John 13

Jesús joheshu mboireare ipy

1Arete Pascua serima’ẽvã, Jesús kuaa vãhẽma jy’ora ko yvy’ĩãrẽ, ohojy verã vate arapy Tuu ẽvãpe. Jesús haihuñõĩmba, hai mĩ’ĩrũre vekuare ko yvy‘ĩãrẽ’õre, hãrã ã’ẽ heshakashu reta hai heko jyhaihukue. 2Hãrã Jesús mboireare karuñynoĩ hãndivape, Ãña mijemaĩmba Juda Iscariote pyape, Simón tay, pysyka verã Jesús. 3Jesús kuaa opa mba’e Tuu ñono ipoperã, hai kuaa Tũpa ẽvãivi ourã hareka ohojy verã Tũpa ẽvãpe. 4Hãrã karuma ñynoĩrã Jesús pũã mesaivi, jasoiva hekyrã, ijokuapy toalla. 5Haivi ratonape yy ñonorã õñepyrõ joheshu mboireare ipy, hãrã toalla ijokua’ipya mitinijypy. 6Simón Pedro ipy johemapo’ẽshurã hai hei: Sheja, haira rijoheposhe shepy? 7Jesús heishu Pedro: Ã’ẽ rikũããteri ajapo’ãĩva, tẽvã ndei rikuaakavi. 8Pedro hei: Añonoã rãngaponde rijoheshe verã shepy! Jesús heishu: Ajohẽãnderã, haivẽãmapo ndekui shyryheva. 9Hãma Simón Pedro heishu: Sheja, akuarã avy shepyĩ joheshe, johe jyve shepore hareka shãka. 10Tẽvã Jesús heishu: Hairãã opa jahuva koñeĩpo ipyĩ johe, shara hai kyaveama’ẽ. Hãrã pee pyndykyaveama, tẽvã ha’ẽã opaĩ kyamba’õ. 11Jesús hei: “Ha’ẽã opaĩ kyamba’õ”, shara kuaa’ẽ mbavarapo pysykakui. 12Jesús opama mboireare ipy joheshurã mondejy mondeva ĩãrẽ’õ, haivi vapyjy mesaperã, heishu reta: Pikuaara ajapo pyndyreheva? 13Pee rãnga shymbyheepi “Pyrỹmboi’ia” hareka “Sheja”, haikavi rãnga kyrã pererã, shara haishe. 14Hãrã she, Pyrỹmboi’ia, hareka Peeja pepy ajoheperã. Kyrãpo pepenteĩ pijohe jyve pindijupe pepyre. 15She aheshakamape, ajapova rãĩmi pijapo verã jyve. 16Ãñete hai pee, katuã jokueharea vateve’ẽshi jokuerea, hareka katuã mondohava vateve’ẽshi mondokava. 17Pikuaa kavi kovarã, hareka pijaporã pyvy’apokui. 18Ha’ẽã opaĩ aijeta’ãĩ pyndyreheva; shara she aikuaa mbava retara apyhỹrõ. Tẽvã ikoñõĩpo Mbyparahavapy’õ heiva: “Karu’ẽ shendieva, ñymbyvaisho shyrehe”. 19Ã’ẽvãĩ hai pee ndeiteri ikorã, ikomarã pyroja verã She Ñoĩva. 20Ãñete hai pee, ãmondova myvãhẽ kaviva, shymyvãhẽjyve; hãrã shymyvãhẽva, myvãhẽjyve shymbou vekua.

Jesús mbeu Judas pysyka verã

21Kova opa heirã, Jesús ñandu pyape vyambavarã hei: Ãñete hai pee, pente pynymbyte’õpo shypysykakui. 22Haipe mboireare opa mãĩ ijehe, shara kuãã reta mbavara Jesús hei’ẽhe. 23Pente mboirea Jesús haihuveva, vapy’ẽ jichere karu ñynõĩrã, 24hãrã Simón Pedro mỹhã‘ãnga’ẽshu, pyrãndushu verã Jesús mbavara hei’ẽshu. 25Hãrã hai ñymbojavejyhe pyrãndushu Jesús: Yreja, mbavarapokui? 26Jesús heishu: Ãmãkypo kova pãhã pysẽvẽ, hãrã ameẽshua haipokui hokava. Haivi mãky pãhã pysẽverã meẽshu Judas Iscariote, Simón tay. 27Hãrã Judas pãhã pysevẽ hekymarã, Satanas iche pyape. Haipe Jesús heishu: Nareã japo rijapo verã. 28Tẽvã haipe mesape karu’ẽ hãndivare, mba’ety kuaava marã’ĩrãra kyrã heishu. 29Judas rãngamba kyrypoti hyru ñyngareko’ihea, hãrã ĩme’ẽ mõãte Jesús heishua oho ova verã mba’etyshuare Pascua pevarã, maĩrã, mẽmeẽshu verã maĩnunga pavetevare. 30Hãrã Judas pãhã pysevẽ opama hourã, ãrẽã õhẽ oho. Pyntumãĩmba.

Ñee py’ahuva japoa verã

31Judas ohomarã Jesús hei: Ã’ẽ, kuareta Tay heshakapo pyrãtãkue, hareka hai rupii Tũpa heshakapo pyrãtãkue ĩme’areva. 32Hãrã she aheshaka Tũpa pyrãtãkuerã, Tũpa heshakapo jyve marãra shypyrãta, hareka areãpo kyrã japokui. 33Shyrayre, kỹvẽãmapo ãĩme’ãĩ pynymbytepe, shyrekapopikui, hãrã Judiore haishua rãĩmi ã’ẽ haijyvepe: Aha verãpe katuãpo peho. 34Ahejape kova ñeẽ japoha verã py’ahuva: Pijyhaihupo. She apyryhaihuva rãĩmi, hãrã kyrãmipo pyhaihu jyve pepenteĩ yngavare. 35Pijyhaihurã, opaite kuaretare heshapo pyndyrehe, pee haiva she amboivare.

Jesús hei Pedro ñomi verã

36Simón Pedro pyrãndushu Jesús: Sheja, matyrapo reho? Jesús heishu: She aha verãpe, katũãpo ã’ẽ reho shaykue; tẽvã ha’ereipo rehokui. 37Haipe Pedro heishu: Sheja, marã’ĩrãra katũãpo ã’ẽ aha ndipikui? She ãĩjyve ãmano nendie verã! 38Jesús heishu: Ãñeteratẽ nde rẽĩ rỹmano shendie verã? Ãñeteĩte hainde, ndeiteri uru ñeerã, mbahapyjypo rerekui shykuambava.