John 16

1She hai pee kova mbai potãã poi piroja shyreherã. 2Pymohẽãpokui Judiore ñymbatyseavi, hareka vãhẽpo ara mbava pindijukamarã, mõate haikaviva japova Tũpa pevarã. 3Haire kyrãpo japo, shara shykũãã reta hareka jyve Sheru. 4She hai pee kova mbai, ikomarã pynymanduahe verã ambeumapeva kova. Tẽvã jypyiterã ambe’ũãpe kova mbai, shara ãĩmeteri’ãĩ pynymbytepe.

Espiritu Santo japova

5Tẽvã ã’ẽ ahajypo shymbou vekua ẽvãpe, hareka mba’ety pynymbytepe pyrãndusheva matyrapo aha. 6Tẽvã kova mbai ambeuperã pynymbyvy’ã. 7Tẽvã añeteva ambeupe, haikavivepo ahajyrã. She ahããrã ouãpo Pynymbypya kavi verã; tẽvã she aharã, amboupokui. 8Espiritu Santo oumarã heshakaposhu kuaretare opaiteva haiva mbai porãmba japo’iare; hareka ĩme’õ pente heko kyambaa hape hareka Tũpa ñimbivache ryheva. 9Heshakaposhu haire haiva mbai porãmba’iare, shara jyrojãã shyrehe; 10heshakaposhu reta mbaivara hai tykove kyambava hape, shara ahapo Sheru ẽvãpe, hãrã pee shyreshaveãmapokui; 11hãrã heshakaposhu reta Tũpa ñimbivache ryheva, shara jaheamahe huvisharã’õ ko yvy’ĩãrẽ. 12Heta ĩme’are hai pee verã, tẽvã ã’ẽ katũãpo opa pikuaa. 13Tẽvã Espiritu añeteva oumarã, hai kuaakapope opava mbai añeteva; shara ijetããpo ijuhuvireii, heipo jyve opaite hai henduva hareka kuaakapope maĩnunga iko verã. 14Haipo she mombaivasukui, shara pysypo ameẽshu verã hareka kuaakapope. 15Opava Sheru ĩmereva sha’ãpova jyve; hãme rãnga hai peeje Espiritu pysypo ameẽshuva hareka pynymbykuaakapo jyve.

Vyambaa vekua ikoposhi vy’akue

16Vãhẽserima, shyreshaveamapi verãpe, tẽvã kutymijyapepo shyreshapijykui. Shara she ahajypo Sheru ẽvãpe ▼

▼Shara she ahajypo Sheru ẽvãpe: Kova ñee mba’ety arykai mbyparavape.

. 17Haipe Jesús mboireare pyrãndu ijupe: Mbaivara he’ise hokava? Hei ñande vãhẽserimava jaheshaveamashu verãpe, hareka kutymijyape jaheshajy verã. Shara hainda ohojypo Tuu ẽvãpe. 18Mbaivara he’ise “Vãhẽserima”? Jaikũããny marã’ĩrãra kyrã hei ñande. 19Jesús kuaa haire pota pyrãndu jyreshurã, heishu reta: She rãnga hai peeje vãhẽserima shyreshaveamapi verãpe, tẽvã kutymijyapepo shyreshapijykui. Haira hokava pypyrãndupi ijupe? 20Ãñete rãnga hai pee, pijaheopo hareka pyvy’ãpopi, kuaretare vyañynoĩ hairã. Pyvyambatẽvãra, pyvyamba vekua ikoposhikui vy’akue. 21Pente taupe membyma potarã heta mbyhasa’asy, shara vãhẽma ara hasyshu verã. Tẽvã sanjay oamarã, manduambajyheva hasykue. Shara vy‘aite’i veru pente sanjay yvy’ĩãrẽrã. 22Kyrãĩ jyvepe ã’ẽ pyvy’ãpẽĩ, tẽvã aijyma apyryresharã vy’akue pynytynyhẽpokui, pente vya mbavamba katu heky pyndyhevi verã. 23Hoka arape mbaiveamapo pypyrãndushekui, añetevape hai pee Sheru, meẽñoĩpopekui shyreepe pirureshuva. 24Ã’ẽpeve mba’ẽãteri pirure shyreepe; pirure hãma mẽ’ẽãpope pynytynyhẽ verã vy’akue.

Cristo ipope’ẽ kova yvy

25Ñee ñymyhã’ãngape rãnga aijeta’ãĩpe ã’ẽpeve. Vãhẽpokui ara ãñimiñeeveamape verã ñee ñymyhã’angape, ambeu kavipopekui Sheru ryheva. 26Hoka arape pirureposhukui shyreepe; hãrã ha’eãpe airure pyndyrehe verã Sherupe, 27Sheru teiva rãnga pyndyraihu. Shara shyraihupirã hareka pyroja she aiva Tũpaivi. 28She ãhẽ Sheru ẽvãĩvi hareka ai ko yvy’ĩãrẽ, hãrã ahejapojy ko yvy, ahajypo Sheru ẽvãpe. 29Hãma mboireare heishu: Ã’ẽ rãnga rijeta kavirẽĩ, ñee ñymyhã’ãngape, hãrã kuaa kavima. 30Ã’ẽ kuaahama opa mba’e rikuaava, hareka rikotẽveã mbava mbai pyrãndu nde. Hãrã rojaha reiva Tũpaivi. 31Jesús heishu reta: Ãñeterã ã’ẽ pyrojama? 32Vãhẽma ara, ã’ẽvãĩ opa pimomohẽ verã, hareka shẽĩpo shyrejapikui. Tẽvã, ha’ẽã sheiĩ ãĩva shara Sheru aĩ hãndi. 33Opaite kova mbai ambeupe pyndypya vapy verã piroja shyreherã. Hetapo pyhasa’asy ko yvy’ĩãrẽ, tẽvã avy pykyje, shepopema rãnga’ẽ ko yvy.