John 11

Lazaro manorã vẽkua

1Ĩmenda’ẽ pente kuimbai Betaniape’õ ñymbairasyva Lazaro he’iashua, Maria hareka kypyy Marta hentape. 2Hoka Maria, Lazaro hiindy, haimba oho mbipishe katushu vekua Ñandeja ipyre, hareka ñãkahaapy mitĩnijy. 3Haipe hiindy mokue’iare he’ikashu reta Jesús: Yreja, ni’ĩrũ ryhaihuva Lazaro rãnga ñymbairasy’ẽ. 4Jesús hokava hendurã hei: Ko mbairasy ha’ẽã rãnga opa verã ñymãnope; Tũpa ñymbaikatukue heshaka verãĩ rãnga, ko Lazaro ñymbairasykue rupii Tũpa heshakapo hai Tay mbaivasuva. 5Jesús haihushu Marta, kypyy Maria hareka Lazaro. 6Jesús hendutẽ Lazaro ñymbairasyva, pytaveejy mõkue ara hai ẽvãpe. 7Haivi, kova opamarã, Jesús heishu mboireare: Jahajy Judeape. 8Haipe mboireare heishu: Pyrỹmboi’ia, ka’ãmẽĩ haipe’õ Judiore ndyrekajyre pota itape ndukarã, hãmera potama rehojy haikyty? 9Jesús heishu reta: Pente arava ĩmere 12 ora. Kuareta arape vatava vapiã, shara kuarasy sapeshu. 10Tẽvã pỹntuaipi vatava vapipo, shara mba’ety sapeshuva. 11Haivi Jesús heishu reta: Ñani’ĩrũ Lazaro rãnga ochema, tẽvã ahapo ãmomba. 12Haipe mboireare heishu: Yreja, Lazaro ochẽĩ’ẽrãmẽãra he’ise kuera verã. 13Jesús rãnga he’ise Lazaro manomava, tẽvã mboireare pya mbijetajyrehe mõã ochẽĩ’ẽshurã. 14Haivi Jesús mbeu kavishu reta: Lazaro rãnga manoma. 15She avya’ãĩ, ãimeã’ãĩ haiperã, shara haikavive pee pevarã, piroja shyrehe verã. Tẽvã jaha ñamaĩhe. 16Haipe Tomas, mbyheavajy “Mokuepya” heishu mbo’eharehãndiare: Jahave ñamano hãndi verã ko pyrỹmboi’ia.

Jesús hai tykove

17Jesús vãhẽ oho tenta Betaniaperã, hesha urũndy arama hasa Lazaro ñotyhãva. 18Betania mbyryã’ẽshi Jerusalen, mbahapy kilometroipi, 19heta Judiore oho Marta hareka Maria hentape, mbypya kavijy verãre jykyvy manoshirã. 20Marta kuaama Jesús vãhẽ ourã, õhẽ hỹvãĩtishu, tẽvã Maria hoo’ipẽĩ ĩmehai. 21Haipe Marta heishu Jesús: Yreja, kope rĩmẽrẽirã, shykyvy manombatẽ verã. 22Tẽvã she aikuaa Tũpa meẽñoĩpo nde opaite rirureshuvarã. 23Jesús heishu: Ndykyvy kuerajypokui. 24Marta heishu Jesús: Ãñete she rãnga aikuaa, puãjypokui manovare kuerajyma’ẽrã, ara opavape. 25Haipe Jesús heishu Marta: She hai manovare mynguerajy’ia, hareka tykove. Shyrehe jyrojava, ajemaĩpo mano kuerajyñoĩpo. 26Hãrã opaite hykove teri’iare jyroja shyreheva, opa ara pevarãpo mano. Ndera ryroja kova mbai? 27Marta heishu Jesús: Kyrãĩte, Sheja. Aroja nde haiva Cristo, Tũpa Tay ou verã aryka’e ko yvy’ĩãrẽ.

Jesús jaheo Lazaro ñotyhã vekuape hỹnonde

28Haivi kova mbai opa heirã, Marta oho hẽno kypyy Maria, ñemiãpẽĩ heishu: Pyrỹmboi’ia vãhẽma ou kope, hai nyrẽnokaje. 29Maria hendu hokavarã pũã oho Jesús ẽvãpe. 30Jesús icheãmba teri Betaniape, ĩmeĩmba teri’ẽ Marta hỹvaĩtishuape. 31Judiore haipe’ẽ hãndiare hentape, heshama Maria õhẽ ohorã opa jyraha jyve hipi, shara pyape hei reta tã’õvere ẽvãpe oho jaheojya. 32Maria vãhẽma oho Jesús ẽvãperã, ĩñesu hỹnonderã heishu: Yreja, kope rĩmerẽĩrã shykyvy Lazaro manombatẽ verã. 33Jesús hesha Maria hareka Judiore ou hãndiare jaheojyrerã, paveteshu hareka pyape mbasyjyve. 34Hãrã pyrãndushu reta: Mapera piñoty? Haire hei: Yreja, ei mãĩhe. 35Haipe Jesús jaheo. 36Hãrã Judiore hei: Pyheshara marãra haihumbashu! 37Tẽvã ĩme’ẽ heihevare: Hai mynguera’i heshamba kũvãĩpiare, mba’ẽãmba katu japohe Lazaro manomba verã?

Lazaro kuerajy

38Jesús pyape mbasy ryheve ñymboja ita jo’oa vekuape, Lazaro hetekue ẽvãpe, hokava ita jo’oava, hõche pente ita vasupẽĩ mbotyhajy. 39Jesús hei: Pymbysyryshi mbotyhapya! Marta, manova hiindy heishu Jesús: Yreja, ĩnema rãnga’ãmo shara urũndy arama’ẽ manova. 40Jesús heishu: Ambe’ũarandeje, ryrojarã ryhesha verã Tũpa ñymbaikatukue? 41Hãrã mbysyry reta ita vasu mbotyhapya. Jesús vate maĩrã hei: Sheru, gracia ameẽnde shara nde shyrẽndu. 42She aikuaa shyrẽnduñoĩrã, tẽvã kova kuaretare rehe kyrã hainde, roja verãre nde hai shymbouvarã. 43Opama kova heirã hỹnatu sapuke: Lazaro, ẽhẽ katuape! 44Hãrã mano vekua õhẽjy, ipo hareka ipy mamahãpya ryheve, hãndi hova mbaso’iapya savana tĩĩ vẽkua. Jesús heishu reta: Opa pijorashi mamahãpya, hareka pymã’ẽĩhe tohojy.

Ñemiãpeĩ ñee ñonoãhe Jesús pysyha verã

45Heta Judiovare, Maria ou mi’ĩrũ vekuare heshama Jesús japovarã, jyroja jyvehe reta. 46Tẽvã a’ãmore jyraha fariseore ẽvãpe, mbeushu reta Jesús japo vekua. 47Haipe fariseo hareka pai ruvishare ñymbaty hãndi Judiore juhuvisha retarã hei: Mbaivarapo jajapo? Ko kuimbai rãnga heta mbaikavi heshaha verã japo. 48Ñama’ẽĩhe kyrãĩ’ẽ kovarã, opavapo jyrojahekui, hareka huvisha Romavare oupo opa mambaikui ñande tũpao hareka ñanyrẽta. 49Tẽvã Caifas he’iashua, pai ruvisharã’õ hokava ãñope heishu reta: Pee rãnga mba’ẽã pikuaa! 50Pyheshããra, haikavivepopekui pente kuimbai mano opava reherã, mahẽ opaite tentare jyvareahekui. 51Caifas ijuhuvireĩã hei Tũpa mbykuaaka shara hai pai ruvisha hokava ãñope, hei Jesús manohẽ verã tenta Judiovare. 52Ha’ẽã kova tenta ẽvãrei, ẽẽjyve opaite Tũpa jyrojaheare mbatyrã pente ñeepe ñono verã. 53Hãrã hoka araivive, Judio juhuvishare pente ñeepẽĩ ñynoĩ juka verã Jesús. 54Hãrã Jesús vata veamã Judiore mbyteipi, koñeĩ õhẽ Judeaivi hareka oho yvy ikoambaipi hyvache, tenta Efrain he’iashuape, haipe pyta hãndi mboireare. 55Vãhẽserima arete Pascua verãpe Judiore jy’arete, heta kuaretare oho Jerusalenpe ñymypõti’ẽ verã areterã. 56Hãrã hekajyre Jesús, tũpaope ĩmema ñynoĩrã pyrãndu jyre ijupe: Marãra pere jyve, Jesús ourapovekui areterã? 57Fariseore hareka pai ruvishare mbeushu kuaretare japo verã, ĩme’ẽ Jesús heshavarã, tymbeu orekui pysyha verã.