Luk 16 | TpjSC | STEP | Jesús heishu mboireare: Ĩmemba’ẽ pente kuimbai iko katuva, ĩmerejy pente jokuerea mbai ñyngareko’iheshua. Mbe’uashu porãã opa pory mbai hetava ñyngareko’ẽhea.

Luke 16

Mbai ñyngareko’ihea heko kavimbaa

1 Jesús heishu mboireare: Ĩmemba’ẽ pente kuimbai iko katuva, ĩmerejy pente jokuerea mbai ñyngareko’iheshua. Mbe’uashu porãã opa pory mbai hetava ñyngareko’ẽhea. 2 Hãma hẽnokarã heishu: “Mbaivarajy ko ahendu he’ia ndyreheva? Opa ñono she kuatiape rijapo vekua, shara katuveamapo rĩngarekohe shã’ãpovare”. 3 Haivi mbai ñyngareko’ihea pyape hei: “Mbaivara ajapopo? Shokue’ia rãnga shymohẽ amba’apoaivi. Shy yvype amba’apo verã ãĩmburuãshu; airurure’ai verã, ãnotijy. 4 Aikuama mbaivarapo ajapo, ĩme’are verã mbava retarapo shymyvãhẽ hentape, amba’apoveamarã”. 5 Hamã pepenteĩ hẽno jokuerea jipia’ẽshuare. Hãrã tynonde’õ pyrãndushu: “Mbovyra ndipiarẽĩshu shokue’ia?” 6 Hokava kuimbai heishu: “100 hyru asaite rãngapo ameẽjyshukui”. Hãrã mbai ñyngareko’ihea heishu: “Kõ’ẽ ndykuatia, narẽ’ãĩte vapy, 50 pevẽĩ ñono”. 7 Haivi pyrãndujyshu ĩrũ: “Ndejyveno mbovyra ndipiarẽĩve?” Hai hei: “100 trigo hyru ryheve”. Hãrã heishu: “Kõ’ẽ ndykuatia 80 pevẽĩ ñono”. 8 Pyrokue’õ kuaama mbai ñyngareko porãmba’ihea katu’i jyve mbai japo verãrã, ijeta kavihe. Shara ko yvy‘ĩãrẽ’õ japo’iare ha’eve jyve mbai japo verã hapishare hai rãĩmi’iare pevarã, Tũpa potava japo’ia retaivi. 9 Hãrã hai pee: Pory kyrypoti ko hekopembaa ĩmeryreva rymbyheta verã rĩmi’ĩrũ verã. Haivi, kyrã opama pyhevi hokava kyrypotirã, Tũpa hareka jokuereare nymyvãhẽpo pente oo vate arape’õ opa ara pevarã. 10 Ko heko kaviva mbai mishĩvãpe, heko kavi jyve mbai hetavape; hãrã mishĩvape heko porãmba, kyrã jyve mbai hetavape. 11 Hãma mbai hetava porãmba ko yvy‘ĩãrẽ’õ hekope kaviãã piporyrã, mbavarapo pyndyroja mbai añetevape? 12 Hãrã haimba pã’ãpovare pyndyrojahããrã, mbavara meẽpope peii pa’ãpova? 13 Pente jokueharea katuã mokuere jokue’õ, shara heshatãpo pente, ĩrũĩpo haihushu; penteĩpo japoshu heiva, ĩrũpo japoãshu heiva. Kyrã jyve pee katuã Tũpare pẽĩva seveivãĩ pẽĩjyhe kyrypoti. 14 Hãma fariseore, haireta hai kyrypoti haihuvare, opa hendu ñynoĩ kova hãrã ñymbyhoryhe reta Jesús. 15 Hãrã Jesús heishu reta: Pee rãnga pere pindijehe heko kaviva kuaretare hỹnonde, tẽvã Tũpa kuaa’ẽ pyndypya; hareka kuimbaire mbytepe mbai vasuva rãĩmi rekohava, hokava hai mbai porãmba’eiteve vekua Tũpa hỹnonde.

Moisés mbypara vekua hareka Tũpa ẽvãpe

16 Moisés mbypara vekua, hareka Tũpa ĩñee mbeu’iare hei vekua japoa verã vãhẽ Juan arapeve; haivive mbe’uhajy Tũpa ẽvãpe’õ ryheva ñee kavi, hãrã opaite õñehãã pota pyrãtakuepe ichepyrã. 17 Javaĩãvepo opa ara vate’õ hareka yvy, Moisés mbypara vekua ikomba verãĩvi.

Jesús mbeu omendateã poijy ijuhuviare

18 Ĩme’ẽ pente kuimbai hyreko poishia omendajyhe yngava tauperã, ynga jyrekomava pokojyhe, shara haimba hyrekova iko’i hãndi; hareka taupe poiashia rekojya, ynga jyrekomava pokojyhe, shara haimba hyrekova iko’i hãndi.

Kuimbai iko katuva hareka Lázaro

19 Ĩmemba’ẽ pente kuimbai iko katuva, mondeava hepyva monde’ia hareka opa’ara japova karu vasu. 20 Ĩmemba’ẽ jyve pente pavete’ia Lázaro he’iashua, opa kuruva. Ou vapy’i yvype iko katuva hõchepe; 21 ko pavete’ia potavasĩ ñymyhỹvãtatẽpy ho’uava ku’ikuemi oava iko katuva ñy mesaivi hareka ñaũmba retaave ou hereshi kuru. 22 Pente arape mano ko pavete’ia, hãrã Tũpa jokuevare ou rahashu Abraham ẽvãpe. Haivi iko katuva mano jyve, hãrã ñotỹha. 23 Hãma manovare ẽvãpe iko katuva õĩ asymarã mãĩ vate, mbyryivi hesha Abraham hareka Lázaro hãndi; 24 hãrã sapukerã hei: “Sheru Abraham, shyparekomĩtẽ, mbou Lázaro tymaky ipo ĩtimi yype vỹry’ỹsã verã shẽku; porã’ãĩte rãnga ãĩ ko tata hẽndype”. 25 Tẽvã Abraham heishu: “Shyray, manduahe rĩmẽteririrã mbai heta ryrerã rikokavi, kyrãite rãnga Lázaro heta hasa’asy jyve. Hãrã ã’ẽ hai vy’a ẽẽ kope, ndehaitema ryhasa’asyiterẽĩ jyve. 26 Hãma koivi, ĩme’ẽ ñanymbytepe mbai kype’õ hareka tivishava; hãrã ĩme’ẽ koivi pota hasava pẽĩvãperã, katuãpo hasa, hãndi hokaivi katu’ãĩpo hasa jyve kope”. 27 Haipe iko katuva hei: “Akuarã, sheru Abraham, airurende rỹmondo verã Lázaro sheru hentape, 28 ĩme’are 5 shyryvyre, tymbeuveshu reta mahẽ haire oujyvekui ko hasaha‘asy’õpe”. 29 Tẽvã Abraham heishu: “Haire ĩmere Moisés mbypara vekua hareka Tũpa ĩñee mbeu’iare hei vekua; haire tyhendushu”. 30 Iko katu katuvekua heijy: “Kyrãtẽvara sheru Abraham; ĩme’ẽ ohova haire ẽvãpe mano vekua pãũvirã, hejapo retakui mbai porãmba japo vekua”. 31 Abraham heishu: “Henduseã Moisés, hareka Tũpa ĩñee mbeu’ia retarã, rojã’ãĩpo jyve reta ĩmetẽ’ẽ pũãjyva manovare pãũvi”.