Luk 20 | TpjSC | STEP | Pente arape, Jesús mboi’ẽshu kuaretare tũpao pe hareka mbeu Ñee kaviva ryheva pyrỹmondo jepeva, vãhẽ jyveru pai ruvishare hareka Moisés mbypara vekua pyrỹmboi’iheare, hãndi karai kuakuavare.

Luke 20

Jesús ñymbaikatu

1 Pente arape, Jesús mboi’ẽshu kuaretare tũpao pe hareka mbeu Ñee kaviva ryheva pyrỹmondo jepeva, vãhẽ jyveru pai ruvishare hareka Moisés mbypara vekua pyrỹmboi’iheare, hãndi karai kuakuavare. 2 Hãrã heishu reta: Mbeu’ore mbaiva mbaikatu rupiira rijapo kova? Maĩrã, mbavara meẽ nde hokava mbaikatu? 3 Haipe Jesús heishu reta: She apyrãndupo jyvepe pente mãĩnũnga; pymbeushe, 4 mbavara mboushu Juan pyrỹmyngarai’i verã, Tũpa maĩrã kuaretare? 5 Haire õñepyrõ ijeta ijupi retarã hei: Mãrãrapo jaishu? Tũpa jairã, heipo ñande: “Marã’ĩrãra akuarã pyrojããmbashu?” 6 Hãrã kuaretare jaijyshurã, ko kuaretare ẽvã rãĩmi opapo pũã ñandyrehekui hãrã itape ñandukapo retakui; shara opavare roja Juan haiva Tũpa ĩñee mbeu’iarã. 7 Hãrã hei reta: Kuahaany, mbavara mbou Juan pyrỹmyngarai verã. 8 Jesús heishu reta: Akuarã ambe’uãpo jyvepe mãrãva ñymbaikatu rupiira ajapo kova mãĩnũngare.

Ñimĩty’iare heko porãmbava

9 Haivi õñepyrõ ijetaheshu kuaretare kova ñee ñymyhã’ãnga rupii: Pente kuareta ñoty uva jy’yvype, haivi porykashu jokuevare ju’uvarẽnda. Hãrã heta ara mbyry oho hentaivi. 10 Hãrã vãhẽma ara, uva’ia myno’õhãvaperã, mondo pente jokuehareirea ju’uva rẽndape, ña’ãpõva uva’ia verushu verã; tẽvã hetama nũpa reta hoka jokuehareirearã, iporãĩ mondojy reta. 11 Haivi koo ijarã’õ mondojy ynga jokuehareirea; tẽvã hokavape heta nũparã hareka mbaimbashuva rãĩmi japo retarã iporãĩ mondojy reta. 12 Haivi hykuaĩ mondojy mbahapyhea; tẽvã mba’apo õre opa mbypepererã mohẽjy reta haivi. 13 Kõñẽmahea uva rẽnda ija hei: “Mbaivarapo ajapo? Ãmondopo shyray ahaihuva; katupo hai mba’ẽã japohe retakui”. 14 Tẽvã mba’apo iare heshama retarã, heijyre ijupe: “Kova hai koo ijarã; jajuka, typyta ñandekui kova ña’ãpõrãtẽ vekua”. 15 Hãrã nohẽ reta uva rẽndaivirã, juka reta. Mbaivarapo akuarã pimõã japohe reta koo ijarã’õva? 16 Ohorapo opa jujuka mba‘apo’õva retape, hareka meẽraposhu ju’uva rẽnda yngavape. Haire henduma kovarã hei jyre: Avy kyrããva tiko! 17 Tẽvã Jesús maĩhe retarã hei: Akuarã, mbaivara he’ise Tũpa jykuatia mbyparavape ẽvã? Kyrã heiva: “Ita vasu, oo japose’iare mbijiche vekua rãnga ã’ẽ koñemahẽa ikoshi oo jypyrã”. 18 Shara ĩmerãẽã oava hokava ita ĩãrẽ, opaĩpo jejeka; hareka ĩme’ẽ oahevarã opa kavipo mungui.

Tũpa ña’ãpova hareka huvisha vasu ña’ãpova

19 Hãrã pai ruvishare hareka Moisés mbypara vekua pyrỹmboi’iheare haipevãĩ pota pysyka jyre Jesús, shara kuaa mondo he’iha ñynõihe kova ñee ñymyhã’ãngaperã; tẽvã japoã reta shara kyje jyreshi kuaretare. 20 Hãrã mondoshu reta kuimbai ñemiapeĩ mãĩ verã heko kavi rã’ãngava, sapy’aĩ ityshu verãre ĩñee rehe, haivi meẽ verã huvishavasu mbory’õre. 21 Hãrã kuimbaire ñemiapeĩ mãĩ’iare pyrãndushu Jesús: Pyrỹmboi’ia, kuaaha rãnga rereva hareka rỹpyrỹmboiheva haikavirã, rỹmãĩmbava mãrãvara hai, koñeĩ añetevape rỹpyrỹmboihe Tũpa hape. 22 Mbeu ore: Õĩñoira mbyhepyashu verã mburuvishavasu Cesar, maĩrã mba’ety? 23 Jesús kuaaĩ’ẽ pota ityrea kyrã hei ñynoĩshurã. Hãrã heishu reta: Marã’ĩrãra pota shiñonovaipi? ^{▼▼“Marã’ĩrãra pota shiñonovaipi?” Kova ñee mba’ety hai arykai mbypara vekuape.} 24 Shymbyheshakapi pente nikere. Mbava ha’ãngara hareka mbava heera ẽhe? Haire heishu: Mburuvisha vasu Cesar. 25 Jesús heishu reta: Pymeẽshu huvisha vasu Cesar ña’ãpova; hareka Tũpa pymeẽshu Tũpa ña’ãpova. 26 Hãrã vãhẽãshu reta ñee ityshu verã kuaretare hỹnonde; koñeĩ mbyrymaĩhe reta Jesús heiva, hãrã jasakaĩ reta.

Jesús ijeta hãndi Saduseore

27 Haivi Saduseore vãhẽ jyveru Jesús ẽvape haireta rãnga hei: “Mba’ety manova mbyteivi puãjy verã”. Hãrã heishu reta Jesús: 28 Pyrỹmboi’ia, Moisés rãnga mbypara heja ore kuatiape: Ĩme’ẽ pente kuimbai manorã, hyreko mymembyã hejarã, tyvyĩpo omendajyhe, mimoñashu verã tichey mano vekua. 29 “Shara ĩmemba’ẽ 7 kuimbai pente’ovare; tynõndeva omendarã, tẽvã manomba hĩjapombateriva. 30 Haivi tyryvy mokuehea omendajyhe taupe ĩme manoshia, hãrã hokava mano jyve hĩjapomba ryheve. 31 Haivi mbahapyhea tyryvy kyrãmĩjy; hãrã 7 õva kuimbaire opa mano hĩjapomba vekuare. 32 Hãrã kõñemahea taupe mano jyve”. 33 Hãma manovare kuerajyva arape, mbava hyrekorãrapokui ko taupe, shara 7 ia kuimbaire opaĩmba rekotẽ? 34 Hãrã Jesús heishu reta: Yvy’ĩãrẽ kuimbaire hareka taupere omenda. 35 Tẽvã Tũpa kuaapo mbava retarapo mbyhykovejykui; kova jehurã mbaveãmapo kuimbai hareka taupe omenda ijehekui 36 shara hykove japyvẽãmapo, Tũpa jokuevare rãĩmimapo hareka Tũpa tay hareka tajy rãĩmimapo, shara Tũpa opa mynguerajyshu reta. 37 Moisés teiva rãnga kuatia ñeepe ohohe heiva rãĩmi vycheri hãkã hendy õĩvi, kuaaka ñande manovare kuerajy verã. Haipe rãnga hei: Ñandeja; Abraham, Isaac hareka Jacob ñu Tũpa. 38 Tũpa ha’ẽã manova ñu Tũpa, koñeĩ hykove’iare ñu Tũpa; hai pevarã opavare hykoveshu verã. 39 Haipe a’ãmo Moisés mbypara vekua pyrỹmboi’iheare heishu: Pyrỹmboi’ia, haikaviny rereva rãĩmi. 40 Haipe mbaiveama kyrẽy pyrãndushu reta.

Mbava tayra Krito?

41 Hãrã Jesús heishu reta: Mbaiva rupiira he’iahe Cristo, David tayva? 42 Shara David teiva hei kuatia Salmope: Hei Tũpa, Shejape: “Vapy shakata kyty, 43 añonopeve ndyvaishorã’iare ndepy ẽvãpe”. 44 Marãrapo Cristo David tay, ko David teiva heishu “Sheja”?

Jesús mbeu mãrãva retara Moisés mbypara vekua pyrỹmboi’iheare

45 Hãma opava kuaretare hendu ñynoĩrã, Jesús heishu mboireare: 46 Pingareko pindijeheshi Moisés mbypara vekua pyrỹmboi’ihea retaivi, haire pya’ohe mondeva puku ryheve, pota vataha õĩpi marãnduhashu karai vasure rãĩmi; haire heka vapyhapya tynonde’õ Judiore ñymbatyseape hareka karuvasu õĩpi. 47 Hãma ĩme manoshi vekua hoore heky jyreshi, hãrã ñemipy verãre puku rã’ãnga ñymboi reta. Kovare hetaveepo nupãhãkui.