Luke 15

Ñymyha’ãnga avisha kañyva ryheva

1Ñymbojahe reta Jesús opaiteva kyrypoti mbatyse’iare Roma pevarã hareka heko porãmba’iare hendushu verãre. 2Hãrã fariseo hareka Moisés mbypara vekua pyrỹmboi’iheare õñepyrõ ijeta porãã jyrehe hãrã hei reta: Ko kuimbai myvãhẽ heko porãmba’iare hareka karu hãndi. 3Haipe Jesús mbeushu reta ko ñee ñymyhã’ãnga: 4Ĩme’ẽ pynymbytepe ĩmerea 100 avisharã pente kañyshirã, hejaãra ñuũpe 99, oho heka verã kañyva heshajy peve? 5Haivi heshajymarã vy’ape hupi ñyvãpenkare; 6vãhẽjyma oho hentaperã, mbaty ñi’ĩrũre hareka henta juri’õre, hãrã heishu reta: “Pyvyaminte shendie, shara aheshajyma shy avisha kañy vekua”. 7Kyrã hai pee hetaveva vyapo vate arapy ẽẽ pente heko porãmba oujy Tũpa jykotyrã, 99 heko kavi’ia retaivi ikotẽvẽmba ẽẽ ñymbeujyhaivare.

Ñymyha’ãnga nikere kañyva ryheva

8Ñañonojyshu, pente taupe ĩmerea 10 nikere, kañyshi penterã. Myhendyãra mbai sapeka, typei oo ipe hareka kapyry heka vãhẽjyshupeve? 9Hãrã vãhẽjymashurã, mbaty ñi’ĩrũ taupe hãndiare hareka hoo hyvache’õ taupe retarã heishu: “Pyvy’a shendie, aheshajyma nikere kãñy shyhevi vekua”. 10Kyrã vya jyve Tũpa jokuevare pente heko porãmba’ia heja mbai porãmba vekuarã.

Teru pyryraihuva

11Jesús heijyshu reta: Pente kuimbai ĩmere mokue tayre; 12haipe ndeiveva heishu tuu: “Sheru, meẽshe, mbai ĩme ryrevare sha’ãporãre”, hãrã tuu memeẽshu reta hai ĩmereva. 13Mbovy aramajyrã tay ndeiveva opa mbaty ĩmerearã mbyry oho, ynga yvype; haipe oho iko’i kuaã japoite verã japo’i porãmba ijyjokombape opa pory hai imere vekuami. 14Opama jyvarehe ĩmerearã, ou pente ñymbahy vasu hoka tentape, haipe õñepyrõ hai hasa’asy. 15Hãma heka mba’apo verãĩpi hãrã vãhẽshu japo verã pente karai haipe’õ rupii, hokava mondoshu ñuupe kushire ñyngarekohe verã. 16Hãrã potatẽ ñymyhỹvantapy yvope kushire hou’õvapy, tẽvã mba’ety meẽshua. 17Hãma haipe pya mbijetahe japo vekuare: “Mbovy jokuearea retara sheru hentape’ẽẽ hembypashu hou verãre, sheny kope ãmanomapo ñymbahyivi! 18Ãpũãpo aha sheru ẽvãpe haiposhukui: Sheru, porãmba rãnga ajapo nynonde hareka Tũpa hỹnonde; 19katuveama ndyra’ype shyrẽnõha; shiñonoĩ rijokueryrea rãĩmi”. 20Hãrã haipe pũã ohojy tuu ẽvãpe. Hãrã mbyryteri ouva hesha tuurã parekoshu, hãrã ñani oho hỹnonde hỹvãĩtimarã kũãva jajuipi, marãndurã hovape pyteshu. 21Hãrã tay heishu: “Sheru porãmba rãnga ajapo nynonde hareka Tũpa hỹnonde; katuveama shyrenohã ndyra’yrã”. 22Maĩrã tuu heishu jokuehareireare: “Ãrẽ’ãĩte pynohẽ mondeava mashyãva, pymymondeka; piñonohẽ kuairõ ipore, hareka pymymondeka jypasarã! 23Hareka peru toro ray kyraveva, pijuka, jakaru hareka javy’a! 24Shara ko shyray manoma vekua, ã’ẽ hykovejy; kañytẽ vekua, ñavãhẽjyshu”. Hãrã õñepyrõ vy’a reta. 25Hãrã tay tynondeva ĩme’ẽ ñuupe; hãrã vãhẽjyma ou henta hyvacherã, hendu mbi‘ipuha’õ hareka jyroky’õre; 26haivi hẽno pente jokuerearã pyrãndu’ishu mbaivara hokava. 27Jokuevare heishu: “Ndyryvy oujyrã rãnga nderu jukaka pente toro kyraveva mamba’ẽãte oujyrã”. 28Hãma poshyite’irã ñatẽy iche. Haipe tuu õhẽ jurure’asyshu iche verã. 29Hai heishu tuu: “Heta ãñoma ãrỹmbory, ajapo ñoĩnde ñeẽ japoa verã, tẽvã mapemba rỹmetẽveshea pente kavara ray, avya verã shi’ĩrũre hãndi. 30Tẽvã kova ndyray opa jyvarereihe vekua ndykyrypoti taupe heko porãmbare hãndiva, rijukashu hai pevarã toro ray kyrava”. 31Hãma hai heishu: “Shyray, nde rãnga rikoñoĩri shendie, opaitea sha’ãpovare hai na’ãpova. 32Haikavi rãnga javya pãveĩterã hareka ñandyrory, shara ko ndyryvy manomatẽ vekua, tẽvã hykovejy; kañytẽ vekua, hareka ã’ẽ heshahajy”.