Joh 15 | TpjSC | STEP | She hai uva jypy añeteva, hãrã Sheru hai ñyngareko’ẽhea.

John 15

Jesús hai uva jypy añeteva

1 She hai uva jypy añeteva, hãrã Sheru hai ñyngareko’ẽhea. 2 Hãrã pente hãka i’ãrã, jasyjashi; tẽvã iarã jasysyja hareka opa johe, hetave ia verã. 3 Pee rãnga pykyaveama, ko ñee ambeupe vekua rupii. 4 Pẽĩkatu shyrehe, hãrã she’ãĩpo jyve pyndyrehe. Shara uva hãkãkuereii katuãpo ia jypyre ẽ’ẽãrã; kyrã jyvepe peĩã shyreherã katuãpo mbai pijapo. 5 She hai uva jypy, hãrã pee hai hãkare. Hãrã ẽẽ shyreheva hareka she ãiheva rãĩmi, hetapo ia; shara shyrehembape mba’ẽãpo pijapo. 6 Hãrã ẽmba shyreheva, mombohapo hãka jipiva rãĩmi, mbatyha momboha verã tatape. 7 Pẽĩkatu jyve shyreherã, hareka pijapojyve she haivarã, pirurehe pipotava hãrã mẽ’ẽãpope. 8 Sheru õñemombaivasu jyve heta mbai pijapova rupii hareka kyrãrã ãñete iko pyndyhevi she amboi’areare. 9 Sheru shyraihuva rãĩmi, apyryhaihu jyve, hãme pikopo jyve jyhaihu ĩme’arevape. 10 Pijapo she haivarã, pikopo jyve jyhaihu ĩme’arevape, Sheru heiva opa ajaposhurã aiko jyhaihukue hai ĩmerevape. 11 Kyrã aijeta, pyvy’ãĩ shendie verã hareka pynytynyhẽ verã vy’akue. 12 Kova hai she haiva ameẽpeva: She apyryhaihuva rãĩmipo, pijyhaihu jyve. 13 Jyhaihu tivishaveva ĩmerea rãnga meẽva hykove ñi’ĩrũ retare. 14 Pee rãnga hai shi’ĩrũre, pijapo she hai peevarã. 15 She apyrỹmbyheeveamapo “jokueharea”, shara jokueharea kuãã hai jokue’õ japova. She apyrỹmbyhee “shi’ĩrũre”, shara opa ambeupe Sheru heishe vekuare. 16 Peeã shypyhỹrõpi, sheii rãnga apyrỹpyhỹrõ. She apyrỹmondo heta mbai pijapo verã hareka opareiimba ryheva. Kyrãrã Sheru meẽpope opa mba’e shyreepe pirureshua. 17 Kova hai pijapo verã: Pijyhaihu.

Yvy‘ĩãrẽ’iare pyndyreshatããpo

18 Kuareta yvy‘ĩãrẽ’iare pyndyreshatããrã, pynymanduapohe sherãni shyreshatãã retarã. 19 Pee haijyve, kuareta yvy‘ĩãrẽ’iare Tũpa jyrojambahea ryhevarã pyndyraihupo jyve, haire jyhaihuva rãĩmi. Tẽvã she apyrỹpyhyrõma yvy‘ĩãrẽ’õ retaivi, hãme rãnga kuaretare pyndyreshatãã, shara pikoveama haire ikova rãĩmi. 20 Pynymanduahe kova she hai pee vekua: “Mba’ety jokueharea vateve’ẽshia jokue’õ”. Hãrã pũã shyrehe retarã, pũãñoĩpo jyve pyndyrehe. Hãrã she haiva haire japorã, pee pereshuva japoñoĩpo jyve. 21 Opaite kova mbai japoñoĩpo pyndyrehe reta she rehe, shara kuãã reta shymbou vekua. 22 Hãma aĩã aijetashu retarã, haire mba’etytẽre verãre mbai porãmbava. Tẽvã ã’ẽ katuveama heky ijuhuvi reta mbai porãmba vekua. 23 Hãrã shyreshatamba’iare, Sheruave heshatãã jyve. 24 She aĩã ajapo mbaikavi heshaha verã haire mbyteperã, mba’etytẽre verãre mbai porãmbava hareka mbavamba katu japova. Hãrã haire ajemaĩ heshatẽ reta kova mbai, tẽvã shyreshatãã jyre hareka jyve Sheru. 25 Tẽvã kyrã jehu shara ikoñoĩpo ñee mbyparahava haire jykuatiape’õ: “Shyreshatããrei jyre”. 26 Tẽvã oupokui Sheru õĩvi pynymbypya kavi verã, hokava hai Espiritu Santo añeteva ryheva, hãrã hai ijeta kavipohekui Shyree. 27 Hãrã pijetapo jyvehekui Shyree, shara õñepyrõãivive shimi’ĩrũpi.