Jam 1 | TpjSC | STEP | She Santiago Tũpa hareka Ñandeja Jesucristo jokuereva, amarãndu 12 Israel ñymoñashiare opa mamaipi ohova yvy jerekue.

James 1

1 She Santiago Tũpa hareka Ñandeja Jesucristo jokuereva, amarãndu 12 Israel ñymoñashiare opa mamaipi ohova yvy jerekue.

Ãrãndu Tũpaivi ouva

2 Shyryvyre pyvy’aĩpo opaĩ marãrãva pyarãã pyhasapeĩrã. 3 Shara pikuaa kavi porãmba pyhasapeĩ pirojakueperã, ĩmevepopyre ñyhãrõkuaa. 4 Piñyhãã katu hokava ñyhãrõkuaa pyndyraha verã hekope kavi’õpe; opakavi pẽĩvape hareka mbaimba pikotẽvẽheape. 5 Ĩme’ẽ pynymbytepe mbai kuambavarã, tirureshu Tũpa, haipo meẽshu ãrãndu mba’etyrea, shara Tũpa hetakavi meẽshu mbavapemba rỹrõva. 6 Tẽvã tirure jyrojakue ryheve, pyhumba ryheve; shara pyhuva ova yyvasu yvytu kokoty rahava. 7 Kyrã’iva avypo hei maĩnunga hipity verã Ñandejaivi, 8 shara ã’ẽ pya mbijetahe pente mbairã, paree yngaima heijy, pente hendapeã’ẽ opa mbai japovare. 9 Ñandyryvy pavete’ia, jyroja katupo’ẽ ijehe mbaivasuve hai Tũpa hỹnonderã, 10 hãrã ikokatuva tyvya Tũpa mimishĩshurã. Shara ikokatuva opapo jipi pente yvoty ñuhupi’ova rãĩmi. 11 Kuarasy õhẽmarã hareka hakuma’ẽrã, opa jipi, poty oashi haima mashy’ãkue opareii. Kyraĩ jyve ikokatuva opareiipo jyve mbai hipity vekuare. 12 Vy’apo kuimbai porãmba vãhẽshurã jepyheva, shara hasakavishirã me’ẽãposhu tykove, hokava hai korona Tũpa hei vekua meẽshu verã haihuvare. 13 Ĩme’ẽ pya hã’ãvarã avypo hei Tũpa pyahããshua; shara Tũpa katuã pyryrãã hai porãmbape, hareka hai mbavapeã pyahããshu. 14 Kyrã rãnga, ĩme’ẽ pya hã’ãhãvarã ha’i potava raha hareka japokashu. 15 Kova japova rupii rãnga õhẽ mbai porãmbava; hokava hetaitema japoharã, ñymoñashi ñymano. 16 Shyryvy ahaihuvare, avy peii piñymbytavypi, 17 opa mbai me’ẽãreiiva hareka mbai jaikatukue hekope kavi’õ rãnga ou vate araivi Tũpaivi, japo vekua arare’õre hareka Hai ñymy’yngaiã. 18 Hai, kyrãmba pota meẽ ñande tykove ĩñee añeteva rupii, hai ñanymytynondeshi opaite hai japo vekua retaivi. 19 Shyryvyre ahaihuva, pynymanduahe kova; opaiteva kuimbaire ẽẽñoĩpo hendu verã yngava hapishare, tẽvã ha’ẽã aremba’eite ijeta verã hareka poshy verã. 20 Shara kuareta poshy’iva katuãpo japo mbai haikaviva Tũpa potava. 21 Hãrã opa pyheky pindijuhuvi maĩnunga ky’ava hareka heta porãmba vekua, hãma pymyvãhẽ pirojamba pijehevape ñee mbe’uhapeva, hokava hai mondojepe verã pyndyrykove. 22 Tẽvã pijapo ñee heiva rãĩmi, avypo pyhendupeverei, mahẽ piñymbytavykui. 23 Shara ñee hendupeverei’ia, japombava, hãĩny sypevape ijejeshava, 24 haipe ijesha marãra’ẽ, tẽvã ohomarã sarejyhe marãra’ẽ hova. 25 Tẽvã maĩkaviheva Moisés mbypara vekua hekope kavi’õ, Tũpa ĩñee hai hekope kaviva hareka ñandorava, syryãshirã, ha’ẽã henduĩñoĩteva hareka sareheva, koñeĩ japo, vy’apo opa mba’e japova rehe. 26 Ĩme’ẽ heiva opa kavi japova Tũpa ĩñee, tẽvã juru jokoãrã, ha’i ñymbytavy’i hareka heireii opakavi japova Tũpa ĩñee. 27 Opakavi jajapova Tũpa ĩñee ryheva hai kova: Ñambory reta tuu hareka ishyveamavare hareka ĩme manoshiare opava maĩnunga mba’etyshuape, hareka ñaĩngareko ñandijehe potamba ñaĩmyngyapya mbai porãmba ko yvy‘ĩãrẽ’õ.