Heb 8 | TpjSC | STEP | Mbai vasuveva opa mbai ja’evaivi rãnga hai kova, imẽjare pente pai vasu vate arapy’ẽvã, vapy’ẽva Tũpa vapy’õpe jakata kyty,

Hebrews 8

Pai ruvisha py’ahu ñee me’ẽva ryheva

1 Mbai vasuveva opa mbai ja’evaivi rãnga hai kova, imẽjare pente pai vasu vate arapy’ẽvã, vapy’ẽva Tũpa vapy’õpe jakata kyty, 2 hokava pai japo’ẽ verã añeteĩteva tavernakulo, Ñandeja japo vekua hareka ha’eã kuaretare japo vekua. 3 Opaite pai vasure ñonoha mbishaka verã Tũpape me’eãva hareka mymba jukahava me’ẽhava Tũpa pevarã, hãme rãnga Jesucristo ĩmeñoĩpore jyve meẽ verã. 4 Hai ikoĩteri ko yvy’ĩãrẽrã, mba’apoãmbapo pai rãĩmi, shara kope ĩmema’ẽ paire mbishaka verã Tũpape me’ẽãva Moisés mbypara vekuape heiva rãĩmi. 5 Kova paire japo jyre vekua rãnga, vate arape’õ rãĩmiva myha’ãngaheva hareka kuarãsyã; Tũpa heishuva rãĩmi Moisés, japomapo’ẽ tavernakulorã: Mãĩkavikui, rijapo ryraha verã arymbyheshakava rãĩmi yvyturusupe. 6 Tẽvã ã’ẽ ñandy Pai Vasure me’ẽãshuhai japo verã haikaviveva. Kyrã, ñee me’ẽãva py’ahuva hai veruva tivishaveshi tuja vekuaivi, shara ou ñee me’ẽãva haikavitevevaivi. 7 Ñee tynonde me’ẽã vekua haikaviterã, tẽkotẽveãmbapo yngava ñonohajy ñee me’ẽã py’ahuva ryheva. 8 Tẽvã Tũpa hesha porãã hokava kuaretare, hareka hei: Oupokui ara ajapo verã ñee me’ẽãva py’ahuva Israel hareka Juda hãndi, Ñandeja hei. 9 Kova ñee me’ẽãva haiveãmapo pynytynondevare ajapo hãndi vekua rãĩmi, ipope apysyshu reta ãnohẽ verã yvy Egiptoivi; shara haire japoã shiñee me’ẽãvarã, ahejamashu reta, hei Teja. 10 Hokava ara hasamarã, kova ñee me’ẽãva ajapo hãndi verã Israelvare, kyrãpokui, hei Teja: Shiñee mbyparahava ãñonopokui ñakapy hareka ambyparapokui pya retape. She ãĩposhukui ñu Tũparã hareka hai retapokui shyrẽta ĩrũre. 11 Mba’etymapokui mboiverã hapishape, mbaivamba heishu verã ñymoña hãndiare, kuaa verã Teja; shara opaiteva, ndeivavive hareka kuakuamavare, shykuapokui. 12 Ahejareiposhi retakui porãmba japo vekua; shymanduaveãmapohekui haire mbai porãmba japo vekua. 13 Tũpa ijeta py’ahujyhe ñee me’ẽãvãrã he’ise tynonde ñee me’ẽã vekua tujama, hareka tujamarã opaserima kañy.