Joh 2 | TpjSC | STEP | Mbahapy arajyape iko omendava Canápe tenta Galileape’õ. Jesús ishy haipe’i jyve.

John 2

Pente omendava Canápe

1 Mbahapy arajyape iko omendava Canápe tenta Galileape’õ. Jesús ishy haipe’i jyve. 2 Jesús hareka mboireare hãndi mbe’uha jyveshu oho verãre. 3 Hãrã vino mba’etymashu retarã, Maria heishu Jesús: Opamashi reta vino! 4 Jesús heishu: Taupe, marã’ĩrãra kyrã rereshe? Nde’iave rãngateri vãhẽ shy’ora. 5 Hãrã Maria heishu haipe jokueha’õre: Opaite pijaposhukui hai heipeva. 6 Haipe ẽẽ 6 kambushi yy hyru, Judiore ijoherã poryseva, haire ohohea japoseva rãĩmi. Pepenteĩ 100 litro rupi javeva. 7 Jesús heishu jokueha’õre: “Opa pymynyhẽ yy kova kambushire”. Haivi opa mynyhẽ reta. 8 Jesús heishu reta: “Ã’ẽ mĩshĩĩ pynohẽ, pyrahashu karuvasu ñyngareko’ẽhea”. Hãrã kyrã japo reta. 9 Haipe karuvasu ñyngareko’ẽhea hãã yy vino japoashiva, kuamba ryheve mãĩvira nohẽhã kova vino, jokueha’õ retaĩ kuaa, shara haire nohẽ yyvi. Hãrã karu vasu ñyngareko’ihea hẽno tẽmerã. 10 Hãrã heishu: Opava reta rãnga ñonokuei vino kapyryva karuvasu õñepyrõmarã, haivi hẽnohãkavare hetama hourã, ñonohãkuei vino porãnungambava. Tẽvã ndemba rỹnatu vino kapyryva ã’ẽpeve verã. 11 Kova heshaha verã Jesús japova Caná yvy Galileape hai tynondeite japova. Kyrã heshaka ñymbaikatukue hãrã mboireare jyrojahe. 12 Haivi Jesús oho tenta Capernaumpe, mĩ’ĩrũshu ishy, tyvyre hareka mboireare; haipe mbovy ara pyta reta.

Jesús mohẽ tũpaovi mba’ova hareka mavẽnde’õre

13 Vãhẽserima Pascua Judiore jy’areterã, Jesús oho tenta Jerusalenpe. 14 Haipe tũpaope hesha õvende’õre vaka, avisha, pykasu, hareka okambia ñynõĩva kuaretare jykyrypoti ynga tenta vasuivi veruvare, vapy ñynoĩ ñymesa retape. 15 Jesús hesha hokavarã, heky pente tukumbu, hãrã opa mohẽ reta tũpaovi hũmba ryheve avisha hareka vaka. Mbijaparashi kyrypoti okambia’õre ñymesarã, opa ityshi jykyrypotire yvype. 16 Pykasu õvende’õ retape hei: “Kovare pynohẽ koivi! Avy pijaposhi Sheru hoo mba‘ovaha’ẽ ipea!” 17 Haipe mboireare manduahe kuatia Mbyparahavape heiva: “Ndero ahaihuiterã shyposhykue tata rãĩmi vejy shyrehe”. 18 Haipe Judiore pyrãndushu: Marãva mbaikavi heshaha verãrapo ryheshaka’ore, kuaaha verã ĩmeryreva mbaikatu kyrã rijapo verã? 19 Jesús heishu reta: Opa pymambai ko tũpao, mbahapy arapepo ãmupũãjykui. 20 Haipe Judiore heishu: 46 ãño rãnga japohare kova tũpao mupu’ãhã verã kova tũpao; hãmera nde mbahapy arapẽĩpo rũmupũãjykui? 21 Tẽvã tũpao Jesús ijetahea hai, ha’i hete. 22 Hãrã Jesús kuerajyma manovare mbyteivirã, mboireare manduahe hei vekuare, hãrã roja reta kuatia Mbyparahavapy’õ hareka Jesús heiva.

Jesús opa kuaa kuaretare pyape’ẽvã

23 Jesús ĩme’ẽ Jerusalenpe Pascua areteperã, heta’ẽ jyrojaheare shara hesha reta mbaikavi heshaha verã hai japova. 24 Tẽvã Jesústeiva rojãã reta, shara hai opa pyrykuaa. 25 Ikotẽvẽã mbe’uashu verã marãvã kuaretara, shara hai opamba kuaa kuaretare pyape’õ.