Luke 18

Ĩme manoshia hãndi pirĩmbivachese’ia

1Jesús mbeushu reta pente ñee ñymyhã’ãnga mboishu verãre, ñymboiñoĩ verãre, hareka ñymykangymbape. 2Heishu reta: Ĩmemba’ẽjy pente tentape huvisha pirĩmbivachese’ia Tũpa kyjemba’ishia, hareka kuaretare. 3Ĩmemba’ẽ jyve hokava tentape pente taupe ĩme manoshi vekua, ohoñoĩva hai ẽvãpe heishu verã: “Hekope kavi ñonojyshe aivavy hãndia shymymorãmba’iare hãndi”. 4Heta ara ko huvisha pirĩmbivache’ia ñatẽy japo jurureashua, tẽvã hei pyape: “Ajema Tũpa akyjeãshi hareka mba’eãjyshe shapisha, 5tẽvã ko taupe ĩme manoshi vekua shymãgãtu’ãĩte, hãrã ahepyposhu, mãhe hykũãi oujykui shymynguerepeve”. 6Ñandeja heivejy: Pyhendu huvisha pirĩmbivachese’ia heko porãmba’ia heiva. 7Hãmera Tũpa hepyãpojyve jyrojahea, jurureñoĩ’ishuare ara hareka pyharekue? Kỹỹrapo hãrõshu mbory verã? 8She hai pee; areãpo ou mbivachekashu reta. Tẽvã ko kuareta Tay vãhẽma ara oujy verãperã, heshara teripokui ko yvy’ĩãrẽ kuareta jyrojava?

Ñymyha’ãnga fariseo hareka henta õre mbyhepyva okora’ia ryheva

9Jesús mbeujyshu ko ñee ñymyhã’ãnga a’ãmore jyroja’i ijeheva pevarã, moãtẽ heko kavirã mymorã’i hapishare: 10Mõkue kuimbai oho tũpao pe jurure verã: Pente hai fariseo, ĩrũ hai kyrypoti mbatyse’iare Roma pevarã. 11Fariseo ñymboy’õpe kyrã jurure: Tũpa, ameẽnde shy’ajetekue shara ha’ẽãshe yngavare kuaretare rãĩmi aikova: Manarõ’iva, heko porãmba, ynga pota ijya, hareka ha’ẽãshe ko kyrypoti mbatyse’iare Roma pevarã rãĩmiva. 12She karumba ryheva ajapoñoĩ mõkue ara pente semanape, hareka ameẽ diez’õvaivi pente opaite apityvaivi. 13Tẽvã kyrypoti mbatyse’iare Roma pevarã mbyryĩ ñymboy’i, õĩmbashua vate arare mãĩ verã, koñymãi pitiape nũpa’irã hei: “Tũpa, shyparekomĩtẽ, shara she hai heko porãmba!” 14Hãrã she hai pee ko henta’õre mbyhepyva okora’ia ohojy hentape Tũpa hejareiimashia mbai porãmba vekua. Tẽvã fariseo kyrãã hai. Hãma ĩme’ẽ ha’eii vateve iñiñono’iarã, mbaimbava rãĩmipo japoha, tẽvã õñemomishĩĩvã, vatevepo ñonõha.

Jesús hareka sanjaymire

15Haivi veruhashu Jesús sanjaymire ipo ñonohẽ verã hareka mãi kavihe verã. Hãrã mboireare hesha hokavarã poshy ryheve ijetashu sanjay veru’õre. 16Tẽvã Jesús hẽno sanjay retarã hei: Pyma’ẽĩhe sanjaymire tou shykoty, avy pijocha, shara haire ña’ãpova hai Tũpa ẽvãpe’õ ryheva. 17Añeteva hai pee, Tũpa jyrojambahea pente sanjay japova rãĩmi, ha’ẽã iche verã Tũpa ẽvãpe.

Kunumi ikokatuva

18Pente huvisha pyrãndushu Jesús: Pyrỹmboi’ia pya kaviva, mbaivarapo ajapo apity verã tykove opambava? 19Jesús heishu: Marã’ĩrãra rereshe pya kaviva? Mba’ety rãnga pya kaviva, koñeĩ’ẽ Tũpa. 20Nde rikuaa ñeẽ japoa verã: “Avy ynga jyrekomava pokojyhe, avy puruka, avy manarõ; avy ijeta porãhe ndapishare; japoshu nderu hareka ndesy heiva”. 21Hokava kunumi hei: Opaite rãnga kovare ajapo shyndei airãvãĩ. 22Jesús hendu hokavarã heishu: Pente mbai, mba’etyteri nde; opa evende ĩmeryreare haivi hepykue memeẽshu pavete’iare, hãmerãpo ripitykui rikokatu verãpe vate arapy. Haivi ei shimĩ’ĩrũ. 23Tẽvã ko kunumi kyrã hendurã mbasy’i, shara ikokatuvamba hai. 24Jesús heshama marãra mbasy’irã hei: Javaiveeposhu hai ikokatuvare iche verã Tũpa ẽvãpe. 25Javaĩãposhu hai kamello hasa verã juu sakuaipi, ikokatuva ichetẽ verãivi Tũpa ẽvãpe. 26Henduvare, pyrãndu reta: Mbavarapo akuarã ohojepekui? 27Jesús mbyhovaishu reta: Kuaretare javaishuva Tũpa pevarã javaĩãshu hai. 28Pedro heishu: Sheja, ore rãnga opa hejaha yrã’ãpovare oua ndipi verã. 29Jesús heishu: Añetevape hai pee, ĩme’ẽ hejava hoo, maĩrã tuu, tyvyre, hyreko, hareka tayyre Tũpa ẽvãpe’õ reherã; 30hetavepo mẽ’ẽajyshukui opa heja vekuaivi ko yvy’ĩãrẽ, hareka ara ouverãpe mẽ’ẽaposhu tykove opamba verã.

Jesús hykuaĩ mbeujy mano verã

31Jesús hẽno hã‘ẽĩ’õpe 12 mboirea retarã heishu: Ã’ẽ jahapo Jerusalén kyty, haipepo opa iko Tũpa ĩñee mbeu’iare heihe vekuare Kuareta Tay, 32shara ñonoapo kuareta jyrojambare ipope; haivi ñymbyhorypohe reta, heta mbaipo heihe reta hareka myndyvypohe reta; 33nupapo hareka jukapo reta; tẽvã mbahapy arapepo kuerajy. 34Tẽvã haire kuãã mbaivara he’ise kova ñee, shara kova mbai ñemi’ẽshi reta, hãrã kuãã reta heishuvare.

Jesús mynguera pente kũvãipi heshamba Jericope

35Jesús vãhẽserima oho Jericoperã, pente kũvãĩpi heshamba vapy’i pee hỹmbeype jurure’ẽ kyrypotirã. 36Hãma hendu kuareta hetava hasa haipirã, pyrãndu mbaivara iko. 37Mbeushu reta Jesús Nazareno hasa ohova haipi. 38Haipe sapukerã hei: Jesús, David tay; shyparekomitẽve! 39Hãma tynonde ohovare poshy ryheve heishu reta jasaka’ẽ verã; tẽvã hai hỹnatuve sapukejy: David tay, shyparekomitẽvẽ! 40Haipe Jesús ñymbourã, jurure veruashu verã hai ẽvãpe. Vãhẽ ourã pyrãndushu: 41Mbaivara ripota ajapo ndyrehe? Haipe kũvãĩpi heshamba hei: Sheja, pota rãnga aheshajy. 42Jesús heishu: Heshajyteño, rirojarã rykuerama. 43Haipevãĩ heshajy kũvãipi, hãrã oho hipii Jesús hareka õmombaivasushu Tũpa. Hãrã opaite heshavare kova, õmombaivasu jyve reta Tũpa.