Joh 20 | TpjSC | STEP | Semana ara tynondeheape, kõ’ẽĩ pỹntuteriva, Maria Magdalena oho tã’õvẽ ẽvãpe Jesús ñonoãvape; hãrã hesha ita jo’oava juru mbotyhapya mbysyryama.

John 20

Jesús kuerajy

1 Semana ara tynondeheape, kõ’ẽĩ pỹntuteriva, Maria Magdalena oho tã’õvẽ ẽvãpe Jesús ñonoãvape; hãrã hesha ita jo’oava juru mbotyhapya mbysyryama. 2 Haipema ñani oho Simón Pedro ẽvãpe, hareka Jesús mboirea haihuva’õpe, heishu reta: Ñandeja hetekue nohẽãngamba rahaha ita jo’oavaivi, hareka jaikuãã mãĩpira ñonoha! 3 Haipe Pedro hareka ĩrũ Jesús mboirea jyraha tã’õve ẽvãpe. 4 Mokue’õre jyvacheĩ ñani jyraha; tẽvã ĩrũ mbo’ehareare ñakuaveshi Pedro, hãrã tynonde vãhẽ ohoshi tã’õvere ẽvãpe. 5 Jyroa mãĩ’irã hesha savana ñomahapy vekua haipe’ẽ, tẽvã icheã hapype. 6 Haivi haykuei vãhẽ oho jyve Simón Pedro, iche ita jo’oava hapyperã, hai heshãĩ jyve savana ñomahapy vekua haipe’ẽrã. 7 Pedro heshajy Jesús ñakã ñomahapy vekua mba’ety hãndi jokuahapyare, tẽvã mbapu’aha yngaity ñonohajy. 8 Haivi iche jyve Jesús mboirea ĩrũ. Tynondeite vãhẽ oho vekua tã’õve ẽvãpe, haipe hesha kavite iko vekuarã, rojama. 9 Kova mbai ndei ikorã, haire kuaa kaviããmba Mbyparahavapy’õ heiva rãĩmi, Jesús kuerajy verã manovare mbyteivi. 10 Haipema mõkue’õ Jesús mboireare jyverujy hentape.

Jesús ijeshakashu Maria Magdalena

11 Maria Magdalena katuapẽĩ pyta hairã, ita jo’oava hyvache jaheo’i, hãrã jaheo ryheve jyroa mãĩ ita jo’oa vekua hapype. 12 Hãrã hesha mõkue Tũpa jokueva mondeva tĩĩ kaviva, vapy ñynoĩ Jesús hete ñonõha vekuape; pente ñaka kyty hareka ĩrũ tyma kyty. 13 Hãrã Tũpa jokuevare pyrãndushu: Taupe, marã’ĩrãra rijaheori? Hai hei: Sheja rãnga rahaha, hãrã aikuãã mãĩpira ñonoha. 14 Opaĩ kyrã hei, mãĩ haykuerã haipe hesha Jesús, tẽvã kuããmba haiva. 15 Haipe Jesús pyrãndushu: Taupe, marã’ĩrãra rijaheori? Mbavara ryheka? Maria mõãte kuimbai yvoty ñyngareko’ihearã, heishu: Sheja, nde ryraharã mbeushe mãĩpira ryheja, ahajypo aru. 16 Haivi Jesús heishu: Maria! Hãrã Maria jerepyrã Hebreo ĩñeepe heishu: Raboni! (He iseva “Pyrỹmboi’ia”). 17 Jesús heishu: Avy poko shyrehe, shara nde’iave ajupijy Sheru ẽvãpe. Tẽvã ekua mbeushu shyryvyre, ajupijy verã Sheru ẽvãpe, hai jyve Peru. Hokava hai shu Tũpa hareka jyve punu Tũpa. 18 Hãrã Maria Magdalena oho mbeushu reta Jesús mboireare, hareka hai heshava Ñandejape, opaite Jesús heishu vekua rãĩmi mbeu.

Jesús ijeshakashu mboireare

19 Hokava Domingo arape pỹnturã, Jesús mboireare ñymbaty reta. Haipe õche mboty reta shara kyje jyreshi Judio juhuvishare. Haivi Jesús ou haire mbyteperã, marãndushu retarã hei: Pyndypya kaviteño! 20 Haipe mbyheshaka reta ipo hareka jiche kutua vekuape. Hãrã mboireare heshajyma Ñandeja Jesucristorã vy’aite jyre. 21 Haivi Jesús heishu reta: Pyndypya kaviteño! Sheru shymondova rãĩmi, she apyrỹmondo jyve. 22 Haipe Jesús mboireare peju ĩãrẽrã, heishu: Ameẽpe Espiritu Santo. 23 Hãrã papisha pyhejareishi mbai porãmba japo vekuarã, Tũpa hejareiipo jyve pyndyhevi. Tẽvã pyheja reĩãrã, Tũpa heja reĩãpo jyve pyndyhevi.

Tomas hareka Jesús

24 Tomas hai 12 Jesús mboireare penteva, mbyheavajy “mõkuepya”, õĩãmba hãndi reta, Jesús ijeshakajyrã. 25 Haivi mbo’eharea ĩrũre heishu Tomas: Ore heshahaje Ñandeja! Tẽvã Tomas hei: Aheshãã koravo kuarekue iporerã, hareka aminjeã shepo kuarekueperã, hareka aminjeã shepo jiche kutuha vekuaperã, arojãã’ãĩteipo. 26 Hãrã 8 ara jyape, Jesús mboireare hykuãĩ ñymbaty py’aujy pente oope, haipe Tomas ñynõĩma jyve hãndi reta. Õche opate mbotya kaviva, Jesús ou haire mbytepe, marãndushurã hei: Pyndypya kaviteño! 27 Jesús heishu Tomas: Minje ndepo inti kope koravo kuarekuepe, hãrã mãĩ shepore, hareka minje ndepo shiche kutuha vekuape. Ỹteñomapo mbai ryrojãã iko, ryroja rãngapo! 28 Haipe Tomas hei: Sheja, hareka shu Tũpa! 29 Jesús heishu: Tomas, shyreshamarãra shyroja? Vy’apo opaite jyroja vekuare, shyreshambatẽãre.

Ko kuatia mbai verãra mbyparaha

30 Jesús japomba heta mbaikavi heshaha verã mboireare hỹnonde, ñonõãmba vekua ko kuatiape. 31 Tẽvã kovare ñonoha pyroja verã Jesús haiva Cristo, Tũpa tay, pirojaherã ĩmepyre verã tykove opambava hai heepe.