John 3

Jesús mboi Nicodemo

1Ĩmemba’ẽ pente kuimbai fariseore mbytepe Nicodemo he’iashua, Judiore juhuvisha penteva. 2Pente pyhare oho Jesús ẽvãperã heishu: Pyrỹmboi’ia, kuaaha rãnga Tũpateiva nymbou ỹrỹmboi verãrã, heshara mba’ety katu japova ko mbaikavi heshaha verã nde rijapova, Tũpa ẽã hãndirã. 3Hãma Jesús heishu: Añeteĩteva hai nde, oa py’ahujymba, katuãpo hesha Tũpa ẽvãpe. 4Nicodemo pyrãndushu: Marãrapo pente kuimbai kuakuamava oa py’ahujy? Icherapojy ishy hyepe oa py’ahujy verã? 5Jesús heishu: Añeteĩteva hai nde, oa py’ahujymba yy hareka Espiritu rupii, katuãpo iche Tũpa ẽvãpe. 6Opaite tyro’oivi oava, hai tyroo; hãrã oava Espirituivi, espiritu jyve. 7Avy kyje kyrã hainderã: “Rea py’ahujyñoĩpo”. 8Yvytu rãnga peju pota pejua kyty, rỹhendu mbyhy’apurã, tẽvã rikuãã mãĩvira ou hareka mãtyra oho. Kyrã jyve opaite Espirituivi oavare. 9Haipe Nicodemo hykuãĩ pyrãndujyshu Jesús: Marãrapo iko hokava? 10Jesús heishu: Nde rãnga hai pyrỹmboi’ia kuaakatuva Israelpe, hãmera marãĩpo kova mbai rikua’ã? 11Ãñeteĩte hai nde, ore mbe’uha kuaahava, hareka kuaahakape ore hashahava; tẽvã pee pyrojãã mbe’uhapea. 12Ko yvy‘ĩãrẽ’õ ryheva aijetaheperã shyrojããpirã, marãrapo pyrojajy aijetahepe mbai ara vate’õ ryhevarãme? 13Mba’ety jupiva vate arapy, haivi vejy vekuãĩ rãnga; jaishu kuareta Tay. 14Moisés mũpũãva rãĩmi yvy ikoambaipi mboi hã’ãnga bronceivi japoava, kyrãĩpo mũpũ’ãhã jyve kuareta Tay, 15opaite jyrojaheare reko verã tykove opambava.

Tũpa jyhaihukue kuaretare pevarã

16Shara Tũpa haihuite kuareta retarã, meẽ Tay pente’ia, opaite jyrojaheva potãã manorã, koñeĩ ĩmere verã tykove opambava. 17Tũpa mbouã Tay yvy’ĩãrẽ jyvarehe verã kuaretare, hai rupii ohojepe verãĩ rãnga. 18Tũpa tay jyrojahea, jyvarehãpohe; tẽvã jyrojambahea jyvareapohe, shara rojãã Tũpa Tay penteĩ’ia. 19Jyrojambare jyvareamahe, shara mbai porãmba japo jyrerã, sapeva yvy’ĩãrẽ outẽã, timimbivaĩ pya ohovehe reta sapevaivi. 20Opaite mbai porãmba japo’iare, mymorãã kõĩvãpe’õ, hareka ñymbojããhe reta kõĩvã shara potãã heshaha mbai porãmba japo’irã. 21Tẽvã mbai añeteva japo’iare ñymboja kõĩvape, opaiteva hesha verã Tũpa heishua japorã.

Juan Bautista ijetajyhe Jesús

22Haivi Jesús oho hãndi mboireare yvy Judea kyty, haipe pyta hãndi reta mbovy ara, hareka myngarai’i kuaretare. 23Juan pyrỹmyngarai’ẽjyve Enonpe, Salim hyvache, shara yy heta’ẽ haipe. Kuaretare jyraha ñymyngaraika haipe. 24Kova mbaire iko ndeiteri Juan rahaha mbyperesoarã. 25Haipe Juan mboireare õñepyrõ hehei jyre ijupe hãndi pente Judio ijoheva ryheva rehe. 26Haivi haire oho heishu Juan: Pyrỹmboi’ia, kueve yy syryva Jordan hyvache rikori hãndi vekua, hareka rijeta kavirihea, ã’ẽ pyrỹmyngaraima’i jyve hareka opavare ou hai ẽvãpe. 27Juan heishu reta: Mba’ety maĩnunga ĩmere verã Tũpa mẽ’ẽãshurã. 28Peeteiva rãnga shyrẽndupi kyrã hairã, “she ha’ẽã Cristo, hỹnonderã mbouhavãĩ rãnga she”. 29Omendava ikovape tyrekorã ĩmerea hai temerã; hareka temerã ñi’ĩru haipe’ẽ hendu ijeta’ẽherã mbyvy’aite. Kyrãĩ jyve she avy’aite ãĩ jyve. 30Hai rãnga vatevepo oho’i ñymbaikatukue ryheve, tẽvã she avejyvepo aha.

Vate araivi ouva

31Vate araivi ouva rãnga, opavare ĩãrẽ’ẽ. Kuaretare yvy‘ĩãrẽ’õ, yvy‘ĩãrẽ’õvãĩ ijetahe; tẽvã vate araivi ouva opavare ĩãrẽ’ẽ. 32Hai mbeu heshava hareka hendu vekua; tẽvã mba’ety rojava. 33Tẽvã ĩme’ẽ rojavarã, my’ãñete Tũpa heiva, 34shara Tũpa mbou vekua ijetahe Tũpa ĩñee, shara Tũpa opaĩ meẽshu jy Espiritu. 35Tũpa rãnga haihu Tay, hãrã opa mba’e ñono hai ipope. 36Hãrã Tyray jyrojaheva ĩmemare tykove opambava; tẽvã Tyray rojambava, hipityãpo hokava tykove, koñeĩpo hipity ñunũpa pohyva Tũpaivi ouva.