John 9

Jesús mynguera pente kuimbai oarãvãĩ heshamba kũvãipia

1Jesús hasa oho tentaipirã, hesha pente kuimbai oarãvãĩ heshamba kũvãĩpi vekua. 2Mboireare pyrãndushu Jesús: Pyrỹmboi’ia, marã’ĩrãra ko kuimbai oarãvãĩ heshãã kũvãĩpi? Tuure mbai porãmba japo jyrerãra, maĩrã, ha’i mbai porãmba japo’irãra? 3Jesús heishu reta: Ha’ẽã hai hareka tuure mbai porãmba japo jyrerã; ko kuimbai kyrã oa Tũpa ñymbaikatukue heshakahe verã. 4Kõĩ terirã ajapo ñõĩpo shymbou vekua potava; shara vãhẽpo pỹntu verãpe, hãrã mbaveamapo mba’apo. 5Ãimeteri’ãĩ ko yvy’ĩãrẽrã, she hai sapeva kuaretare pevarã. 6Jesús opa hei kovarã myndyvy yvype, japo tuju hỹndajype, haivi heshamba kũvãĩpia hesare ñonoshu. 7Haipe heishu: Ekua jyvai yy noovã Siloepe (he’iseva: “Jokuehava”). Heshamba kũvãĩpia oho jyvai, hãrã oujyrã heshama kũvãĩpi. 8Hãrã henta juri’õre, hareka heshãterijyrã hesha vekuare hei jyre ijupi: Ha’ẽãra ko kuimbai vapy jururetẽ ishu vekua kyrypoti haipi hasavare? 9Hãma ĩme’ẽ heiva: Hai rãnga. Ĩrũre hei jyve: Ha’eã rãnga, ova vekuaĩ rãnga. Kuimbai heshamba’i kũvãĩpi vekua hei: Hai rãnga she. 10Haipe pyrãndu jyreshu hoka kuimbai: Marãira ã’ẽ ryheshajy kũvãĩpi? 11Hai heishu reta: Kuimbai Jesús he’iashua rãnga japo tujurã ñono shyresare. Hãrã heishe: “Ekua jyvai yy noovã Siloepe”. Aha aivairã haipe ravĩĩ ahesha kũvãĩpi. 12Haivi pyrãndujyshu reta: Mapera ĩme’ẽ hoka kuimbai? Hãma heshamba’i kũvãĩpi vekua heishu reta: Aikuãã rãnga.

Fariseore ijeta hãndi heshamba kũvãĩpi vekua

13Haivi raha reta heshamba kũvãĩpi vekua fariseore hỹnonde. 14Putu’uava jy’arape Jesús japo hoka tuju, hãrã mynguera heshamba kũvãĩpia. 15Hai rehe fariseore pyrãndujyshu hoka kuimbai heshamba kũvãĩpi vekua: Marãra ryheshajy? Hai heishu reta: Jesús ñono tuju shyresare, haivi aivairã; ã’ẽ aheshajy kũvãĩpi. 16Haipe ĩme’ẽ fariseore heiva: Ko kuimbai kyrã japo vekua ouã Tũpaivi, shara mbyharuã putu’uava jy’ara. Tẽvã ĩrũre hei jyve: Marãrapo mbai porãmba japo’iarã, japo kova mbaikavi heshaha verã? Hairehe pente ñeepẽã ñynõĩrã opa jyvavy reta. 17Hãrã pyrãndujyshu reta heshamba kũvãĩpi vekua: Hãmera nde mbaiva rere jyvehe kuimbai nymby heshakajy vekua? Hai hei: She haihe haiva Tũpa ĩñee mbeu’ia, Tũpa mbouva. 18Tẽvã Judiore juhuvishare rojããjyre kuimbai heshamba kũvãĩpia hareka ã’ẽ kueramava. Hãrã hẽnoka reta myngueraha vekua tuu hareka ishy. 19Hãrã pyrãndushu reta: Haira pindijapo kova kuimbai, pereheva oarãvãĩ heshamba kũvãĩpia? Marãĩra ã’ẽ heshajy? 20Ko kuimbai tuu hareka ishy hei reta: Kuaaha rãnga hai ĩrĩjaporã; hareka oarãvãĩ heshãã kũvãĩpi. 21Tẽvã kuahãã marãra ã’ẽ heshajy hareka mbavara mynguera. Pypyrãndushupe, hai rãnga sanjayveama hareka katuma ijeta ijehe. 22Ko kuimbai tuure kyrã hei kyjeshi Judio retarã, shara iñiñono mãĩmba reta pente ñeepe, mohẽ verã Judiore ñymbatyseaivi ĩme’ẽ heiva Jesús haiva Cristo. 23Hokava rehe kuimbai tuu hareka ishy hei: “Pypyrãndushupe, sanjayveama rãnga”. 24Haivi hẽnojy reta kuimbai heshamba kũvãĩpi vekuarã, heishu: Tũpa hỹnonde mbeu añeteva; ore kuaaha hoka kuimbai hai heko porãmbavarã. 25Tẽvã hai heishu reta: She aikuãã hoka kuimbai haira heko porãmba’ia. Pente mba’ẽĩ koñeĩ she aikuaa, she aheshãã kũvãĩpi tẽvã ã’ẽ aheshajyma. 26Hãma hykũãĩ pyrãndujyshu reta: Mbaivara japo ndyrehe? Marãra mynguera ndyresa? 27Kuimbai heshamba kũvãĩpi vekua heishu reta: Hetama rãnga ãmbeupeje, tẽvã shyrojããpi. Mbai verãra pipota hykuãĩ ãmbeujype? Potara ikojyve pyndyhevi hai mboire verã? 28Hãma Judiore juhuvisha hehei jyreshu hareka heishu reta: Nde rãngapokui hoka kuimbai mboire verã. Moisés mboire vekua rãnga ore. 29Ore kuaaha Moisés Tũpa ijetashurã; tẽvã hokavaivi, ouvaivĩmba kuaahava. 30Haipe ko kuimbai heishu reta: Marãpijy akorã! Pikuããmba maĩvira ou, tẽvã shymynguera. 31Jaikuaa rãnga Tũpa henduãshu mbai porãmba japo’ia retarã; koñeĩ hendushu jyrojahea, hareka ĩñee japoshuva. 32Mapeã rãnga henduha mbava mynguera pente kuimbai oarãvãĩ heshamba kũvãĩpiva. 33Ko kuimbai ouã Tũpaivirã, mba’ẽã rãngapo japo. 34Haipe haire heishu: Nde rearãvãĩ nytynyhẽ vekua mbai porãmba. Potara rei ỹrỹmboirẽĩ? Hãrã mohẽ reta Judiore ñymbatyseaivi.

Heshambare kũvãĩpia hykovepe

35Jesús kuaama kuimbai heshamba kũvãĩpi vekua mohẽã Judiore ñymbatyseaivirã; hesharã heishu: Rirojarahe kuareta Tay? 36Hai heishu: Sheja, mbeushe mbavara hai, airojahe verã. 37Jesús heishu: Ryheshama rãngarẽĩ. She hai, rijetarẽĩ hãndiva. 38Hãma kuimbai ĩñesu Jesús hỹnonderã heishu: Airoja ndyrehe, Sheja. 39Haivi Jesús heishu: She ai, ko yvy’ĩãrẽ kuaretare hesha ijehe verã mbai porãmba japo vekua; heshamba kũvãipiare heshajy verã, hareka hesha’iare heshaveama verã kũvãĩpi. 40Fariseore haipe’ẽ hãndivare hendu reta kovarã pyrãndushu Jesús: Orera ha’ẽĩ jyve kũvãĩpi heshambava? 41Jesús mbyhovai: Pee hai jyve heshamba kũvãĩpiarã, mba’etytẽpyre verã mbai porãmba vekua. Tẽvã pere pyheshapiarã, oapo pẽãrẽ mbai porãmba pijapo vekua.