Luk 2 | TpjSC | STEP | Hokava arape, õhẽ kuatia huvisha Augusto Cesarvi, iko verã opaite kuaretare oho mbyparaka verã hee kuatiape hareka oa vekuape.

Luke 2

Jesús oarã

1 Hokava arape, õhẽ kuatia huvisha Augusto Cesarvi, iko verã opaite kuaretare oho mbyparaka verã hee kuatiape hareka oa vekuape. 2 Kova tyree mbyparaha verã kuatiape tynondeite japoha Cirenio huvisharã teri’ẽrã Siriape. 3 Haivi opavare ohojy henta retaipi hee ñonoka verãre kuatiape. 4 Hãrã José õhẽ tenta Nazaretvi, yvy Galileape’õ, oho Belenpe Judea kyty huvisha vasu David oa vekuape, heshara José hai David ñymoña hãndiare. 5 Hãrã jyraha ñonoka verãre hee kuatiape hãndi hyreko Maria, purua’ia. 6 Hãrã Belenpema ĩme ñynoĩrã, vãhẽ Maria memby verãpe. 7 Haipe oashu memby tynondeva, hareka tarapopy ñoma, haivi miñenopy pente mymbare karuseape shara mba’ety ẽ verã retape.

Tũpa jokuevare hareka avisha ñyngareko’iheare

8 Belen hyvache mbovy ĩme ñynoĩ avisha ñyngareko’iheare, ñuupe jy’avishare ñyngareko ñynoĩheva hoka pyhare pukukue. 9 Mondii ijeshakashu reta pente Tũpa jokueva, haivi Ñandeja hĩmbipekue sape juri reta, hãrã opa kyje reta. 10 Tẽvã Tũpa jokueva heishu reta: Avy pykyje; aru pee mãrãndu haikaviva, opavare mbyvya verã. 11 Ã’ẽ oaje David hentape pente pyrỹmondo jepe’i verã, hai Cristo, Ñandeja. 12 Kovapo hai pente mbai heshaha verã pyhesha verã: Pyheshapo pente sanjay ñomahava tarapope, hareka mĩñenohã pente mymba karusevape. 13 Haipe mondii ijeshaka Tũpa jokueva hareka ĩrũre hetava hãndi vate araivi, Tũpa pyrahe ñynoĩshurã hei reta: 14 Toñemombai vasu Tũpa, vatevevape, hareka yvy’ĩãrẽ kuaretare tiko kavi ijupive Tũpa haihuvare. 15 Hãrã Tũpa jokuevare jyrahajyma vate arapyrã, avisha ñyngareko’iheare hei ijupe: Jaha Belenpe ñamaĩhe ko Ñandeja ñanymbykuaaka’õva. 16 Hãrã avisha ñyngareko’iheare nare’ãite jyraharã hesha reta Maria, José hareka sanjaymi ñeno’õ mymba karusepyape. 17 Heshama retarã õñepyrõ mbeu Tũpa jokueva heishua reta rãĩmi ko sanjay rehe. 18 Opaite henduvare mbyrymaĩ avisha ñyngareko’iheare heiva. 19 Maria pyapẽĩre opaite kova mbai ñee hareka py’ãĩ mbijetarehe. 20 Avisha ñyngareko’iheare jyrahajy retarã, vy’akue ryheve õmombairã pyraheshu Tũpa, shara Tũpa jokueva mbeuva rãĩmi opa hesha hareka hendu reta.

Jesús rahaha mbishakaha tũpao pe

21 Hãrã 8 aravape piremi chinchiashi sanjay, haivi ñonohẽ reta tyree Jesús, Tũpa jokueva heishuva rãĩmi Maria, ndeiteri puruarã. 22 Hãrã vãhẽma ara haire ñymbyhaikavi verãpe, Moisés mbypara vekua heiva rãĩmi, raha reta hokava sanjay Jerusalénpe mbishaka verãre Ñandeja hỹnonde. 23 Kyrã japo reta shara ñee mbyparahava Ñandeja jykuatiape kyrã heirã: “Opaite sanjay tynonde oava kuimbairã, mbijichehakañoĩpo Ñandeja pevarã”. 24 Hareka meẽjy reta pente me’ẽhãĩva ñee mbyparahava vekua Ñandeja jykuatiape heiva rãĩmi: Mõkue pukui, mairã mõkue pykasuray. 25 Hokava arape Jerusalénpe iko’i pente kuimbai heko kaviva Simeón he’iashua. Tũpa õmombaiva hareka harõ’iva Israel mupu’ãjy verã. Espiritu Santo ẽẽ hãndi. 26 Espiritu Santo kuaakashu manombateri verã Cristo Ñandeja ndeiteri hesharã. 27 Hãma Simeón oho tũpao pe Espiritu Santo kyrã heishurã. Hãrã sanjay Jesús tuu hareka ishy raha reta tũpao pe japo verã Moisés mbypara vekua heiva rãĩmi. 28 Simeón hupi sanjay hãrã ohovasa Tũpaperã hei: 29 “Ã’ẽ, Sheja, ma’ẽĩhe kapyryĩ tamano, shara rijapoma rijokuerei ryreape rerevekua. 30 Aheshama shyresa petei pyrỹmondojepe verã, 31 ndee rymbouva hareka opaite tentare heshapo. 32 Sape mykõĩhe verã haimba Judiore, hareka nyrẽta Israel mihimbipe verã”. 33 José hareka Jesús ishy mbyrymaĩ reta Simeón heiheva sanjay. 34 Simeón meẽshu reta jyhovasa, hãrã heishu Maria, Jesús ishy: Tũpa mbou ko sanjay heta Israelpe’õre ohojepe verã, hareka yngavare jaheahe verã. Haipokui pente heshaha verã hareka hetapo’ẽkui ñymbyvaishoheva. 35 Ãñete kyrãpo kuaahakui pepenteĩ pya mbijeta’iva. Hãrã nde Maria, kova ndyreko asypo kyse pukuva ndypyape kutuava rãĩmipokui. 36 Haipe ẽẽ jyve pente taupe kuakuamava Tũpa ĩñee mbeu’ia Ana he’iashua, Penuel tajy, Aser ñymoña hãndiare. Kuakuamava; Kuñataĩ ray ryheve omendava, 7 ãño ĩme iko’i hãndiva, 37 tẽvã japoma 84 ãño ĩme manoshia. Õhẽmbava tũpao vi, ara hareka pyhare karumbava, ñymbo’e Tũpape õmombairã. 38 Hãma akuapevaĩ Ana oujyve hãrã õñepyrõ meẽ gracia Tũpape hareka ijetahe sanjayre, opaite harõ’õva retape mupu’ãjy verã Jerusalén.

Sanjay Jesús Nazaretpe rahahajyrã vekua

39 Hãma opama japo ñee mbyparahava Ñandeja heivarã jyrahajy Galileape, hentare Nazaretpe. 40 Hãma sanjay syry oho hareka pyrãta, mbai kuaave oho seve, hareka Tũpa maĩkavihea ryheve.

Sanjay Jesús Tũpaope

41 Japoare jyrahañõi ãñomajyrã areterã Pascuape, Jerusalénpe. 42 Hãrã Jesús 12 ãñomã mbotyrã, opa jyraha reta Jerusalénpe jypykuaava rãĩmi hoka aretepe. 43 Tẽvã arete opamarã haire ohojyma henta kytyrã, mõndimba sanjay Jesús pyta hai Jerusalénpe japoare kuaambape. 44 Moãte Jesús oho’ive hetavare mbyteipirã, tuu hareka ishy pente ara kavi vata reta; haivi heka hentarãre hareka kuaavare mbyteipi; 45 tẽvã heshajyvyã reta. Hãma jyraha hekajy reta Jerusalénpe. 46 Haivi mbahapy aravape vãijyshu reta Jesús, tũpao pe vapy’ẽ Moisés mbypara vekua pyrỹmboi’iheare mbytepe, Jesús jasaka ñynoĩhe reta hareka pyrãndu ñynoĩshu. 47 Opaite hendushuare mbyrymaĩ reta, mbai kuaakue ĩmerea rehe hareka mbyhovai kaviterã. 48 Japoare heshamarã mbyrymaĩ reta; hãrã ishy heishu: Shymemby, marã’ĩrãra kyrãri yryhevi? Nderu hãndi hetama ndyrekaha vy’ambaa ryheve. 49 Jesús heishu reta: Marã’ĩrãra shyrekapi? Pikuããra aiñoĩ verã Sheru ña’ãpovare ẽvape? 50 Tẽvã haire kuãã mondo mbaivara he’ise hokava hei’ẽshuvare. 51 Haivi Jesús oujy hãndi reta Nazaret kyty, iko’iape japoshu reta hai heishuare. Tẽvã ishy pyape opa nãtu kova ñee. 52 Jesús syry oho’i mbai kuaakuepy hareka puku oho’iseve hareka Tũpa maĩkavihea ryheve hareka kuaretare jyvy’akue ryheve.