Kova jarojava vãhẽ oho tũpao vate arape’õ tarapo jochahapya kutyve, 20 haipemba iche aryka’e Jesús japo ñande verã pente tape, kyrã ikoshi pai ruvisha vasu opa ara pevarã, Melquisedec heko rãĩmiva.