Luke 24

Jesús kuerajy

1Tynonde semana õñepyrõãpe, kõ’ẽĩ, taupere jyverujy reta tã’õvẽ ñonoãvape, raha reta mbai pisheka kaviva; myhẽvãjyre vekua; mi’ĩrũ jyveshu reta yngava taupere. 2Vãhẽ jyraharã, hesha reta mbysyryamashi ita jo’oa vekua juru mbotyhapya; 3iche reta, tẽvã heshãã Ñandeja Jesús hetekue. 4Opa kyje retarã kuaã mbaivarapo japo reta, hãrã haipe ijeshakashu reta mokue kuimbai mondea opa hĩmbipeva; 5kyjeite retarã opa ĩñesu reta, tẽvã haire heishu: Marã’ĩrãra pyhekapi manovare mbytepe hykovejya? 6Mba’ety kope, kuerajyma! Pymanduahe heipe vekua, Galileape teri’irã; 7heiva: Ko kuareta Tay me’ẽãñoĩ verã kuimbai heko porãmba’iare ipope hareka mbysavavaha kurusure tẽvã mbahapy arapepo kuerajykui. 8Haipe taupere manduahe Jesús hei vekua, 9jyrahajyma reta tã’õvere õĩvirã, mbeushu reta 11 mboire vekuare hareka opaite yngavare. 10Kova apostol mbeu vekua mboire vekua retape hai Maria Magdalena, Juana, Maria Jacobo ishy hareka taupere oho hãndivare. 11Tẽvã mbo’eare vekuare rojãã reta haire mbeuva, shara hãĩny heheitẽ’iare. 12Katy Pedro õhẽrã ñani oho, ita jo’oa vekua kyty, maĩ’i hapyperã tarapo tĩva ñomahapy vekuaĩ hesha, hãrã ohojy hentape mbyrymaĩ ryheve ko iko vekua rehe.

Emaus hape kyty

13Hoka arape mokue mboireare oho pente tenta Emaus he’iashuape, pytava 11 kilometro Jerusalénvi. 14Ijeta jyrahahe opaite iko vekuare; 15kyrã ijeta hareka pyrãndu jyraha ijupevapeĩ, Jesús teiva hesharã vata oho hãndi reta. 16Hesapetẽ’ẽvãre, kuãã reta shara ĩme’ẽ jochashiare. 17Jesús pyrãndushu reta: Mbaivara pijetapeihe pehupi? Mbo’eareare opa ñymbou reta yvy kytyĩ maĩ jyre. 18Hãrã penteva Cleofas he’iashua heishu: Haira neiiri Jerusalénpe ryvatava rikuaamba ko ara iko’õva? 19Jesús pyrãndushu reta: Mbaivara iko? Haire heishu: Jesús Nazareno ryheva, hai rãnga Tũpa ĩñee mbeu’ia, mbaikatupy japo’ia hareka ñeepy Tũpa hỹnonde hareka opaiteva henta’õre; 20hareka marãra pai ruvishare hareka mburuvishare meẽ reta jukaha verã, hãndi kurusure mbysavavaha verã. 21Tẽvã ore hãrõãteshi tenta Israel opa jorajy verã; tẽvã ã’ẽ mbahapy aramajy kova mbai ikova. 22Katy ã’ãmo taupere ikoha’i hãndiare opa mbyry ỹrỹmymaĩje, kõ’ĩmba jyraha reta ita jo’oavaperã, 23tẽvã heshããmba reta Jesús hetekue, hãma oujy retarã mbeu’ore reta Tũpa jokuevare ijeshakashuare, heishuare Jesús kuerajymava. 24A’ãmo ĩrĩ’ĩrũre jyraha ita jo’oa vekuape, haipe hesha taupere heiva rãĩmitei; tẽvã heshãã reta Jesús. 25Hãma Jesús heishu reta: Pee mbaimba pikuaava! Marã’ĩrãra pyndypya tantaĩte pyroja verã Tũpa ĩñee mbeu’iare hei vekua? 26Katuãra Cristo hasa’asyrãni mbai hasyva iche verã hĩmbipeape Tuu ẽvãpe? 27Hãma õñepyrõ Moisésvi hareka Tũpa ĩñee mbeu’iare hei vekuaivi, kuaakashu reta opaite kova mbai kuatia mbyparaa vekua heiva. 28Vãhẽserima oho reta tentape haire jyrahavaperã, Jesús japo mbyryve oho verã rãĩmi. 29Tẽvã haire jochajyreshu: Pyta orẽndie kope, ka’aruitema rãnga hareka pyntumapo’i. Hãma iche pyta hãndi verãre. 30Vapyma ñynoĩ hãndi mesaperã, heky pãhã, ohovasarã pysẽã meẽshu reta. 31Haipe hesare opa jypeajy hãrã kuajy reta Jesús, tẽvã hai maĩ ñynoĩheapeĩ opa kañy. 32Hãrã heijyre ijupe: Hendỹarambaje ñandypyape hai ijeta ou ñande pehupirã vekua hareka kuaaka ñande mbyparaha vekua? 33Haipevãĩmba pũã retarã ohojy reta Jerusalén kyty, haipe hesha 11 õre ñymbaty’ẽrã, hareka ñi’ĩrũre, 34haire heishu reta: Ãñete ñoĩ rãnga hykovejymba Ñandeja, hareka Simón ijeshakambashuje. 35Hãrã haire mbeu mbaivara jehushu reta pehupi, hãndi marãra haire kuaajyshu reta Jesús pãhã pysẽãrã.

Jesús ijeshakashu mboireare

36Haire kova ijetateri ñynoĩheva, Jesús ñymboyshu reta mbyteperã hei: Pyndypyavapyĩño. 37Haire opa kyje moã hesha reta tẽ’ãkuerã. 38Tẽvã Jesús heishu reta: Marã’ĩrãra opa pykyje? Marã’ĩrãra kyrã pimoã pyndypyape? 39Pymaĩ shepo hareka shepyre, sheñoĩ rãnga. Pypoko shyrehe hãrã shyreshapiko, espiritu rãnga ha’eã hai tyroo hareka kãvẽã pyheshava rãĩmi she arekova. 40Hoka opa heirã, mbyheshaka reta ipo hareka ipy. 41Tẽvã rojanungamba reta, vy’aite hareka mbyrymaĩ retarã; Jesús heishu reta: Ĩmera pyree kope jau verã? 42Haipe haire meẽshu pira mykã’ẽãva pysevẽ hareka hẽẽva, 43hãma hekyrã hou hỹnonde reta. 44Haivi heijyshu reta: Kova rãnga hai ãmbeupe vekua, ãĩmeteri’ãĩ pynymbyteperã, ikoñoĩ shyre verã Moisés mbypara vekuapy’õ hei shyreva hãndi Tũpa ĩñee mbeu’iare jy kuatiape hareka Salmo py’õ. 45Hãma peajyshu reta pyare kuaa verãre mbyparaha vekua, 46heishu reta: Kyrã rãnga mbyparaha Cristo mano verã hareka puãjy verã manovare mbyteivi mbahapy arape; 47hareka ñimiñe’ẽha verã hai heepe opa tenta retaipi, oujy verãre Tũpa kyty hai hejareishi verã mbai porãmba japo vekuare. Peñepỹrõhe Jerusalénvi. 48Pee rãnga hai pyheshava kova. 49Hãrã She amboupo pẽãrẽkui Sheru ĩñee meẽ vekua; tẽvã pypytakui ko tenta Jerusalénpe ou peve pẽãrẽ mbaikatu ouva vate araivi.

Jesús hupiajy

50Haivi Jesús rahashu reta Betania peve, haipe ipo hupirã ohovasashu reta. 51Ohovasa teri’ẽshua retapeĩ syry ohoshi retarã rahaha vate arape. 52Haire opama õmombaishu retarã, vy’ape oujy reta Jerusalénpe, 53hãrã haire tũpaopeĩ jyre pyrahe hareka ohovasashu verã Tũpa. Amén.