Heb 7 | TpjSC | STEP | Kova Melquisedec haimba Salempe huvisha vasurã’õ hareka pai Tũpa vateve’õ ñonova, Abraham oujy ñyrãrõivi mbysypema yngava huvisha retarã, Melquisedec oho hỹvãĩtishu hareka maĩkavihe.

Hebrews 7

Pai vasu Melquisedec

1 Kova Melquisedec haimba Salempe huvisha vasurã’õ hareka pai Tũpa vateve’õ ñonova, Abraham oujy ñyrãrõivi mbysypema yngava huvisha retarã, Melquisedec oho hỹvãĩtishu hareka maĩkavihe. 2 Haivi Abraham meẽshu Melquisedec opañandepoivi pente opaite hai veru vekua ñyrãrõivi. Tynonde katu jaikuaa kavi Melquisedec he’ise “huvishavasu pirĩmbivache ryheva”, hareka “huvisha vasu Salempe’õ”, hokava hai, “pyavapy juhuvisha”. 3 Mba’ety kuaava mbavara tuu, ishy hareka tynondeshi vekuare; mbaipera oa hareka mbaipera mano. Hãrã hokava pai, ova Tũpa Tay, hai pai opa ara pevarã. 4 Pymaĩ kavihe marãramba mbaivasuite Melquisedec, ñanytynondeva Abraham ha’eavemba meẽshu pente pañandepoivi hai veru vekua ñyrãrõivi. 5 Ãñete Moisés mbypara vekuape hei Leví tayre pa‘irã’iare katuĩ jurureshu tentape’õre, pente pañandepoivi, ajemaĩte haiva hentarãre hareka Abraham ñymoñashia reta jyve. 6 Tẽvã Melquisedec, haimbatẽ Leví tay retava, Abraham meẽshu pente pañandepoivi hai imereva. Kyrã Melquisedec maĩkavihe Abraham; hipity vekua Tũpa ĩñee meẽvare, 7 opaiteva jaikuava rãĩmi maĩkavi pyryreheva mbaivasuveshi ma’ẽãkaviheva. 8 Kope, pente pañandepoivi me‘ẽha’ẽshua hai kuareta pente arape mano verã, tẽvã kuatia mbyparahava ijetahe Melquisedec ĩmeĩteri’ia rãĩmi. 9 Ĩãrẽve katu jaijy hokava levitare, me’ẽãshuvare pente opañandepo, mbyhepy jyveshu reta pente pañandepo Melquisedec Abraham rupii. 10 Shara Abraham hai ĩmemaimbare hetere Levi ñymoña hãndiare nde’iavetẽ oava Melquisedec oho ijesha handi verã. 11 Tũpa meẽshu tenta Israel mbyparahava japoa verã. Kova mbyparahava japoha verã japoha Leví pai tayre mbory verãre tenta mbyhekokavi verã. Tẽvã hokava paire katuã japorã, õheñoĩpo pente pai yngaiva, pente haimbava pai Aarón ñymoña handiva, koñeĩ Melquisedec ryheva. 12 Shara pai heko yngaijyrã, yngaiñoĩpo japohajy ñee mbyparahava. 13 Tẽvã Ñandeja, mbyparahava heiheva, kova hai yngava Israel ryheva ñymoñashia, hokavaivi mba’ety õhẽshia pai. 14 Shara kuaaha kavi Ñandeja hai ouva Juda ryheva retaivi, hareka Moisés mba’ẽã heihe kova rehe paire ijetarã. 15 Jahesha kavivema, pai py’ahu puãva hai pai Melquisedec heko rãĩmivarã. 16 Yngaijy hai, shara pyhỹrõhããmba ñymoña hãndiaivi ñee mbyparahava japoa verã heiva rãĩmi, koñeĩ pyhỹrõhamba pente tykove mbaikatu rupii ñymbaimbava. 17 Tũpa kyrãmba heihe: “Nde rãnga hai pai opa ara pevarã, Melquisedec heko rãĩmiva”. 18 Hãme rãnga japoa verã arykaiva mby’opaha, shara ikangyrã hareka mbaivapeã iko. 19 Shara Moisés mbypara vekua mba’ẽã mbyhaikavi, tẽva ã’ẽ jairojamahe ñyhãrõ kavipe, hokava heja ñande ñaimbojahe verã Tũpa. 20 Hãrã Tũpa my’añete hai hei vekua ĩñee meẽva rupii. Yngava paire ikoshi pa’irã Tũpa ĩñee meẽmbape. 21 Tẽvã Ñandeja Jesús rehe ẽẽ tiñee me’ẽãva. Shara Mbyparahava heimbahe: “Ñandeja ĩñee meẽ hãrã okambiãpojy: Nde hai pai opa ara pevarã, Melquisedec rãĩmi” ^{▼▼‘Melquisedec rãĩmi kova ñee mba’ety hai arykai mbyparahavape.}. 22 Hãme rãnga Jesús my’añete ñande ñee me’ẽãva haikaviveva tynonde vekuaivi. 23 Aryka’e hetamba’ẽ paire, shara opa manorã katuã ohoĩhe japova, ñonoãñoĩmbajy yngava hendakuepe, 24 tẽvã Jesús manomba ryheva hairã, tekotẽvẽã mbyhasa yngavape pa’irã mba’apo verã. 25 Hãrã katu mondojepe jyve opaite hai rupii Tũpa kyty ñymbojavare, shara hai iko opa ara, jururehe verãre Tũpape. 26 Kyrãvã Pai Ruvisha vasu rãnga mba’ety ñande. Hai heko ky’ãã, heko kavi hareka hai japoã mbai porãmba, Tũpa mbyry ñonoshi mbai porãmba japo’iare hareka vateve araivi hupiha. 27 Hai ha’ẽã ĩrũ pai vasure rãĩmiva, opa ara ikotẽveva mymba jukahava, tynonde mbai porãmba hai japovare, haivi japo jyvehe tentape’õre pevarã. Tẽvã Jesús penteĩmba haiteiva ñymeẽ jukaha verã hareka opa ara pevarã. 28 Ñee mbyparahava rupii rãnga ñonohãmba pai vasu kuaretare ikangyva, tẽvã Tũpa ĩñee meẽva ñee mbyparahava haykue, ñonomba pai ruvisha vasurã Tay, hai mbyheko kavi opa ara pevarã.