John 4

Jesús hareka taupe Samariape’õ

1Fariseore kuaa Jesús mbyhetave hai mboireare hareka hetave pyrỹmyngarai Juan Bautistaivi. 2Ajemaĩ Jesús haimbate pyrỹmyngaraiva, mboirearetaĩ japo. 3Jesús kuaama hokavarã, õhẽ Judeaivi, ohojy Galileape. 4Hãma ohojyrã hasañõĩpo Samariaipi. 5Ohomarã vãhẽ oho tenta Sicar he’iashuape Samariape, Jacob tay José hejashu vekua yvy hyvache. 6Haipe’ẽ poso Jacob ña’ãpo vekua; Jesús kangyrã, poso hyvache vapy, ndose serima’ivape. 7Haipe vãhẽ ou pente taupe Samariape’õ nohẽ verã yy posoivi, Jesús heishu: Tauve mishĩĩ ndy’yy. 8Jesús mboireare jyraha tentape hou verã ova verãre. 9Haipe taupe Samariape’õ heishu Jesús: Marã’ĩrãra nde Judiova rirureshe yy, she Samariape’ãĩvã? (Shara Samariape’õre ijetããmba hãndi Judiore) 10Haipe Jesús heishu: Rikuaa Tũpa meẽvarã, hareka mbavara jurure’i nde yy, nde riruretẽshu verã hareka hai meẽtẽ nde verã yy meẽva tykove. 11Taupe heishu: Sheja, mba’ety rãngaryre rynohẽpy verã yy, hareka kypevãĩ’ẽjy poso, maĩvirapo rỹnohẽkui hokava yy meẽva tykove? 12Yreru Jacob rãnga heja’ore ko poso, haiteiva hou hãndi tayre hareka hũmbare. Ndera mbai vasuveshi hai? 13Jesús heishu: Opaite houva kova yy, hykuãĩpo ju’uhejykui; 14tẽvã yy ameẽva houva, ju’uhe veamapokui. Shara ko yy she ameẽ verã, yy õhẽ’õ rãĩmipo’ẽkui pyape, meẽshu verã tykove opambava. 15Haipe taupe heishu: Sheja, meẽveshe hokava yy shu’uheveama verãve, mãhẽ hykuãĩ ai ãnohẽ ãĩjykui ko posoivi. 16Jesús heishu: Ekua mbeushu neme, hareka eii hãndikui kope. 17Taupe hei: Shemẽã rãnga aishe. Haipe Jesús heishu: Haikavi rãnga rere mba’ety ryreva neme; 18shara pandepomaryre nemekue, hãrã ã’ẽ ryrekoryrea ha‘ẽ’ãĩjy nemeĩte; añeteva rãnga rere. 19Hokava taupe hendurã heishu: Sheja, hainymbashe nde haiva Tũpa ĩñee mbeu’ia. 20Yrỹtynondeva Samaritanokue reta rãnga õmombaivasu Tũpa ko yvyturusure, tẽvã pee Judiore pere Jerusalenpe õmomba’eashu verã. 21Jesús heishu: Nde taupe, shyroja, vãhẽserima ara mbaveama ou verã ko yvyturusure õmombaivasu verã Tũpa, hareka oho verã Jerusalenpe. 22Pee samaritano reta rãnga pemombai pikuambavape; tẽvã ore Judiova õmomba’eashu kuaahava; shara Judio retaivi ou pyrỹmondojepeva. 23Tẽvã vãhẽma ara, ã’ẽvãĩpo ãñẽtẽite õmombai’iare Tũpa, õmombaishu verã Espiritupy hareka añetevape. Shara Tũpa kyrã pota õmomba’eashu. 24Tũpa hai Espiritu, hãrã õmombai’ishuare õmombaipo jyveshu Espiritupy hareka añetevape. 25Haivi taupe heishu Jesús: She aikuaa jyve ou verã Mesia, Cristo he’iashua; hai oumarã opa mbaipo mbeu kavi orekui. 26Jesús heishu: Hai rãnga she Mesias, rijetarẽĩ hãndiva. 27Haipe vãhẽjy ou mboirea retarã mbyrymaĩhe hesha taupe ijeta’i hãndirã. Tẽvã mbavẽã pyrãndushu mbaivara pota, maĩrã, mbaivarera ijeta’i hãndi. 28Haivi taupe heja ñykambushirã, oho tentape heishu kuaretare: 29Pei pymãĩhe pente kuimbai opaite kuaava ajapo vekuare. Ha’ẽãra kova Cristo? 30Hãrã kuaretare õhẽ tentaivirã, oho maĩhe reta Jesús. 31Haipe mboireare hei jyvyĩshu reta: Pyrỹmboi’ia, karumitẽvẽ mĩshĩ. 32Tẽvã Jesús heishu reta: Ĩme rãnga’are maĩnunga hau verã, pee pikuambava. 33Haivi mboireare õñepyrõ pyrãndujyre ijupe: Veruharambashuje hou verã? 34Jesús heishu reta: Shĩmbiu hai ajaposhu shymbou vekua potava, hareka opa ajaposhu verã hai heiva. 35Pee rãnga pere: “Urũndy jasyteri hemby’ẽ myno’õhã verã ñotỹava’ia”, tẽvã she hai pee, pymãĩhe ñotyãvare opama javyje, myno’õhã verãima’ẽ. 36Hãrã ñotyãvã’ia mynovã mẽ’ẽhãshu japova hepykue. Ko ñotyãva’ia myno’õhãvã rãnga hai tykove opambava pevarã, kyrã vyapãvẽĩ verã ñimĩtyva hareka ñotỹava’ia mynovã. 37Ãñete rãnga ko ñee heiva: “Pente’ẽ ma’ẽtyvarã, ĩrũre mynõjy”. 38She apyrỹmondo pymynõõ verã peemba piñotyva; yngava reta rãnga heta mba’apohe, hãrã haire ñotỹ vẽkua pymynõ’õĩmapo. 39Heta kuaretare Samariape’õ jyrojahe Jesús taupe heiva rupii: “Opaiteva rãnga mbeusheje ajapo vekuare”. 40Hãrã Samaritanore vãhẽ jyraha Jesús ẽvãperã jurureshu reta pyta verã haipe; hãrã pyta haipe mokue ara, 41hãma hetave’ẽ jyrojaheare shara hairetateima hendu Jesús ĩñee. 42Hãrã heishu reta taupe: Ã’ẽ haiveama nde rerevãĩ rojahava. Shara oreteima henduha hai heiva, hareka kuaahama añeteĩteva hai Cristo; opaite kuareta yvy’ĩãrẽ iare mondojepe verã.

Jesús mynguera huvisha tay

43Mokue arama hasarã, Jesús õhẽ Samariaivirã ohojy Galileape. 44Shara Jesús teiva hei, Tũpa ĩñee mbeu’ia mymorãhãã ha’i hentape. 45Vãhẽma jyraha Galileaperã haipe’õre horype myvãhẽ, shara haire jyraha jyve Pascua areterã Jerusalenpe; hareka hesha reta opa mbai Jesús japo vekua aretepe. 46Haivi Jesús oujy Caná Galileape, yy, vino japoshi vekuape. Haipe ĩme’ẽ jyve pente huvisha, tay ñymbairasyva tenta Capernaumpe. 47Huvisha kuaama Jesús oujy Judeaivirã, hareka Galileape ĩmema’ẽjyrã, oho hai ẽvãpe jurureshu oho verã hai hentape, hareka mynguerashu verã tay, mano verãima’õ. 48Haivi Jesús heishu: Pee pyheshãã heshaha verã hareka mbaikavi heshaha verãrã, pyrojããpo. 49Tẽvã huvisha hei jyvyĩshu: Sheja, ãrẽ‘ãĩte’ei ndei shyray manorã. 50Haipe Jesús heishu: Ekuajy nyrẽntape, ndyray manoãpo. Ko kuimbai roja Jesús heishuarã, ohojy hentape. 51Hãrã vãhẽjymapo oho hentaperã, jokuehareare õhẽ hỹvãitirã heishu: “Ndyray, kuerama”. 52Haipe pyrãndushu reta mbai orapera tay õñepyrõ haikavijy’ẽ, haire heishu: Kã’ãme ka’arurã pente horaheape rãnga opashi ñãka hasykue. 53Haipe sanjay tuu manduahe hokape kavi Jesús heishua: “Ndyray manoãpo”. Hãrã hai hareka hoope’õre, opaiteva roja reta Jesús. 54Kova hai mokuehea mbaikavi heshaha verã Jesús japo vekua, oujy Judeaivi Galileaperã.