John 8

Pente taupe ynga mãĩ’ijyhea

1Haivi Jesús ohojy yvyturusu Olivope. 2Hãma paremajyrã kõ’ẽĩ oujy tũpaope. Heta kuaretare ou hai ẽvãpe, haipe vapyrã mboishu reta. 3Haipe Moisés mbypara vekua pyrỹmboi’iheare hareka fariseore rahashu reta pente taupe, yngava kuimbai iko’ijy hãndirã heshahava. Veru ñono reta hetava mbytepe. 4Hãrã heishu reta Jesús: Pyrỹmboi’ia, ko taupe rãnga heshaha ynga jyrekomava pokojyherã. 5Moisés mbypara vekuape rãnga hei kyrãvã taupe, itape japiha verã manopeve. Ndera marã rere jyve? 6Haire kyrã pyrãndushu hããshu verã retaĩ. Tẽvã Jesús jyroarã õñepyrõ yvyre mbypara. 7Haivi hykũãiñote pyrãndujyshu retarã, ñãka mupũãrã hei: Ĩme’ẽ pynymbytepe mbai porãmba japombavarã, hai rãni tynonde tijapi itape. 8Haivi jyroajyrã õñepyrõ mbyparajy yvype. 9Henduma reta kovarã, pepenteĩ õñepyrõ ohojy, tynonde kuakuaitevevare opajy oho. Hãrã Jesús hã’ẽĩ ĩme hãndi haipe taupe. 10Jesús ñãka mupũãrã pyrãndushu: Taupe, matyra opa oho? Mba’etymara pota ndukava? 11Taupe heishu: Sheja, mba’ety. Haipe Jesús heishu: She jyve aipotã rỹmano. Ekuajyvy ãtẽñoma japokui mbai porãmbava.

Jesús hai sapeva ko yvy’ĩãrẽ

12Jesús ijetajyshu kuareta retarã hei: She hai sapeva ko yvy’ĩãrẽ, ĩme’ẽ shimi’ĩrũvarã rekopo sapeva meẽvã tykove, hãrã ikoveamapo pyntuape. 13Fariseore heishu: Nde rãnga ndeei rijetari ndijehe, hãrã mbaivapeã haikavi. 14Jesús heishu reta: Sheeitẽ aijeta shijehevara, añetevaĩ hai. She rãnga aikuaa mãĩvira ai hareka matyra aha. Tẽvã pee pikuãã. 15Pee pijeta porããñoĩhe papisha kuaretare pya mbijetava rãĩmi ko yvy’ĩãrẽ. Tẽvã she mbaveã aijeta porããhe. 16Hãrã ajaporã, hekope kavi ajapo, shara sheiã ajapo. Ẽẽ jyve shendie Sheru shymbou vekua. 17Ñee mbyparahava pyndykuatiape rãnga hei: “Ĩme’ẽ mokue mbai heshava penteva rãĩmi mbeu retarã, añeteva hai hokava ñee”. 18Hãme rãnga she hai mbai heshava she pevarã, hareka Sheru shymbou vekua jyve ĩrũ mbai heshava she pevarã. 19Hãrã pyrãndushu reta: Maperã ĩme’ẽ nderu? Jesús heishu reta: Pee shykuããpi, hãrã pikuãã Sheru. Shykuapirã pikuatẽ verã jyve Sheru. 20Kyrã Jesús ñimiñee tũpaope, Tũpape mẽ’ẽãva kyrypoti hyru hyvache. Tẽvã mbavẽã raha mbypereso, shara vãhẽãteri jy’ara.

Pee katuãpo peho, she aha verãpe

21Jesús heijyshu reta: She rãnga ahapo, hãrã shyrekapopikui. Tẽvã pymanopokui mbai porãmba pijapo vekuapy; pee pehoãpo, she aha verãpe. 22Hãrã Judiore heishu: Ha’eirapo ijukakui kova, hãmeãra hei ohovape katumba jaha verã? 23Jesús heishu reta: Pee rãnga hai ko yvy‘ĩãrẽ’õ, tẽvã she hai vate arapy’õ. Pee hai kuareta yvy‘ĩãrẽ’õre, tẽvã she ha’ẽã yvy‘ĩãrẽ’õ. 24Hãme rãnga haipeje pymanopo mbai porãmba pijapo vekuapy. Shara pyrojãã She haiñoĩvarã, pymanopokui mbai porãmba pijapo vekuapy. 25Haipe pyrãndushu reta: Mbavara nde? Jesús heishu reta: Tynonde rãnga ambeupeje. 26Heta mba’e rãnga ĩme’are hai pyndyrehe verã, hareka ahesha pyndyrehe heta mba’e porãã piniñonorã, shymbou vekuany añetevaĩ hei, hãrã she ambeushu kuaretare, hai ĩñee ãhendushi vekua. 27Tẽvã haire kuããmba Jesús Tuu ijetaheshu retarã. 28Hãrã Jesús heishu reta: She, Kuareta tay rãĩmi ai vekua ko yvy’ĩãrẽ shiñonomapi kurusurerã, pikuaapokui “She haiñoĩvarã”, hareka she ajapoã maĩnunga shijuhuvi; kõñeĩ ambeu Sheru shymboihe vekua. 29Shara shymbou vekua ĩme’ẽ shendie; Sheru shyrejãã shẽĩ, shara ajapoñoĩshu hai potava. 30Hãrã Jesús kyrã ijetarã, heta’ẽ jyrojahea.

Tũpa tayre, hareka mbai porãmba japo’iare

31Jesús heishu Judio jyrojaheare: Pijapo katu shiñeerã, ãñeteĩtepo haipekui amboi’areare. 32Pikuapokui añeteĩteva. Hãrã añeteĩteva opapo pindijorashi mbai pyndyrekova ipope. 33Haire hei: Ore rãnga hai Abraham tayre, mapeã mbava ipope yryre. Marã’ĩrãra rere ore irijoraha verã? 34Jesús heishu reta: Ãñete hai pee, opaite mbai porãmba japo’iare, iko mbai porãmbava ipope. 35Pente jokuehareirea rãnga pytãã manopeve jokuerea hentape. Tẽvã oo ija tay pytañoĩpo haipe manopeve. 36Hãme rãnga, Tay pindijora mbai porãmba vekuaivirã, ãñeteĩtepo pindijorahakui. 37She rãnga aikuaa Abraham tay peerã; tẽvã pota shukapi, shara pateỹ mymyvãhẽ shiñee. 38She ambeupe opa mbai Sheru shymbyheshaka vekua; tẽvã pee pijapo jyve peru pyhendushi vekua. 39Haire heishu Jesús: Abraham hai yreru! Hãrã hai heishu reta: Ãñete Abraham tay retaperã, pijapotẽ verã jyve hai japova. 40Tẽvã pota shukapi, ambeupe ñee añeteva Tũpa shymboihe vekuarã. Tẽvã Abraham mapeãmba kyrã japo aryka’e. 41Tẽvã peru japova rãĩmikati pijapo jyve. Haire heishu Jesús: Ore ha’ẽã ĩmerãẽã tay, penteĩ rãnga’ẽ yreru, hai Tũpa. 42Jesús heishu reta: Tũpa ãñete hai Perurã, shyraihutẽpi verã; shara Tũpaivi ai, hãrã kope ãime’ãĩ. Aĩã shijuhuvii, Tũpa rãnga shymbou. 43Marã’ĩrãra pikuãã kova mbai ambeupeva? Shara potãã pyhendu shiñee. 44Ãña rãnga hai peru, hai ryheva retape hareka potaĩ pijapopishu hai potava; Ãña õñepyrõaivive rãnga hai puruka’ia. Hai japu, hareka he’iavãĩjy añeteva. Hai ijetarã mba’ety vekuaĩ mbeu, japu verãĩ kuaa, shara hai apu tuu, hãrã mbijapu jyve kuaretare. 45Hãrã añeteva she haiperã, katuã shyrojapi. 46Mbavara pynymbytepe heshakaposhe mbai porãmba ĩme’areva? Añeteva hai peerã, marã’ĩrãra shyrojããpi? 47Tũpa ryhevare hendu kavi Tũpa ĩñee; tẽvã shyrẽnduseãpi shara ha’ẽãpe Tũpa ryhevare.

Cristo ĩmemaĩ’ẽ hai Abraham ndeiteri’ẽrã

48Hãma Judiore heishu Jesús: Añeteva rãnga he’ia, he’ia nderã, nde hai Samariape’õ, hareka mbaiposhy ĩmeryre. 49Jesús mbyhovaishu reta: Mba’ety rãnga’are mbaiposhy. She ambyvete Sheru, tẽvã pee shymbyveteãpi. 50She aipotãã mbava shymbyvete; tẽvã ĩme’ẽ hekava hareka hai ẽ shendie. 51She añeteva hai pee; shiñee japova, manoveãmapo. 52Haipe Judiore heishu: Ã’ẽ kuaa kavima nde mbaiposhy ĩmeryrerã! Abraham, hareka Tũpa ĩñee mbeu’iare opama mano, hãmera rere ore: “Shiñee japova, manoveamapo”. 53Ndera mbaivasuveshi yreru Abraham? Arykai Tũpa ĩñee mbeu’iare hareka Abraham opama mano reta. Mbavara roja nde haiva? 54Jesús heishu reta: Mbaivarapo ambijehu sheii aijeta kavi’ai shijeherãme? Ijeta kavi shyreheva hai Sheru, pee pere jyvehe punu Tũpa. 55Tẽvã pee pikuããshu, tẽvã she aikuaashu; hãrã she hai aikuambashuarã, shapupo jyve pee rãĩmi. Tẽvã aikuaa kavishu, hareka ajapo hai ĩñee. 56Pynytynondeva Abraham, vy’a heshapo’ẽ shy’ararã. Hãma heshamarã hai vy‘aite’i. 57Hãma Judiore heishu Jesús: Nde’iave 50 ãño ryre, hãmera rere’ore yreru Abraham ryheshava? 58Jesús heishu reta: Ãñete hai pee, she ĩmemaĩ aiko arykai ndeiteri Abraham ikorã. 59Hãrã haire ita heky japishu verã Jesús; tẽvã hetavare mbytepe ñemirã õhẽjy oho tũpaovi.