Luk 12 | TpjSC | STEP | Haipe kuareta hetava ñymbatyjy, pypỹrõ vasĩ ijehe. Hãma Jesús õñepyrõ ijetashu mboireare: Pĩngareko pijeheshi fariseore imereva harina mby’ouka, hova mokueva ryheva.

Luke 12

Jesús pyrỹmboihe hapishatamba ryheva

1 Haipe kuareta hetava ñymbatyjy, pypỹrõ vasĩ ijehe. Hãma Jesús õñepyrõ ijetashu mboireare: Pĩngareko pijeheshi fariseore imereva harina mby’ouka, hova mokueva ryheva. 2 Shara mba’ety ñemiva heshahamba verã; maĩrã mba’ety ñemiape’õ kuaamba verã. 3 Hokavare, opaite pỹntuape pereva, kõĩvapepo hẽnduajy; opaite oo’ipẽĩ pere vekua papysape, oo ĩãrẽ vivepo sapukepe mbe’uhajy.

Mbavaivirapo kyjeha

4 Pee shi’ĩrũre ahaihuva hai pee: Avy pykyjeshi tyreteĩ jukava, shara hokava’ĩãrẽve katuã mbaivee japo pyndyrehe. 5 Ambeupo pee mbavaivirapo pykyje: Pykyjeshi katu hekyva pyndykove, haivi rekova mbaikatu piririty verã tata vasupe; She hai pee, pykyjeshi hokava. 6 Mẽ’ẽhãra kueĩpi 5 vyra mokue nikere kuemireĩ? Katynga Tũpa sareãshi reta. 7 Hãma pee, pãkahaave Tũpa pepenteĩ opa papa. Hãrã avy pykyje; shara pee mbai vasuveshi vyra retaivi.

Jesús hee mbeuva hareka ñomiva kuaretare hỹnonde

8 She hai pee, opaite shymbeuva kuaretare hỹnonde, ko kuareta Tay mbeupo jyvekui Tũpa jokuevare hỹnonde. 9 Tẽvã ĩme’ẽ shiñomiva kuaretare hỹnonderã, ñomihapo jyvekui Tũpa jokuevare hỹnonde. 10 Hãrã ĩme’ẽ ijeta porãmbaheva Kuareta Tay, Tũpa hejareiiposhu; tẽvã Espiritu Santo jahe’ihea ha’eã hejareiishu verã. 11 Pyrahaha Judiore ñymbatyseape, karai vasure hareka mburuvishare hỹnonderã, avy pejepy’apy marãrapo hareka mbaivara perepo pymaĩ hỹnonde verã; 12 shara haipevãĩpo Espiritu Santo pynymboihekui pere verã rãĩmi.

Jesús ijetahe iko katuva katẽỹva

13 Hetava mbyteivi pente kuimbai heishu Jesús: Pyrỹmboi’ia, mbeushu shichey timbijaoveshe sha’ãporã, yrerukueamy heja’ore vekua. 14 Haipe Jesús heishu: Nde shi’ĩrũ, mbavara shiñono pynymbytepe Kuareta Pirĩmbivacheka’ia maĩrã hejaha vekua mbijao’i verã? 15 Heijyshu reta: Pymãĩ hareka pirykyje, avy piko mbai pipotareivape! Shara tykove õĩãhe maĩnunga hetava kuaretare imerea. 16 Haivi Jesús mbeujyshu reta ko ñee ñymyhã’ãnga: Ĩmemba aryka’e pente kuimbai iko katuva, jy’yvype ñotyva õhẽ kavishurã, heta mỹnõõ. 17 Haipe iko katuva pya mbijetarã hei: “Mbaivara ajapopo?” Mba’ety ãnãtu verãpe añoty vekua. 18 Haivi hei: Aikuama ajapo verã: Opapo ambai oo shimĩtyre anatũseape, ajapojy verã tivishave’õ haipepo anatukui kova shimĩtyre hareka opaite ĩme areare. 19 Haipepo hai shyrykovepe: Nde shyrykove, heta mbai ĩmeryre nãtũava heta ãño pevãrã; putu’u, karu, ñymbyu, vy’a! 20 Tẽvã Tũpa heishu: Nde tykove kuamba’ia! Ko pyharepo rỹmano; rỹnãtuvare, mbava pevarãrapokui? 21 Kyrã rãnga jehushu hai pevarãĩ heta mbai mbaty’ia, tẽvã mba’ẽã ĩmere Tũpa hỹnonde.

Tũpa ñyngarekohe jyrojaheare

22 Haivi Jesús heishu mboireare: Hãrã hai pee: Avy pejepy’apyhe pyndyrykove, peu verãre, maĩrã pyndyrete monde verãre; 23 pyndyrykove mbai vasuveshi ho’uava, hareka tyrete mbai vasuveshi mondeava. 24 Pymaĩhe vyrapuare, haire ñotỹa hareka mỹno’õã; mba’ety houva nãtu verãpe, tẽvã Tũpa myngarushu. Pee rãnga mbai vasuveshi vyrare! 25 Mbavara pynymbytepe ojepy’apy rupii mbupukuavepojyshu hykovepe? 26 Hãma katuã pijapo mbai mishĩĩvãrã, mãrã’ĩrãra pejepy’apypihe yngava retare? 27 Pymaĩhe marãra yvotyre syry, mba’apoã hareka mbavyvyimba; katynga She hai pee Salomon opaite hĩmbipekuepy ñimimondeã penteva haire rãĩmi. 28 Hãma Tũpa kyrã mimonde yvyramire ñanaipi’õ hãndi ñũũhupi ã’ẽvãre, haivi kõĩjyrã opa momboha hornope, marãĩrapo pynymymondekaã kuareta sai jyrojava! 29 Hãme rãnga avy pejepy’apyhe mbaivarapo peukui hareka pimbyu verãre. 30 Shara opaite kova mbai ojepy’apyhe kuareta ko yvy‘ĩãrẽ’õre; tẽvã pee ĩmepyre Peru vate arapy’õ, opa kuava mbaivara pikotẽvẽhe. 31 Tẽvã pee pyheka jyve Tũpa ẽvãpe’õ, hãrã opaite kova mbai me’ẽãpo jyvepe.

Mbai heta ara vate’õ

32 Avy pykyje, mbovyĩ pĩmbayyva, heshara Peru pota meẽpe hai ẽẽvape’õ ryheva. 33 Pevende opaite ĩmepyreva, hãrã pymeẽ mãĩnũnga mba’etyreape; peñehããhẽ vosa soro mbava, jaishu, mbai hetava ara vate’õpe, manarõ’ia ichemba verãpe, hareka kupii houmba verãpe. 34 Shara pynymbaikavi heta’ẽvãpe, haipepo ẽẽ jyve pyndypya.

Ñande ñãhãrõ kavipo

35 Pẽĩkavi pymba’apo verã hareka pymyhendy mbai sapeka. 36 Hãma jokueharea oo ija hãrõ’õ rãĩmi omendaivi oujy verã, pyrỹrẽnoma õchepe vãhẽjyma ourã ỹrẽ’ãĩte pype’a. 37 Vy’apo jokuehareireare oo ija oujymarã, hesha ocheã’ẽrã. Ãñeteĩte hai pee, oo ija mondepo jokueharea mondeva hãrã mbyvapypo mesape, hareka oupo ijokueka jyveshu. 38 Ajemaĩpo pyhare mbytepe vãhẽ oujy, hareka kõĩserima ourã, hãma hesha ocheã ñynoĩrã, vy’apo jyre jokuehareare. 39 Hãma pikuaa kavi kova: Oo ija kuaa mbaiperapo ou manarõ’iarã, ochẽãpo’ẽ hãrã ma’ẽĩãpohe iche ho’ipe manarõshu verã. 40 Pee jyve pẽĩkavipo pẽĩve; pimoãmba pẽĩvape kuareta Tay oujypokui.

Jokuearea jyrojahaheva hareka jyrojahambaheva

41 Hãrã Pedro pyrãndushu Jesús: Yreja, ko ñee ñymyhã’ãnga ore pevarãĩra rereje, maĩrã opavare pevãrãra? 42 Ñandeja heishu: Mbavara hai ñyngareko’ihea japumbaa kua kaviva hareka hekope kavi he’iashuva japova, kyrãva oo ija hejaposhu hoo ipe ñyngareko verã, hareka myngaru verãre jy’arape kavi? 43 Vy‘apo’i ko jokuehareirea oo ija vãĩjyma ourã, hesha he’iashuva opa kavi kyrã japorã. 44 Ãñẽtẽite hai pee, opava mãĩnũnga oo ija ĩmereare opapo ñono ipope. 45 Tẽvã ko jokuehareirea pyape hei; “oo ija nãrẽãnungaãpo oujy”, õñepyrõ jyvavarehe ĩrũre jokuehareireare, kuimbaiva hareka taupeva hãrã ĩñono karu hareka ñymyngau, 46 haivi oujypo jokuehareirea jokue’õ, hãrõhãmba’õ arape hareka jy’ora mõãmba’õpe, jyvareapohe hareka jyrojambaa retapo ñono hãndikui. 47 Hãma ko jokuehareirea kuaa kavi mbaivara oo ija pota, tẽvã õĩkaviã hareka japoãshu ĩñe’ẽrã, hetapo nupãhã. 48 Jokueareva kuambavape mbai porãmba japova nupãha verã, saivepo nupãhã. Hãma hetave me’ẽãshuva, hetavepo jurureajyshu: Hareka hetave jyrojahahea, hetavepo jurureashu.

Jesús rehe veru ñimbijaova

49 Jesús hei: She ai aru aity tata ko yvy’ĩãrẽ, hãrã aipotama hendy ẽẽ. 50 Tẽvã ahasapo jyhasa’asy ^{▼▼Jyhasa’asy Kova mbyparavape’ẽẽ: “ahasapo ñymyngarai rupii”. Kope “ñymyngarai” he’ise “jyhasa asy”.} rupii, ñymyngaraiva rãĩmi; hareka ajepy’apytẽ hãrã aipotama hokava iko! 51 Pimõãra she aĩrã arupo pyavapy ko yvy’ĩãrẽ? Mba’ety! She aru jyve papishare piko porãmba hãndi verã. 52 Hãma ã’ẽ pente oope 5 iare ijupĩĩpo ñyrãrõ, mbahapy õre pũãpo mõkue iare, hãrã mõkue õre mbahapy ia rehepo. 53 Hãma teru pũãpohe tay, tyray pũãpohe tuu, tesy pũãpo memby kuña; tymemby kuña pũãpohe ishy; teme ishy pũãpohe memby hyreko, tymemby hyreko pũãpohe ĩme ishy.

Mbai kavi heshaha verã arare

54 Heijyveshu Jesús kuaretare: Pyhesha ãvã pỹntu pũã kuarasy ichea kytyrã, hãma pere kueĩ: “Haivipo”, hãrã haivi. 55 Hãma yvytu peju rovaivirã perekuei: “Hakupojy” hãrã kyrã jehu. 56 Pee tykove hova mokue’iare! Pee pikua kavi arare hareka yvy’ĩãrẽ pymaĩrã mbaivara ikopo. Hãmera mãrãĩ pikũãã iko’ẽvã ã’ẽ arape?

Eñehãã iko kavi hãndi ndyreshatãmbare

57 Mãrãĩra peeteiva piñanduãã pijapo verã hekope kaviva? 58 Ĩme’ẽ ndyreshatamba’ia reho hãndi huvisha ẽvãperã, ẽñehãã iko kavijy hãndi ndei ndyraha pirĩmbivacheka’ia hỹnonderã hareka hai nymeẽpo syndaro retape hareka syndarore ndyrahapo nymbypereso. 59 Hãma she hai ndee rẽhẽveamapo haivi opa rymbyhepypeve ndipiahevare.