Jam 2 | TpjSC | STEP | Shyryvyre, pirojava Ñandeja Jesucristo ñymbai katui’ivare, porããpo kuaretare pimbivavy pingarekoherã.

James 2

Marãndu pirĩmbivavyva rehe

1 Shyryvyre, pirojava Ñandeja Jesucristo ñymbai katui’ivare, porããpo kuaretare pimbivavy pingarekoherã. 2 Ñañonoshu pimbatypeĩvape iche ou pente kuimbai ñykuairũ orova hareka kapyry ñimimonde’iarã; hareka iche ou jyve pente pavete’ia mondeva kyava hareka tuja vekua ryheve. 3 Haivi ñymonde kavi’ivaĩ pereshu: “Kope vapy nde haikavive’õpe”, tẽvã pavete’ia pereshu: “Hokapeĩ ñymbou’ẽ nde, maĩrã vapy nde yvype”; 4 kyrãrã peii piñimbivavypi, hareka hekope kaviã pijapo. 5 Pyhendu, shyryvyre ahaihuva: Tũpa rãnga pyhyrõ pavetevare ko yvy’ĩãrẽ, ikokatu verã jyrojakuepy hareka me’ẽhashu verã tenta vasu mbeushuva haihuvare. 6 Pee rãnga pijapo mbaimbava rãĩmi pavete’iare. Ha’eãra iko katuvare pynymymba‘apokarei’iva hareka pyndyraha’ia huvishare hỹnonde? 7 Ha’ẽara kuepi ijeta porãmba jyrehevare tyree kaviva Jesucristo pirojaheva? 8 Añeteĩte pijapo Moisés mbypara vekuarã, pijapokavipo Ñandeja ĩñee heiva rãĩmi: “Haihu ndapisha nde rijyhaihuva rãĩmi”. 9 Tẽvã pimbivavy papisharã, mbai porãmba pijapo hareka porãmba ĩmemapyre Moisés mbypara vekua hỹnonde. 10 Shara Moisés mbypara vekua ajemaĩpo pente jajapoã, japytama jajapombava rãĩmi. 11 Shara Tũpa teivamba kyrã hei: “Avy jyrekomateã ynga typokojyhe”, heivejy: “Avy puruka”. Yngava ripotamba tẽrijya, tẽvã rupurukarã, rijapoã Moisés mbypara vekua. ^{▼▼Exodo 20:13-14} 12 Kyrã pijeta hareka kyrã piko pimbivacheha’ẽ verã rãĩmi ñee mbyparahava japoha verã ñandorava ryheva. 13 Pyryparekombavare, mbivachehakapo parekohambape, tẽvã pyryparekova hasa kaviposhi ara pirĩmbivacheha verãĩvi. ^{▼▼1 Pedro 4:8.}

Jairojakue jaheshaka jajapova rupii

14 Shyryvyre, mbaivapera haikaviposhu ĩme’ẽ heiva jyrojakaviva tẽvã mbai haikavivaimbatẽ japova? Katura hokava jyrojakue mondojepe? 15 Ĩme’ẽ pente ñandyryvy maĩrã ñaniindy monde verã hareka hou verã mba’etyreva, 16 haivi penteva pynymbytepe’õ heishu: “Ekuajy pyavapy ryheve, jykasoishi ro’y hareka karu nyvãtapeve”, tẽvã me’ẽãshu ikotẽvevarã, mbaivapera haikavishu hokava? 17 Kyrã jyve jyrojapeverei’ia, mba’ẽã japorã, mano vekua rãĩmi. 18 Katu ĩme’ẽ heiva: “Nde ĩmeryre jyrojakue, tẽvã ajapo she mbai haikaviva”. Shymbyheshaka rirojakue mbaimbaa japova, hãrã she aheshakapo jyve nde jyrojakue ĩme’areva mbaikavi ajapova ryheve. 19 Nde ryroja Tũpa penteĩ’õ; rijapokavi! Mbaiposhyre rojaĩ jyve kova hareka opa ryry reta kyjeiterã. 20 Avy mbaimba kuaava rãĩmi’i, rikuããra jyrojakue ohoã hãndi jajapovarã, mbaivapeã haikavirãme? 21 Tũpa heimbashu heko kaviva ñanytynondeva Abraham japo vekua rehe, tay Isaac raha juka verãrã. 22 Ryheshara, Abraham heshakamba jyrojakue japova rupii, hareka japova rupii mbyhaikavimba jyrojakue hai ĩmereva. 23 Kyrãmba iko arykai Mbyparahava heiva rãĩmi: “Abraham roja Tũpa, hareka Tũpa heimbashu heko kaviva”. Abraham he’iambashu Tũpa ñi’ĩrũ. ^{▼▼2 Cronicas 20:7; Isaias 41:8.} 24 Pyheshama, kuareta japo vekua rupii he’ia jyvehe heko kaviva; ha’ẽã jyrojakue rupiiñoĩteva. 25 Kyrãmimba jehu jyve Rahab, taupe kyrãrãi’ia, Tũpa myvãhẽshu heko kaviva rãĩmi hai japova rupii, shara ñonoshu jokuehavare pyta verãpe hareka mboryshu õhẽjy verãre tape yngavaipi. 26 Shara ñandyrete putũhẽãrã mano, kyrã jyve jyrojakuepe mbaimba japova, manoma.