Jude

Ñymarãndu

1 Judas, Jesucristo jokuerea Santiago tyvy, ambyparashu opaite Tũpa Teru haihuvare hareka hẽnova, Jesucristo ñyngareko jyvehe reta. 2 Tymyvãhẽ heta jyparekokue, pyavapy hareka jyhaihukue.

Pyrỹmboi’ia japurei’iare

3 Shyryvyre ahaihuva, pota rãnga ambyparape verã ñanymondo jepeva ryheva ĩmejareva; hareka ã’ẽ añandu tekotẽve ajapo airurepe piñyhãã pirojakuepe haikavi verã penteĩ me’ẽãshu vekua heko kyambare, 4 shara ñymbytavy rupiima ã’ãmo kuareta iche pynypaũpe porãmbava. Haire yngai mbeujy Tũpa pyakavikue heijyre Jesucristo haimba Ñandeja koñyjareva hareka ña’ãpova, hãrã japoi jajaposhu verã heiva. Pya mbijeta reta, Tũpa ñandyraihuiterã, jahembaa ñandyrehe verã mbai porãmba jajaporã. Ajenynga, heta arama he’ihahe kuatia Tũpa ĩñeepe jaheañoĩhe verã hokava kuaretare. 5 Ajema pee pikuamatẽva, aipota apyrỹmymanduajyhe Ñandeja mondojepe henta nohẽ Egiptoivi hareka opa jyvarehe Tũpa jyrojambaheare. 6 Hareka Tũpa jokueva ẽẽmba vekuare õĩ verãpe, koñeĩ opa heja reta ha’eire hoo, Ñandeja mbypereso ñono timimbiape hareka opa ara ñimbivacheha ara vãhẽmarã. 7 Kyrãĩ iko jyvehe Sodoma hareka Gomorrape’iare, opaite tenta hyvache’iare. Haipe ikojyreare mbai porãmba japo hareka opa mbai japo kyava ryheva japombaatẽ verã. Hãrã Ñandeja jahehe reta hareka mombo tata ovemba’õpe, haipe hasa’asy verãre. Kyrã kova mbai hejaha opaite ñanymanduahe verã. 8 Kyrãpo iko jyvehekui opaite aijeta ãĩhevare, shara porãmba pya mbijetaheva rupii hete myngya, mbijiche reta Tũpa ñymbaikatukue hareka ijeta porãhe Tũpa jokuevare arapy’õ. 9 Miguel, Tũpa jokueva juhuvishateiva kyrã japo jyve Ãña ñyrãrõ hãndirã vekua, hekyshi verã Moisés hetekue, tẽvã jaheãhe, koñeĩ heishu: “Ñandeja tijahe ndyrehekui”. 10 Tẽvã kova kuaretare kuaakavimba retaave ijeta porãhe. Haire mymba rãĩmi jyre, opa mbai kuaa tẽvã kuaakaviã retarã ha’eire jyvare ijehe. 11 Tengapo retakui! Shara Caín rãĩmi jyre, hareka Balaam rãĩmi kyrypoti pota retarã mbyry javy, hareka ñee henduã retarã Core rãĩmipo opa mano. 12 Kova hai ñanymymarãva karuvasu pijapova piroja handivare, ñymbyu hareka karu reta mbaimba kuaaseva. Ha’eire ñyngareko ijehe. Ova ãvãpyntu jy’yymbava, yvytu kokoty rahava; ova yvyra jy‘arapemba’iava, hapo ryheve nohẽãrã opa jipi. 13 Hãma ova reta yy ñarõva, mbytyryjuva maĩnunga japova pyrỹmymarãkava, jasytata hape javyva rãĩmi mondohapo timimbiva opamba’õpe. 14 Kova retare rãnga Enoc ijeta jyve, kuimbai 7 hea, Adan heirã vekua: “Pymaĩhe, Ñandeja heta ou hãndi jokuevare, 15 ou jahehe verã opaiteva hareka jyvarehe verã mbai porãmba japo’iare, hareka opaite Ñandeja ijeta porãmba’iheare”. 16 Kova kuaretare opava mbyposhyka hareka ijetareii, koñeĩ haire potavaĩ pota japoashu, myporãjyvyĩ ijeta reta pota maĩnunga me’ẽãshu retarã.

Ñymbarakuaa Jesús jyrojaheare pevarã

17 Tẽvã pee, shyryvyre ahaihuva, pynymanduahe ñee Ñandeja Jesucristo jy Apostolre mbeupe vekua. 18 Hai reta rãnga heipe: “Ara japyape vãhẽserimarã, ĩmepo’ẽ kuaretare ñymbyhoryva mbai haikavivare hareka porãmbavaĩpo pota japo”. 19 Kova reta rãnga opa ñanimbijao, haire potavaĩ japojyre, shara mba’etyre Espiritu Tũpaivi ouva. 20 Tẽvã pee shyryvyre ahaihuva, piñymypyrãtakatu pirojakue kyamba ĩãrẽ hareka pirure Espiritu Santo rupii. 21 Piko Tũpa jyhaihupy, pyhãrõteripẽĩ ara Ñandeja Jesucristo jyparekokue ryheve meẽpe verã tykove opamba. 22 Jyroja nungambare, pymykyrẽyshu jyrojave verã. 23 Yngavare, pynohẽ tataivi hareka pymondojepeshu; ĩrũ retape pypareko jyve kyje ryheve, mondevare ojaheva hoo potava myngyava, hokava pivaruposhi.

Mbyrahe opahea Tũpa pevarã

24 Tũpa ñyngarekopohe potãã mbai porãmbape pearã hareka ĩmerejy mbaikatu pẽĩ verã hai hỹnonde mbai porãmba mba’etypyrea ryheve. Vy’apepo pẽĩ hỹnondekui hareka kyambape, pente mondeava py’ahuva rãĩmi. 25 Hãrã japyraheposhu Ñanymondojepe’ia koñeĩ’ia. Jesucristo rupii Ñandejape, opa kuaa vateve’ẽvã, ñymbaikatuva hareka hĩmbipeva. Japyraheshu Tũpa opaite kova rehe, ã’ẽ hareka opa arape. Amén.