Jam 3 | TpjSC | STEP | Shyryvyre, avy pymbytepe hetaite toĩ pyrỹmboi’iva. Pikuaa kavi rãnga pyrỹmboi’iare mbivacheha pohyitevepokuirã.

James 3

Jajoko katupo ñandijuru

1 Shyryvyre, avy pymbytepe hetaite toĩ pyrỹmboi’iva. Pikuaa kavi rãnga pyrỹmboi’iare mbivacheha pohyitevepokuirã. 2 Opaiteva hetañoĩ jajavy. Ĩme’ẽ ĩñee rupii javymbaarã hokava hai pente kuimbai hekope kavi’ia, hete katu jokova. 3 Kavaju jurure ñañonoshu joko verãrã, jaishua japopo; hãrã ñande jaipotava rãĩmipo jaryvata hete. 4 Pymaĩ jyvehe varko vasure, marẽ’ỹtẽva hareka yvytu vasu mañatevã, mbyvatareva timon mishĩĩvamipy pota rahavaipi, raha. 5 Kyrã jyve ñaneku; hai pente ñandyretere’õ ryheva mishĩĩva, tẽvã katu heta mbai jepyhe. Pyhesha marãra tata mishĩtẽvã katu ñana tivisha’õva opaĩ hapy. 6 Ñaneku rãnga tata rãĩmi jyve, pente yvy‘ĩãrẽ’õ porãmba ñandyretere ẽvã, opa myngya tyrete, hendykue tata vasuivitei ou hareka opa hapy ñandyrykove. 7 Kuaretare katuĩ jepyhe opaĩ marãrãngatuva mymba ñarõvare, vyrare, mboi hareka mymba yyhupi’iare. 8 Tẽvã mba’ety kuareta katu jepyheva ĩku. Hokava hai pente porãmbava katumba jepyhaheva, tynyhẽva veneno purukava. 9 Tẽku rupii omomba’ehashu Teja hareka Teru, hareka hai rupii jypejuajyhe kuaretare Tũpa japo vekua hai rãĩmiva. 10 Hokava tijuruivi õhẽjy ñee haikaviva hareka jypejuva ryheva. Shyryvyre, kova ha’eã rãngatẽ kyrã verã. 11 Katura õhe pente yvykuaivi yy hẽ’ẽva hareka irova? 12 Shyryvyre, katura õhe jyve igo hãkaivi aceituna? Maĩrã uva hãkare’iarapo igo? Kyrã jyve katuã pente yvykuaivi õhe yy hẽva hareka irova.

Ãrãndu vate’õ

13 Ĩme’ẽ pynypaũpe ĩñarãnduva hareka opa mbai kuaavarã, tyheshaka heko kavikue rupii jyrojamba ijehevape, hai mbai kuaava rãĩmi. 14 Tẽvã pyndypya poshy ryhevepirã hareka pijeshatããrã, hokava pijaporã pee pevarãĩjy, avy pimoã mbai vasumape, kyrãrã papumapo hareka piñomima añeteva. 15 Kyrãva mbaikuaa ouã Tũpaivi hokava yvy‘ĩãrẽ’õvaĩ, kuaretaivi ouva hareka ãñaivi. 16 Shara ijeshatamba hareka ñymymorãmba ẽvãpe, ẽẽ jyve ñymomohẽva hareka opaĩ marãrãngãtuva porãmba vekua. 17 Katynga ãrãndu Tũpaivi ouva tynonde heko ky’ãã, heka pyavapyva ryheva, pya kavi hareka ñee hendu. Kyrãĩjy pyrypareko, ĩñee añete, hova mokueã hareka haikaviva japo. 18 Hãrã õñehãã japova pyavapy ryheva, pyavapy ryheve ñoty, mynoo verã tykove hekope kavi’õ.