Luke 13

Ñymbeujymba, manopo

1Akua arape ã’ãmo ouvare mbeushu reta Jesús marãra Pilato mondo jukaka ã’ãmo galileovare mymba jukahava hapy ñynoĩvape. 2Hãma Jesús heishu reta: Pimoãra pee ko kuimbai galileovare manova haire hetave mbai porãmba japo yngava galileo retaivi? 3Kyrãã rãnga! Hãma pee peijyvyã Tũpa jykotyrã, pymanoñoĩpo jyve. 4Pimoãra 18 mano vekua Siloeivi mimbo’yhava jopy vekuare, heko porã’ãĩteveva yngare Jerusalénpe’ia retaivi? 5Kyrãã rãnga! Hãma pee peijyvyã Tũpa jykotyrã, pymanoñoĩpo jyve.

Higo iamba

6Heijy ko ñee ñymyhã’ãnga: Pente kuimbai ĩmere pente jypy igo ju’uva rẽndape. Hãrã oho maĩpy’iarã tẽvã mba’ẽã heshããpy. 7Hãma heishu ñyngareko’iheshua: Mbahapy ãñohearema ai aheka ia, tẽvã aheshããpy. Jasyja! mba’erãra ẽẽreipo ko yvype? 8Tẽvã hai mbyhovairã heishu: “Sheja, ma’ẽĩterihe ko ãñope, tamungui jurikui hareka tambykavevoshu yvy. 9Katuara koivi’iakui, hãma i’ããjyrã, katumapo jajasyja”.

Jesús mynguera pente taupe putu’uava jy’arape

10Pente putu’uava jy’arape Jesús pyrỹmboi Judiore ñymbatyseape; 11hãma haipe ẽẽ pente taupe 18 ãñoma mbai poshy mymbairasyva hareka japava hareka marãmba katu mysymyĩhajya. 12Jesús heshamarã, hẽno hareka heishu: “Taupe, poima ndyhevi nymbairasykue”. 13Hãrã ipo ñono ĩãrẽ. Haivi taupe ñysymyĩjyrã, õñepyrõ õmombaivasushu Tũpa. 14Tẽvã huvisha Judiore ñymbatyseape’õ poshy’i shara Jesús mynguerajy putu’uava jy’arape. Haivi heishu kuaretare: 6 ara ẽẽ katu ñamba’apo verã; hãrã hoka arape rãngapo peii piñymyngueraka verã, tẽvã avypo putu’uava jy’arape. 15Ñandeja heishu: Pee tykove hova mokue’iare! Peera pijoraã kueĩpi punurũmba buey, maĩrã mbirika putu’uava jy’arape pyraha pymbyu verã? 16Tẽvã ko taupe Abraham ñymoñashia, Satanás pokua ñonoshu vekua 18 ãñoma mbairasykue ryheve. Hãmera õĩã poihakashi verã kova mbairasykue putu’uava jy’arape? 17Hãma Jesús kova heirã ñymymarãka hyvaishore; tẽvã kuaretare vya reta mbai vasu Jesús japovare.

Ñymyhã’ãnga mostaza hãỹ ryheva

18Jesús hei jyve: Mbaivara ova Tũpa ẽvãpe’õ ryheva, hareka mbaivara ambivachepohe? 19Hãĩ rãnga mostaza hãỹ pente kuimbai heky hareka ñoty vẽkua ikope. Syry oho’i ikoshi peve yvyra hãrã vyrare ñymbyhaity hãkãre.

Ñymyhã’ãnga levadura ryheva

20Jesús hei jyve: Mbaivara katu amyhã’ãngahe Tũpa ẽvãpe’õ ryheva? 21Ova harina mby’ouka, pente taupe ñomi mbihiava harina tivisha’õ, opa jy’ou kavipeve.

Õche mishĩva

22Jesús hasa oho tenta retaipi hareka tentami retaipi, pyrỹmboi hareka hasavaipi Jerusalén kyty. 23Hãma mbava pyrãndushu: Sheja, mbovyirapo’i ohojepeva? Jesús heishu: 24Piñyhãã katu piche õche mishĩ’õĩpi. She hai pee hetapo ẽẽ potate icheva, tẽvã katuãpo. 25Haivi oo ija pũãma mboty õcherã, katuape pee pimepẽĩva, punupapo hoka õche, hãrã perepo: “Sheja, pea ore”. Tẽvã hai heipope: “Apyrykuãã hareka aikuãã maivi peivara”. 26Haipe peñepỹrõpo pere: “Karuha hareka ñymby’uha rãnga’i nendie, hareka vataha’õĩpi yrymboiri”. 27Tẽvã hai heipo pee: “Haima rãnga pee, she aikuamba maĩvi peivara pee. Pysyry shyhevi pee porãmba japo’iare!” 28Haipe ẽẽpo jaheova, hareka tyrãĩ mbupupuruva pyheshama Abraham, Isaac, hareka Jacob perã, hai hoka Tũpa ĩñee mbeu’ia arykaivare Tũpa ẽvãpe’õ ryheva tẽvã pee pymohẽãpo katuape. 29Shara ĩmepo ẽẽ ouva kuaretare kuarasy õhẽaivi hareka kuarasy icheaivi, yvytu kytyivi hareka rovaivi, vapy karu verã Tũpa ẽvãpe’õ ryheva mesape. 30Hãma ã’ẽ taykue’õ mytynondehapokui, hareka ã’ẽ tynonde’õ mbytaykuehapokui.

Jesús hãpĩrõ Jerusalén

31Hoka arape fariseore vãhẽ jyveru Jesús ẽvãperã heishu reta: Ekua koivi, shara Herodes pota nduka’ẽ. 32Jesús heishu: Pekua, hãrã pereshu hoka avara: “Ã’ẽ ãmohẽ mbaiposhy hareka apyrỹmynguera ko arape, hãma kõĩjyape, hareka mbahapy arajyapepo ajapo verã opama ajapokui”. 33Tẽvã, avatateripo ko arape, pareejyrã, hareka ĩrũ arajyape; shara katuãpo Tũpa ĩñee mbeu’ia manoshi Jerusalénvi katuape. 34Jerusalén, Jerusalén, rijukariva Tũpa ĩñee mbeu’iare, hareka itape rijapireiva Tũpa mondotendevare! Mbovyjyra shykyrẽỹte ambaty nymembyre, uru memby mbatyva rãĩmi hỹpãpõka’ipe, tẽvã ndee ripotãã! 35Ã’ẽ ndero hejahapo, yvy ikohambaipi, hã’ẽĩma ẽẽ hãrã hai pee shyreshaveama verã, vãhẽpeve hoka ara pere verã: “Tojehovasa ouva Ñandeja heepe”.