Jam 4 | TpjSC | STEP | Maivira ou ñyrãrõ hareka ikoraiva pynymbytepe? Pyndyhevi rãnga ou, mbai potakue pypyaivi ouva, ñyrãrõñoĩ pyndyretepy.

James 4

Piñyñonohe Tũpa

1 Maivira ou ñyrãrõ hareka ikoraiva pynymbytepe? Pyndyhevi rãnga ou, mbai potakue pypyaivi ouva, ñyrãrõñoĩ pyndyretepy. 2 Pee rãnga pipota maĩnunga katumba ĩmepyreva. Pynytynyhẽ mbai potakue pipitymbava maĩnunga hãrã pupuruka, hokava rehe piñyhãã hareka pirãrõ. Pyvaheãshu pipotava shara pirureãshu Tũpa. 3 Hãrã pirurerã me’ẽhãpe, shara hekopẽã pirure, vyareiivape pipory verãĩ pipota. 4 Tykove Tũpa haihumba hareka ñee hendumbare! Pikuããra piñimi’ĩrũhe yvy‘ĩãrẽ’õrã, peima pimbyvaishoheva Tũpa? Ĩme’ẽ pota yvy‘ĩãrẽ’õ ñimi’ĩrũhearã, ñymbyvaishomahe Tũpa. 5 Pyrojããra Mbyparahavape heiva? “Tũpa haihu Espiritu ñandypyape ñonova”. ^{▼▼Genesis 6:3-5, Galaciape’õre 7:17.} 6 Tẽvã Tũpa hetave ñanymbory pya kavikue ryheve. Hãme hei: Tũpa ñymytãtãshi jyroja ijehevare, tẽvã pyakavishu oñemomishĩvare. 7 Piñyñono Tũpa ipope, tanta piñyñonoshi Ãña, hãrã hai ñyvãhẽpo pyndyhevi. 8 Piñymbojahe Tũpa hãrã hai ñymbojapo jyve pyndyrehe. Mbai porãmba japo’iare pijohe pepo; hareka pee Tũpa pota pyhaihuva hareka jichepeĩ pyhaihuvajy yvy‘ĩãrẽ’õ, opa pijohe pyndypya. 9 Piñymbasy, piñymbypavete hareka pijaheo! Pupukatẽ verã pijaheo, hareka pyvyatẽ verã piñymbasy. 10 Piñesu Ñandeja hỹnonde, hãrã hai vatepo piniñono. 11 Shyryvyre avy pijeta porãã ijehe. Pyndyryvyhea ĩñeepe ñymbyvaisho’ihea maĩrã mbivache’ia, porãã ijeta hareka mbijiche Moisés mbypara vekua japoa verã. Hãrã rĩpirĩmbijicherã, rĩñyñonoma pirĩmbijiche’ia rãĩmi rijapoĩtẽ verã. 12 Penteĩ rãnga’ẽ meẽva mbyparahava japoa verã hareka haijy pirĩmbivache’ia maĩrã katu pyrỹmondojepeva; tẽvã mbavara nde, rĩmbivacheri verã ndapisha?

Jaikuãã pare verã

13 Pyhendu pe perepiva: “Ã’ẽ maĩrã pare jahapokui hokava tentape pente ãño kavi. Ñamba’ova hareka ñamavendepo kyrãrãpo ñambatykui kyrypoti”. 14 Marã’ĩrãra kyrã pijeta pikuaambatẽva mbaivara ikopo pare? Pyndyrykove rãnga ova vĩti sapy’aiteĩ jykuava, haivi opa kañyjy. 15 Haikavivepo kyrã peveĩ pererã: “Ñandeja potarã, ĩmehaĩteripo’ikoakui hareka japohapo kova, maĩrã hoka’õ”. 16 Katynga, pypya’ohe piroja pindijeheva ryheve pijetarã. Opaite kyrã jyroja’ijeheva porãã. 17 Ĩme’ẽ mbai haikaviva katutẽ japova, japoarã, mbai porãmbama japo’ẽ.