Joh 21 | TpjSC | STEP | Kova mbaijyrã, Jesús hykuãĩ ijeshakajyshu mboireare yyvasu Tiberia hymbeype. Kyrã japo:

John 21

Jesús ijeshakashu 7 mboireare

1 Kova mbaijyrã, Jesús hykuãĩ ijeshakajyshu mboireare yyvasu Tiberia hymbeype. Kyrã japo: 2 Opaĩ ñynõĩ penteapeĩ Simón Pedro, Tomas mbyheeavajy mokuepya, Natanael tenta Caná Galileape’õ, Santiago hareka Juan Zebedeo tayre, ĩrũ mõkue Jesús mboireare hãndi. 3 Simón Pedro heishu reta: Ahapo aipyraka. Haire heishu: Ohoapove ndipi. Jyraha retarã jupi pente kanoape; hãrã hoka pyhare mba’ẽã nohẽ reta. 4 Kõĩma’ourã, Jesús vãhẽ ou yyvasu hymbeype, tẽvã mboireare kuãã haiva. 5 Jesús pyrãndushu reta: Shi’ĩrũre, pynohẽrate pira? Haire heishu: Mba’ety. 6 Haivi Jesús heishu reta: Pymombo pyndypysa kanoa jakata kyty, hãrãpo heta pynohẽkui pira. Hãrã kyrã japo reta, mombopy reta jypysarã katuã nohẽjy yyvi, shara hetaite pira oapyrã. 7 Haipe Jesús mboirea haihuva heishu Pedro: Ñandeja rãnga! Simón Pedro henduma “Ñandeja rãnga” heivarã, mondejy mondevarã, opopy yy, shara nanitei’i. 8 Ĩrũ mbo’eharea retany vãhẽ jyraha kanoa ryheve yyvasu hymbeype, mbytyryry raha reta pysa tynyhẽ’õ pira yyvasu hymbeypeve, 100 metro ñynoĩshi yy hymbey. 9 Hãrã vejy kanoaĩvirã hesha reta tata hendy’õ, ñonohã’ĩãrẽ pira hareka pãhã. 10 Haivi Jesús heishu reta: Peru kope pira, kuri pynohẽva. 11 Simón Pedro jupi kanoaperã mbytyryry raha pysa tynyhe’õ pira marẽrẽyvã yy hymbeypeve, hãrã 153 pira ẽẽpy pysa, tẽvã osoã. 12 Haivi Jesús heishu reta: Pei perãmbosa. Tẽvã mbavãã mboireare pyrãndushu mbavara hai, shara kuaa reta haiva Ñandeja. 13 Haivi Jesús ñymbojarã heky pãhãrã meẽshu reta, kyrãĩ japojy pira. 14 Kova hai mbahapyhea Jesús ijeshakajyshua mboireare, kuerajy manovare mbyteivirã.

Jesús ijeta hãndi Pedro

15 Opa karu retarã, Jesús pyrãndushu Simón Pedro: Simón, Jonas tay, shyraihuvera kovaivi? Simón Pedro heishu: Aryraihu rãnga Sheja, nde rikuaa kavi aryraihuva. Jesús heishu: Akuarã ñyngarekohekui shy’avishare. 16 Jesús hykuãĩ pyrãndujyshu: Simón Jonas tay, ndera shyraihu? Pedro heishu: Aryraihu rãnga Sheja, nde rikuaa kavi aryraihuva. Jesús heishu: Ñyngarekohekui shy’avishare. 17 Haipe mbahapyhea Jesús pyrãndujyshu: Simón, Jonas tay, ndera shyraihu? Pedro mbyvy’ã, mbahapyitema pyrãndushurã. Hãrã hei: Sheja nde rãnga opa mba’e rikuaa. Rikuaa kavi she aryraihuva. Haivi Jesús heishu: Ñyngarekohekui shy’avishare. 18 Añetevape hai nde, arykai nukunumi terirã, rẽĩ kavirã pota rehova kyty reho, tẽvã rykuakuamarã rỹmysymyĩpo ndijyva, hãrã yngava retapo nimimonderã ndyrahakui natẽỹ rehova kyty. 19 Kyrã Jesús mbykuaaka, Pedro marãrapo mano, hareka õmombaivasu Tũpa. Haivi Jesús heishu: Ei shimĩ’ĩrũ!

Jesús mboirea haihuveva

20 Pedro jerepyrã hesha oho jyre haykue mbo’eharea Jesús haihuveva, karu ñynoĩrã vapy’i hyvacheva hareka pyrãndu’ishu vekua: “Yreja, mbavara yrỹmbyteivi ndypysykapokui?” 21 Pedro heshamarã, pyrãndushu Jesús: Sheja, kovara mbaiva ikopohe? 22 Jesús heishu: She aipotarã hai ĩmeĩteripo’ikui, aijypeve. Mbaivara nde hokava? Nde, ei shimi’ĩrũ. 23 Hãrã mbe’uha opaite Jesure jyrojavare mbytepe, hokava mboirea manombahai verã. Tẽvã Jesús he’iambashu manombahai verã, kyrãreii heishu: “Aipotarã ĩmeĩteripo’ikui, aijypeve. Mbaivara nde hokava?” 24 Jesús mboirea haihuva hai ijeta’ẽheva kova mbai, hai mbypara kova kuatia. Hãrã jaikuaa opaiteva heiva añeteva. 25 Heta’ẽjy yngava mbai haikaviva Jesús japo vekua mbyparahambava kuatiape. She pevarã ko yvy’ĩãrẽ javeãpo kuatia pepenteĩpo mbyparaharã. Amén.