John 10

Ñee ñymyhã’ãnga avisha ñyngareko’ihea ryheva

1Haivi Jesús hei: Ãñeteĩte hai pee, ichemba avishare jykora hõcheipi, yngaipi icheva, hoka hai manarõ’ia hareka heko porãmba. 2Tẽvã õcheipi icheva hoka hai ãñetẽĩte avishare ñyngareko’ihea. 3Hãma õche ñyngarekoheva peashu iche verã avishare ñyngareko’ihea, haivi hai hẽno pepenteĩ heepe, hãrã avishare kuaajyveshu reta ĩñee. Hãrã hai nohẽ koraivi. 4Opama nohẽ katoape jy’avisha retarã, hỹnonderã ohoshu, hãrã avishare oho haykue shara kuaa reta ĩñee. 5Tẽvã kuambaare haykue ohoãpo, opaĩpo ñyvãhẽshi reta, shara kuããshi ĩñee. 6Kyrã Jesús ijetashu reta ko ñee ñymyhã’ãnga rupii, tẽvã haire kuãã mbaivara heishu reta.

Jesús hai avishare ñyngareko’ihea pya kaviva

7Haipe Jesús hykuãĩ heijyshu reta: Añetevape haijype: She hai õche avishare iche’õĩpi. 8Opaite tynonde ou shyhevi vekuare, hai manarõ’ia hareka heko porãmba’iare; hãme rãnga avishare ñee henduãshu reta. 9She hai õche; she rupii icheva, ohojepepo; iche hareka õhepo koraivi avishare rãĩmi, hareka vãhẽñoĩposhu hou verã. 10Manarõ’ia koñeĩ ou manarõ verã, puruka, hareka pyrỹmbai verã; tẽvã she ai ameẽ verã tykove, hareka heta pyree verã tykove. 11She hai avishare ñyngareko’ihea pya kaviva. Hãrã ko avishare ñyngareko’ihea pya kaviva, meẽpo hykove jy’avisha retare. 12Tẽvã mbyhepyashurãmeĩ mba’apova, heja avishare hareka ñyvãhẽshi, shara ha’ẽãhai avishare ñyngareko’ihea, hareka ha’eã avishare hai ña’ãpova. Hãme rãnga avara vasu ou opa momohẽ avishare, hareka oparupi opa oho. 13Hãrã hokava kuimbai ñyvãhẽ shara kyrypoti rehẽĩ mba’apo. Hãrã mba’ẽãshu hai avishare. 14She hai avishare ñyngareko’ihea pya kaviva; she aikuaa shy’avishare, hãrã haire shykuaa jyve. 15Sheru shykuaa kavi, hãrã she aikuaa kavi jyveshu Sheru. Kyrãĩ aikuaa kavi jyve shy’avishare; hãrã haire shykuaa kavi jyve hareka she añono shyrykove shy’avisha retare. 16Ĩmeĩ’are jyve ynga avishare haimba kova korape’õre, hokavare opapo arujyvekui. Hãrã haire japo verã jyve shiñee. Hãrã ẽpo pente jatyvapẽĩ, hareka penteĩpo’ẽ ñyngarekoheva. 17Sheru shyraihu, shara aĩ shykove ameẽ verã, haivi ai apysyjy verã. 18Mba’ety heky shyheviva shykove, koñeĩ sheii ameẽjy. Shara ĩme’are mbaikatu ameẽ verã hareka apysyjy verã. Kova hai ñeẽ japoa verã amyvãhẽva she ruivi. 19Judiore hendu kovarã, ouma pente ñeepẽã ñynõĩjy. 20Heta’ẽ haire mbytepe heiva: Marã’ĩrãra pyhendushu? Kova kuimbai mbaiposhy ĩmere, hareka kuakuaã’i. 21Tẽvã ĩrũre heijyve: Mba’ety rãnga mbaiposhy ĩmerea kyrã ijeta verã. Mbaiposhy ĩmereara mynguerã rãngapo pente heshambava kũvãĩpia?

Judiore juhuvisha mbijiche reta Jesús

22Ro‘ymba’i Jesús oho Jerusalenperã, haipe mby’arete ñynoĩ manduahe reta tũpao me’ẽãjyshurã vekua Tũpa. 23Jesús haipe vata i tũpao juri, õche Salomon he’iashua õĩpi. 24Haipe Judiore opajerehe, hãrã pyrãndushu reta: Mbaipeverapo kyrã yryre kuaa kavimba mbavara nde? Nde hai Cristorã mbeu kavi ore. 25Jesús heishu reta: Ãmbeuma rãngape, tẽvã shyrojãpi. Opa mbaikavi heshaha verã she ajapo Sheru ñymbaikatu rupii, hãrã hokava rupii shy kuaaha mbavara she. 26Tẽvã pee shyrojãã, shara ha’ẽãpe shy’avishare. 27Shy’avishare kuaa shiñee, hareka she aikuaashu reta, hãrã haire ou shaykue. 28She ameẽshu reta tykove opamba verã; hareka mapeãpo manokui, hareka mbavẽãpo heky ipoivi. 29Sheru ñymbaikatuveva, meẽshe hoka avishare, hãrã mba’ety yngare hekyshi verã ipoivi. 30Teru hareka She, penteĩ’õĩhã. 31Haipe Judiore hykuaãĩ opa hekyjy reta ita japi verãre Jesús. 32Tẽvã Jesús heishu reta: Heta mbaikavi ajapo pynynonde Sheru ñymbaikatu rupii. Marãvãĩte rehera pota itape shukapi? 33Haire heishu: Ndukahããpo itape mbaikavi rijapo vekua rehe, Tũpa porãã rijetaherã reheĩ rãnga. Kuimba’ẽĩ rãnga nde, tẽvã rijijapori Tũpa rãĩmi. 34Haipe Jesús heishu reta: Ñee mbyparahava pyndykuatiape’ẽ Tũpa heirã vekua: Pee rãnga hai Tũpare! 35Jaikuaa kavi rãnga mbyparahava, katumba mbairã ñambijicheva; Tũpa rãnga mbyhee tũpare, opaite ĩñee pysy vekuare. 36Tũpa shypyhỹrõ hãrã shymbou yvy’ĩãrẽ: Hãmera marã’ĩrã pere, she aijeta porãmbahea, Tũpa Tay she hairãme? 37Ajapoã maĩnunga Sheru japovarã, avy shyrojapi. 38Tẽvã ajaporã, ajema shyrojambatẽpiva, pyroja ajapovare, pikuaa kavi verã Sheru hareka she pentevãĩ orerã. 39Hykuãĩ pota pysyjyrejy, tẽvã Jesús õhẽshi reta haire pãũvi. 40Haivi Jesús ohojy yy syryva Jordan hyvaisho kyty hãrã haipe pyta, Juan Bautista pyrỹmyngarai’i vekuape. 41Heta kuaretare oho hai ẽvãpe, hãma hei reta: Juan mapeã mbaikavi heshaha verã japo, tẽvã ãñetemba heihe vekua ko kuimbai. 42Hãrã heta kuaretare haipe ẽvã roja reta Jesús.