John 12

Pente taupe ñõhẽhe Jesús mbai pisheka kavi

1Hãrã 6 aravape ndeiteri vãhẽ arete Pascua verã, Jesús oho Betaniape Lazaro iko’iape hai mynguerajy vekua manovare mbyteivi. 2Haipe pynturã japo reta karuvasu Jesús heepe. Marta mbory ñono’ẽ mesape hou verãre; haipe Lazaro vapy’ẽ jyve Jesús karu hãndi verã. 3Maria veru mbai pishekatuva yvotyivitei japohava, hareka hepyva, Jesús ipyre kyty. Hãrã opa kytyherã ñãkahaapy mitĩnijy. Haipe oo ipe opa vyhasa mbai pishekatu vekua. 4Hãrã Judas Iscariote, Jesús mboireareva jyve, hareka pysyka’ẽshu verã hei: 5Marã’ĩrãra kova mbai pishekatuva õvendehãã 300 nikere repy; haivi pavete’iare mẽ’ẽhashu verã? 6Tẽvã Judas ha’ẽã manduahe pavete’ia retarã, shara manarõserãmeĩ. Hai kyrypoti mbatyhava hyru ñyngareko’ihea, hareka ñomi’i mombohapyvarã. 7Haipe Jesús heishu Judas: Ma’ẽihe ko taupe! Shara hai natumbare mbai pishekatuva ara shõtỹharã pevarã. 8Kuareta pavetevare opa ara ñõĩpo piko hãndi, tẽvã she opa arããpo aiko pynypãũpe.

Ñemiãpeĩ ñee ñonoãhe Lazaro jukaha verã

9Heta’ẽ Judiore kuaava Jesús Betaniape’ẽrã, jyraha haipe hesha verãre Jesús hareka jyve Lazaro, Jesús mynguerajy vekua. 10Haipe pai juhuvishare pente ñeepẽĩ ñynoĩ juka verã jyve Lazaro. 11Shara hai rehe heta Judiovare ohovẽãma haykue, hareka jyrojahe reta Jesús.

Jesús iche Jerusalenpe

12Kuareta hetava jyraha tenta Jerusalenpe arete Pascua pevarãpe, pareemajyrã heta’ẽ kuaava Jesús vãhẽpo oujyve Jerusalenperã. 13Hãrã jasyja reta karãnday hoky jyraha hỹvãĩti reta Jesús hareka sapuke jyrerã hei: Yrỹmondojepeve, Ũrũtũpa! Tojehovasa Ñandeja heepe ouva! Tojehovasa Israel juhuvisha vasu! 14Jesús hesha pente mbirikarayrã jupihe, Tũpa ĩñee mbyparahavape heiva rãĩmi: 15“Avy pykyje tenta Sionpe’pẽiva! Pymãĩhe ouma punduruvishavasu, mbirikamire ou”. 16Jypyiterã mbo’ehareare kũããmba reta mbaivara he’ise kova jehu’õ. Tẽvã Jesús manorã hareka kuerajymarã, manduajyhe reta opaite kova mbai ikova Tũpa ĩñee mbyparahavape heiva rãĩmi opa iko. 17Opaite kuaretare Jesús ẽẽ hãndi vekuare, Lazaro hẽno ita jo’oavaivi hareka mynguerajyrã manovare mbyteivirã, haire opa mbeu heshava. 18Hãrã kuaretare õhẽ hỹvãĩtishu reta Jesús, shara haire kuaa mbaikavi heshaha verã hai japova. 19Tẽvã fariseore hei jyre ijupe: Pyheshama mbaiveamapo katu jajapo. Pymãĩhe, marãra opaite kuaretare jyraha hipii!

Tenta Greciape’õre heka jyre Jesús

20Jerusalenpe ohovare õmombai verã Tũpa Pascua aretepe, haire mbytepe’ẽjyve Greciavare. 21Kovare ñymbojahe Felipe, hai jyve tenta Betsaidava, Galileape’õ, jurureshu reta: Karai, pota rãnga heshahave Jesús. 22Felipe oho mbeushu Andres, hãrã mokuevea jyraha mbeushu Jesús. 23Jesús heishu reta: Vãhema ora kuareta Tay õmomba’eha verã. 24Ãñete hai pee, trigo hãỹ o’ã yvyperã hareka jaiãrã kyrãĩĩ pyta, tẽvã timity ñotyhãrã hareka jairã hẽñorã hetapo’ia. 25Hãrã ĩme’ẽ hykoveĩ haihuvevarã jyvarepohe, hipityãpo tykove opambava, tẽvã hykove haihumba hipitypo tykove opambava. 26Hãrã ĩme’ẽ pota japosheva haivarã, tou shaykue. Mãĩpi she ãĩvãpe, haipepo ĩme’ẽjyvekui japosheva aipotava, hareka Sheru õmombaivasuposhukui.

Jesús mbeu mano verã

27Ã’ẽ ajepy’apy ãĩ. Mbaivarapo ha’e? Hairapo: “Sheru mbyhasa shyhevi ko jepy’apy porãmba”? Tẽvã ha’ẽrãveara ai ajapo verã Sheru potava. 28“Sheru, heshaka nypyrãtãkue”. Haipe ñyhendu ñee vate araivi heiva: Aheshakama rãnga, tẽvã hykuaĩpo aheshakajy. 29Kuareta hetava haipe’õre hareka henduvare hokava ñee heijyre, hy’apuva rãnga, tẽvã ĩme’ẽjy heiva: Tũpa jokueva rãnga ijetashu Jesús. 30Jesús heishu reta: Ha’ẽã kova ñee shyrehẽĩ ĩñendukava, pyndyrehe rãnga. 31Ã’ẽ kuaretare yvy‘ĩãrẽ’õ mbivachehakapo, hãrã ko yvy’ĩãrẽ huvisharã’õ Ãña mohẽãpo katuape. 32Tẽvã shumupu’ãhãjyma yvy’ĩãrẽivirã, opaiteapo arujy shijupekui jyroja shyrehe verã. 33Kyrã Jesús mbeu kavishu reta marãrapo mano kurusure. 34Hãrã kuaretare heishu: Ore rãnga henduha Moisés mbypara vekua heiva Cristo hykove japymba verã. Marã’ĩrãra rere kuareta Tay hupiha verã kurusure? Akuarã mbavara kuareta Tay? 35Jesús heishu reta: Ĩmeteripo’ẽ pynymbytepe sape’ẽva, tẽvã kỹỹvẽãmapo. Pyvata pyrekoteri ko sape’õrã, mahẽ pyndysapyakui timimbiva; shara timimbivape ikovare kũãã mãĩpirapo oho. 36Ĩmeteri’ẽ pynymbytepe sape’õrã pirojahese, hai ryhevare iko pyndyhevi verã. Jesús kova opa heirã oho, ñemishi reta.

Judiore jyrojããhe Jesús

37Jesús heta japo mbaikavi heshaha verã haire hỹnonde, kyrãtẽvã jyrojãhe reta. 38Kyrã jehu iko verã Tũpa ĩñee mbeu’ia Isaias mbypara vekuape: Sheja, mbavara roja ñambeuva? Mbavapera ryheshaka nymbaikatukue? 39Hãrã kuaretare katuã roja, shara Isaias kyrã mbyparajy: 40Tũpa opa mỹhãvẽshi hesare hareka pya mytãtashi reta. Potãã hesha retarã hareka kuaa reta pyaperã, jyroja shyreherã oujy shykotyrã, hareka amynguera verãre. 41Isaias kyrã mbypara shara tynonde hesha Jesús hĩmbipekue, hãrã kyrã ijetahe. 42Tẽvã, heta Judio jyroja jyvehe Jesús, hareka huvishavare. Mbe’uã retarãmeĩ opavare hỹnonde, shara kyjeshi fariseore, potãã mohẽshu reta Judiore ñymbatyseaivirã. 43Haire potãĩ kuaretare mbyveteshu, Tũpa õmombaitẽ verãivi.

Jesús ou mondojepe kuaretare

44Jesús hỹnatu ijetarã hei: Shyrehe jyrojava ha’ẽã shyrehẽĩ jyrojava, jyrojajyvehe Sheru shymbou vekua. 45Hãrã shyreshava, heshajyve shymbou vekua. 46She hai sapeva ai vekua ko yvy’ĩãrẽ, opaite jyroja shyreheva ikoveama verã timimbivape. 47Ĩme’ẽ shiñee hendutẽva japombavarã, sheeãpo ajahehe. Shara she aĩã ko yvy’ĩãrẽ ajahehe verã kuaretare, koñeĩ she ai amondojepeshu verãre. 48Hãrã ĩme’ẽ shiñee mbijicheva hareka japombavarã, ĩmemare jahehe verã. Ñee she hai vekuapo jahehekui ara japyape vãhẽmarã. 49She shijuhuvireĩã aijeta, Sheru shymbou vekua meẽshe ñeẽ japoa verã haipo apyrỹmboihe. 50She aikuaa Sheru heiva hai tykove opamba pevarã. Hãrã opaite, Sheru heisheva rãĩmi hai’ãijyve.