Joh 17 | TpjSC | STEP | Jesús opa hei kovarã, mãĩ vate ararerã hei: Sheru, a’ẽ vãhẽma ara nde shymbyvete verã, Ndyray nymbyvete verã jyve.

John 17

Jesús ñymboi’ĩãrẽ mboireare

1 Jesús opa hei kovarã, mãĩ vate ararerã hei: Sheru, a’ẽ vãhẽma ara nde shymbyvete verã, Ndyray nymbyvete verã jyve. 2 Nde rãnga opa rĩñono kuaretare Ndyray ipope, meẽshu verã tykove opambava opaite jyrojaheare, hareka rymeẽshu vekuare. 3 Hãrã kova hai tykove opambava; ndykuaa verãre nde haiva koñeĩ’õ Tũpa añeteva hareka jyve Jesucristo, rymbou vekua. 4 She rãnga arỹmbyvetema ko yvy’iãrẽ hareka opa ajapo nde rỹmeẽ she vekua ajapo verã. 5 Ã’ẽ, Sheru, hykuaĩ shymbyvetejy rẽĩvape, hareka meẽshe mbaikatu ĩme’are vekua aiko ai nendierã, ndeiteri ko yvy ẽẽrã. 6 Opaiteva nde rỹmeẽshe vekua kuaretare mbyteivi aikuaakashu reta mbavara nde. Hai reta rãnga na’ãpo vekuare hãrã rỹmeẽshe, hãme rãnga haire japo niñee. 7 Ã’ẽ haire kuaa opa mba’e rỹmeẽshe vekua, ndyhevi ouva, 8 she ambeushu reta niñee rikuaakashe vekua, hãrã haire roja. Kuaama reta ãñetẽĩte ndyhevi aiva, hareka roja reta nde shymbouva. 9 She airurehe nde jyroja ndyreheva rỹmeẽshe vekuare. Airureãhe nde kuaretare jyrojamba ndyrehevare, nde rỹmeẽsheva reta reheĩ airure, shara hai na’ãpovare. 10 Opaite ĩme’arevare hai jyve na’ãpova, hareka ĩmeryreare hai jyve sha’ãpova; haire rupii heshaha she vateve ãĩva. 11 She rãnga ãĩmeveamapo’ãĩ ko yvy’ĩãrẽ; tẽvã haire ĩmeteripo’ẽ ko yvy’ĩãrẽ, hãrã she ahapo nde rẽivape. Sheru heko Kyambava, ñyngarekohe reta nymbaikatukuepy nde rỹmeẽshe vekuare, pente ñeepejyre verãre ñande jaikova rãĩmi. 12 She ãĩme’ãĩ hãndi reta ko yvy’ĩãrẽrã, ãĩngarekohe ndyreepe rỹmeẽ she vekuare, hareka ãingarekohe reta. Hãrã mba’ety hairetava kañy shyheviva, koñeĩ pente kañy, hekope kavi iko verã mbyparahavapy’õ heiva. 13 Ahamapo rẽĩvape, hãrã ambeu kova mbai ko yvy’ĩãrẽivi ndei ãhẽrã, haire vya verã jyve she rãĩmi. 14 She rãnga ambeushu reta niñee, hãrã kuareta yvy‘ĩãrẽ’õ jyrojamba ndyrehevare mymorãã reta, shara haire ha’ẽã ko yvy‘ĩãrẽ’õre, she rãĩmi ha’ẽã jyve reta ko yvy‘ĩãrẽ’õ. 15 Airureã nde ryheky verãre ko yvy’ĩãrẽivi, ñyngarekõĩheshi reta mbai porãmbava. 16 She ha’ẽã ko yvy‘ĩãrẽ’õ, hãrã haire ha’e ãĩ jyve yvy‘ĩãrẽ’õ. 17 Mbijiche reta na’ãporã añetevape; niñee añeteva rupii. 18 Nde shymbouva rãĩmi kuaretare mbytepe ko yvy’ĩãrẽ, kyrã ãmondo jyveshu reta kuaretare mbytepe ko yvy’ĩãrẽ. 19 Hai reta reheĩ rãnga añymyngy’ã, haire kyamba verã jyve añeteva rupii. 20 Ha’ẽã kova retareĩ airurendeva, airure jyvehende mbairã jyroja shyrehe verãre, henduma haire mbeuvarã. 21 Airurehende haire pente pyapẽĩ ñynõĩ verã; tiñymypenteĩ ñanendie reta, Sheru shyrehe rẽĩvã rãĩmi, hareka ndyrehe ãĩmeva rãĩmi. Kyrã tõĩ reta pente pyape, hãrãpo kuaretare roja nde shymbouva. 22 She ambyvete reta, nde shymbyveteva rãĩmi, ñymypenteĩ verãre, ñande ñañymypenteĩva rãĩmi. 23 She ãĩhe reta, hãrã nde rẽi jyve shyrehe, haire ñymypente kavi verãjyve, kyrãpo kuaretare kuaa nde shymbouva, hareka ryhaihushuare shyraihuva rãĩmi. 24 Sheru, nde rỹmeẽshevare, aipota haire ẽẽ jyve she ãĩ verãpe, hesha verãre hĩmbipeva rymeẽsheva; shara nde’iaveteri ko yvy ẽrãvãĩ nde shyraihu. 25 Sheru hekope kavi rĩpirĩmbivacheva, kuaretare yvy‘ĩãrẽ’iare ndykuãã; She arykuaa hareka amboi’areare kuaa nde shymbouva. 26 She aikuaakashu reta mbavara nde, hareka aikuaakave teriposhu reta, jyhaihu ĩmeryre shyreva ẽhe verãre, hareka she hai retare ãĩjyve.