Luke 14

Jesús mynguera pente kuimbai opa ruru vekua

1Pente putu’uava jy’arape, Jesús oho pente fariseore juhuvisha hentape karu verã, hãrã opaite haipe õĩvare ma’ẽĩ ñynoĩhe. 2Haipe pente kuimbai hete oparuruva ẽẽ hỹnonde. 3Hãrã Jesús pyrãndushu Moisés mbypara vekua pyrỹmboi’ihea hareka fariseore: Katura ñamynguera ñymbairasyva putu’uava arape maĩrã katũãra? 4Tẽvã haire jasasakãĩ jyre. Haipema Jesús pysy kuimbai ñymbairasyva hãrã myngueramarã, mondojy. 5Hãrã Jesús heishu fariseore: Pynysanjay maĩrã punũrũmba guei pente yvykuape oarã, ỹrẽ’ãrapo pynohẽjy putu’uava jy‘arate’õva? 6Hamã haire katuvẽã mbai mbyhovaishu.

Omendavape henohakavare

7Jesús hesha marãra hẽnõhaka haivare pyhỹrõ vapyhapya tynonde’õ hoka mesape, hãrã mbeushu reta kova ñee ñymyhã’ãnga: 8Hãma mbava nyrẽnokave jykaru vasuva omendaha’õperã, avy vapy vapyhapya tynonde’õpy, shara katupo oujy yngava hẽnõhãkaiteve ndyheviva; 9hãma ouma ko nyrẽnokavarã, heipo nde: “Meeshu ryvapypya”, nymarã ryhevẽĩpo reho ryvapy vapyhapya japype’õ. 10Hãrã nyrẽnohakarã, vapyhapya japype’õpẽĩpo ryvapy, nyrẽnokava ourã heipo nde: “Shi’ĩrũ, tynonde ekua vapy”; kyrãrã nymbyveteitevepo hỹnonde mesape vapy’õre. 11Hãma ha’ẽĩ vateve iñiñono’ia, mimishĩãpokui; hãrã oñemomishĩĩ’iapo, vateve ñonohakui. 12Hei jyve kuimbai hẽnohakavekuape: “Rijapo karu vasu, arape maĩrã pyharerã, avy hẽnoka ni’ĩrũ retape, maĩrã ndyryvyre, nyrẽtãrãre, maĩrã ndyvache’õre iko katuva mahẽ haire nyrẽnokarã, hareka kyrã mbyhepyjypy nde verã. 13Haikavive rãngapo, karu vasu rijaporã, rỹhẽnokave pavete’iare, jyvambava, vatambavare, hareka heshamba kuvãĩpiare; 14hãrã ryvy’apo, shara haire mba’etyre mbyhekoviajypy nde verãre; shara opapo mbyhekoviajy ndekui heko kaviva puãjyma retarã”.

Ñymyhã’ãnga karu vasu pynturã ryheva

15Hendu hokavarã, pente mesape vapy’õ, heishu Jesús: Vy’apo karuva Tũpa ẽvãpe! 16Hãma Jesús heishu: Pente kuimbai japoka karu vasu pynturã, haivi kuareta hetava hẽnoka jyve. 17Vãhẽma karu verã retaperã, mondo jokuehareirea hei verã hẽnohãkava retape, “Pei shara opama ẽẽ”. 18Tẽvã haire õñepyrõ pepenteĩ heishu reta katumba ohovare. Penteva hei: “Ava rãngaje pente shekorã, hãrã ahapo ãmaĩhe; ambe’uĩnde mahẽ ajetẽã’ẽ ndekui”. 19Ĩrũ heijy: “Kuri rãnga avaje 5 ijovea guei, hãrã ahapo ãhãhã aĩ; ambe’uĩnde mahẽ ajetẽã’ẽ ndekui”. 20Hãrã ĩrũ heijy: “Katuãnypo aha shara kurite ãmenda”. 21Hãma oujy jokuehareirea, opa mbeushu jokue’õ. Hãma oo ija poshy hãrã mondo jokuereirea: “Narẽ’ãĩte ekua ko tentahupi, vataha õĩpi hareka pehupi, hareka eru kope pavete’iare, mba‘erãveama’iare, porãmba vatavare, hareka kũvãĩpi heshaveamavare”. 22Hãrã jokuehareirea oujymarã heijyshu: “Sheja, ajapoma nde reresheva, tẽvã hendateveteri’ẽ”. 23Hãma pyrokue’õ heishu jokuehareirea: “Ekua vataha’õĩpi hareka pehupi tenta ñahẽmashia kyty hãrã ryheshavare miñerã tiche tynyhẽ’ẽ verã shero. 24Hãrã hai pee mbavẽãpo tynõnde hẽnõhakavare, houkui pynturã she hau verã”.

Mbaivara tekotẽvẽ Jesús ñami’ĩrũ verã

25Kuareta hetava Jesús oho hãndi; jere jykotyrã heishu reta: 26Ĩme’ẽ ou shykotyvarã, tẽvã haihuveva tuu, ishy, hyreko, tayre, tyvyre, hiindyre hareka ha’ei hykovetei, katuãpo ikoshi amboi’area. 27Hãrã jukurusu hupimbava hareka oumba shaykueva katuãpo ikoshi amboi’area. 28Ñañonoshu mbava pynymbytepe pota mupuã oo vate’õrã, vapy rãniãrapo papa mbovyrapo hipityshu, hareka hesha verã ĩmerare kyrypoti maĩrã opa japoka verã? 29Shara opama ñono hẽndarãperã, haivi opãã japorã, opavare heshava õñepyrõ ñymbyhoryhe, 30hãrã heipo reta: “Ko kuimbai õñepyrõma rãnga japo hoorã, tẽvã katuã opa japo”. 31Maĩrã ñañonojyshu, pente huvisha vasu ohoserima ñyrãrõ hãndia ynga huvisha vasu, vapy rãniãrapo pya mbijeta verã, katurapo 10 mil kuimbai ñyrãrõ hãndi 20 mil hyvaishorã oushu verã? 32Jepyãpoherã, mbyryteri’ẽshi ynga huvisharã, mondoposhu hai ẽvãpe jokuerea, jurureshu verã ikokavijy hãndi verã. 33Kyrã, ĩme’ẽ peeva opa kavimba heja opava maĩnunga ĩmerevarã, katuãpo ikoshi amboi’area.

Juky hymboshyvearã

34Haikavi rãnga juky; tẽvã hymboshyveamarã, marãrapo mymboshyhajy hykuaĩ? 35Porãvẽama yvy pevarãĩmba, kyrãijy yty pevarã; momboha verãĩma. Ĩme’ẽ japysavarã, tyhendu.