Jam 5 | TpjSC | STEP | Pyhendu, opaite pee pikokatuvare! Pijaheo hareka pysapukehe ko jyhasa’asy ojaimbava oupe verã.

James 5

Ñymbarakuaa ikokatuva retape

1 Pyhendu, opaite pee pikokatuvare! Pijaheo hareka pysapukehe ko jyhasa’asy ojaimbava oupe verã. 2 Mbai hetapyre vekua opa ndeshi, hareka pymondeva kupiire opama hou. 3 Ita verava ijuva hareka ita vera tĩĩva ĩmepyreva opa jai hareka jaiikue haipo jere pyndyrehe hareka tata rãĩmipo pyndyroo karuhe. Mbai hehepy vekua pymbatypi ara opamapo’ia. 4 Pymaĩhe, koohupi mba‘apo’iare mbyhepyambashuvare, pymbytavy pyrerã pymbyhepyãshu hareka haire jurure’asyvare vãhẽ Teja Ñymbaikatuva japysape. 5 Piko pente tykove ikokavivape ko yvy’ĩãrẽ, tykove pota pikova rãĩmi ryheve, pee rãnga vakare rãĩmi pimyngyra vãhẽserimatẽva ara jukaha verãpe. 6 Pee rãnga pijahehe hareka pijukareii kuareta heko kavivare, katumba haire ñykatẽỹva.

Pyhãrõ kavi hareka pimbo’e

7 Katynga shyryvyre, pyhãrõ kavi Ñandeja oujypeve. Pymaĩhe marãra ma‘ẽty’ia hãrõ ñotyva ia mynoo verã, hãrõ kavi vãhẽshupeve aremba haiviva hareka arẽãmba haiviva. 8 Kyrãpo pyhãrõ kavi jyve hareka piñono kavi pyndypya; shara Ñandeja oujy verãpe vãhẽserima. 9 Shyryvyre, avy pypya jyrova ijuhuvi, pinimbijicheamba verã. Pymaĩ, pirĩmbijiche’ia õchepema’ẽ. 10 Shyryvyre, pyraha pindijehe marãra hasa’asy hareka hãrõ kavi Tũpa ĩñee mbeu’iare arykaivare Ñandeja hee ijeta’ihe vekuare. 11 Ĩmejare vy’avare hasa’asyvape, pyhendu jyveshi Job hãrõ kaviva hareka pyhesha koñyma Ñandeja meẽshua, hareka kova heshaka Ñandeja hai pyryparekovarã. 12 Tẽvã kova ĩãrẽ, shyryvyre avy pymeẽ piniñee vate arare, yvype maĩrã yngava maĩnungare; hãrã “ẽẽ” pererã haimaĩpo; hareka “mba’ety” pererã mba’etymaĩpo, potãã pinimbivachearã. 13 Ĩme’ẽ pynymbytepe vyamba’õvarã, timbo’e. Ĩme’ẽ vya’õvarã, typyraheshu Ñandeja. 14 Ĩmera’ẽ ñymbairasyva pynymbytepe? Pyhẽnoka Tũpa hoope miñaka’ia, jurure’ĩãrẽ verã hareka asaite kytyhe verã Ñandeja heepe. 15 Hãrã ñymboi jyrojakue ryheve japoava mynguerapo ñymbairasyva, hareka Ñandeja mupuãjypo; ĩme mbai porãmba japorã, hejahareiiposhu. 16 Hãme pymbeupo ijupe mbai porãmbare pijapova hareka pirure ijehe pykuera verã. Heko kaviva japova ñymboi heta ĩmere mbaikatu hareka pyrãtakue. 17 Tũpa ĩñee mbeu’ia Elías haimba pente kuimbai ñande rãĩmiva; jurure jyrojakue ryheve potaveãma haivirã, haivi jyvyãmba yvy’iãrẽ mbahapy ãño hareka ova jasy. 18 Hãrã jururemajyrãmeĩ, haivijy; yvy mbi’iajy yvyrare hareka ñotyãvare. 19 Shyryvyre, ĩme’ẽ pynymbytepe añeteva ryheva hejarã hareka ĩme’ẽ añetevape verujyvarã, 20 pynymanduahe kova: Ĩme’ẽ mbai porãmba japo’ia poi mbijapokavarã, mondojepepokui ñymanoivi hareka hetapo hejahareiishi mbai porãmba vekua.