John 14

Jesús rupii katu ñavãhẽ Tuu ẽvãpe

1Avy pejepy’apy, pirojahe Tũpa hareka piroja jyve shyrehe. 2Sheru hentape heta’ẽ pynyrẽndarã; kyrããrã, ãmbe’ũãmbapope, aha ãmyhẽvãpe verã pynyrẽndarã. 3Ahajyma opa ãñono kavi pynyrẽndarãrãpo aijy apyryrahakui, jaiko pãvẽĩ verã she aikovape. 4Pikuaa rãnga matyrapo ahajy hareka pikuaajy tape. 5Tomas heishu Jesús: Yreja, kuahãã rãnga matyrapo reho. Marãrapo kuaahajy tape? 6Jesús heishu: She hai tape, añeteva hareka tykove. She rupii katupo vãhẽha Sheru ẽvãpe. 7Shykuaapirã, pikuaapo jyveshu Sheru, hãrã ã’ẽ pikuama, shara pyheshapẽishu. 8Haipe Felipe heishu: Yreja, ma’ẽĩhe tyheshahave Nderu, hãrã haikavimatẽpove orekui. 9Jesús heishu: Felipe, kuriãã rãnga aiko ai penendie, hãmerã nde’iave shykuaa? Shyresha’ia reta rãnga, heshama jyve Sheru. Marã’ĩrãra rirureshe aheshakape verã Sheru? 10Ryrojããra Sheru hãndi pentevãĩ orerãme? Kova haipeva ha’ẽã shijuhuvirei haiva, Sheru iko’i shypyapeva rãnga japo. 11Shyroja rãngapopi Sheru hãndi pentevãĩ orerã, hareka Sheru shypyape’ẽvã, kova pyrojãarã opava maĩnunga ajapo vekuaĩ pyroja. 12Ãñete hai pee, jyroja shyreheva japopo jyvekui opa maĩnunga she ajapova, hareka hetavepo maĩnunga japokui, shara ahajypo Sheru ẽvãpe. 13Hãrã opaite maĩnunga shyreepe pirureva ameẽpope; Teru mbyvetehashu verã Tyray rupii. 14She ajapoñoĩpo maĩnunga shyreepe pirureva.

Jesús mbeu mbouñoĩ verã Espiritu Santo

15Shyraihupirã, pynatupo she haipeva. 16Hãrã airureposhukui Sheru mboupe verã, pente pynymbory verã hokava hai Espiritu Santo opa ara pinimi’ĩrũ verã. 17Hokava Espiritu Santo haipo pynymboihekui mbai añeteva, hãrã Tũpa jyrojambaheare katuãpo mẽ’ẽãshuhai, shara haire heshãã hareka kuãã. Tẽvã pee pikuashu shara hai ikoma’i penendie, hareka ikopo pyndypyape. 18Apyryrejããpo tuumbare rãĩmi, aijypo aiko penendiekui. 19Kõõima’ẽ, kuaretare shyreshaveama verãpe, tẽvã pee shyreshajypokui, shara ãmanoãpokui, hãrã pee pymano’ãĩpo jyvekui. 20Hoka arape pikuaapokui Sheru hãndi pentevãĩ orevarã, hareka pikova shypyape hareka she aikova pyndypyape. 21Henduva hareka japova she haiva, hokava hai ãñete shyraihuva, shyraihuva Sheru haihupo jyveshu, hãrã she ahaihupo jyve, hãmã aheshakaposhu marãvara she. 22Haipe Judas heishu Jesús (haimba Iscariote): Yreja, marã’ĩrãra oreĩpo rijeshakajy’ore, rijeshakããraposhu kuaretare? 23Jesús heishu: Shyraihuva japopokui she haiva, hãrã Sheru haihuposhu, Sheru hareka She ouhapo ikoha hãndi. 24Tẽvã shyraihumba, japoã she haiva. Hãrã pee pyhendupẽĩva ko ñee ha’ẽã shiñee, Sheru shymbou vekua ĩñee rãnga. 25Opaite kova mbai ambeu’ãĩpe, ãĩmẽteri’ãĩ penendierã. 26Tẽvã Espiritu Santo Sheru shyreepe mbou verã hai pynymbypya kavi verã, pynymbo’epo hareka pynymymandu’akahe verã opaite hai pee vekua. 27Ahejape pyavapy. Ameẽ pee shypyavapykue, ãmẽ’ẽãpe kuaretare meẽva rãĩmi. Avy pejepy’apy hareka avy pykyje. 28Pyhenduma rãnga hai’ãipeva ahajypo, tẽvã aijypo aiko penendiekui. Pee ãñete shyraihurã pyvy’aĩtẽ verã, shara pikuama ahajypo Sheru ẽvãperã mbaivasuve shyheviva. 29Ãmbeupe kova mbai, ndeiteri jehurã, ikomarã pyroja verã. 30Hetaveamapo aijetape, shara vãhẽma ou Ãña ko yvy’ĩãrẽ huvisha’õ. Hai mbaivapẽã jepy shyrehe, 31tẽvã kyrãñoĩpo jehu kuaretare kuaa verã jyve she ahaihushuva Sheru, hareka ajaposhu hai heisheva. Pupũa, jaha koivi!