Luke 3

Juan Bautista ñimiñee yvy ikoambaipi

115 ãño pukukue Tiberio Cesar huvisha vasurã ẽẽ Romape, Poncio Pilato huvisharã ẽẽjyve Judeape, hareka Herodes Galileape, tyvy Felipe Itureape hareka Traconitepe, Lisania jyve, hareka Abilene. 2Anas hareka Caifas haiteri paire juhuvisharã, Tũpa ĩñee vãhẽshu Juan Zacarías tay yvy ikoambaipi; 3haivi Juan oho opaite yvy Jordanpi ñimiñee kuareta retape oujy verã Tũpa kyty, ñymyngarairã mbai porãmba hejahareishi verãre; 4heiva rãĩmi Tũpa ĩñee mbeu’ia Isaias jykuatiape: Pente ñee sapukeva yvy ikoambaipi: Pymyhevãshu Ñandeja haperã, pijaposhu pente pee symyiva. 5Opaite yvy pykõĩva tymynyheã, opaite yvyturusu hareka yvy ñakanduva opa timbivachehajy; pee ñapeva tymysymyihajy, hareka pe porãmba timbivachehajy. 6Opaite kuaretare heshapo, pyrỹmondojepeva Tũpa mbouva. 7Hãrã heishu hetavare ou ñymyngaraikashu verãre: Mboi ñymoña hãndiare! Mbavara hei pee pĩvãheshi verã ñunũpa vasu oumã’ẽverã? 8Piñymbyheko kavi, tyheshaa pyndyrehe ãñete peijyva Tũpa kyty, hareka avy pyndypya pimbijetarã pere: “Ore hai Abraham ñymoñaa hãndia”; ãñeteite hai pee Tũpa katuĩ japojyshi kova ita Abraham ta’yrãre. 9Hareka hasha ẽẽma, jasyjaha verã yvyrare hapoivive, opaite yvyra’ia porãmba jasyjaharã mombohapo tatape. 10Haivi kuaretare pyrãndu jyreshu: Mbaivara akuarã japohapo? 11Hãma Juan heishu reta: Mondeava mõkuerea tymeẽjyveshu pente mba’etyrea; hareka kyrãi tijapo jyve hou verã imẽrea. 12Oujyve kyrypoti mbatyse’iare Roma pevarã ñymyngaraika verã, hãrã pyrãndushu reta Juan: Pyrỹmboi’ia, orera mbaiva japoapojyve? 13Hãma Juan heishu reta: Avy’iãrẽve pekora, pekora verãivi. 14Ĩme’ẽ jyve syndarore pyrãndushurã heiva: Ore jyveno, mbaivara japoapo jyve? Hãrã Juan heishu reta: Avy mbava pyheky reiishi mãinunga, hareka avy pereshu pijapohe verã porãmbava, avy pymbojareihe yngare, avy japu piporyjyhe, hãrã pyvy’ãi pijapova hepy me’ẽãpeva ryheve. 15Hãma kuareta ñymbaty’õre, pya mbijeta jyre Juan reherã hei: Kova ha’ẽãra Cristo; 16tẽvã Juan hei kuareta retape: Ãñeteara she apyrỹmyngarai yype; tẽvã ĩme’ẽ pente ouva shaykue mbaikatu ĩmevere shyheviva, katumba ajorashia jypasa ishãitẽã. Haipo pynymyngaraikui Espiritu Santo hareka tatapy. 17Imẽmare ipope mbyvevepy verã hareka mypõti verã trigo hãy, hekyshi verã kapii, haivi hã’ykue natupo hyrupe, tẽvã hapypo kapii tatapy ovemba verãpe. 18Kyrã Juan ijetashu hareka heta ynga arakuaa mbeushu kuaretare, hareka Ñee kaviva. 19Juan ĩñee pohyshu huvisha Herodes shara hyrekorãre Herodias, tyvy Felipe hyreko, hareka heta mbai porãmba japo vekua rehe; 20Herodes katy hendutẽ verã mi’iruvejy kovape mbai porãmba japo vekua: Raha Juan mby peresoka.

Jesús ñymyngaraika

21Iko kuaretare, opama ñymyngarairã, Jesús ñymyngarai jyve; hãrã ñymboirã vate arapy jypea. 22Haipe ijyhesha vejy Jesús iãrẽ Espiritu Santo pykasu rãĩmi, haivi iñyhendu vate araivi pente ñee heiva: Nde hai Shyray ahaihuva, ndyrehe shypya hory.

Jesús tynondeshi vekuare

23Jesús 30 ãño marerã õñepyrõ mba’apo. He’iahe José tayva, Eli tay, 24Eli haimba Matat tay, Matat haimba Leví tay, Leví haimba Melki tay, Melki haimba Janai tay, José haimba Matatias tay, 25Matatias haimba Amos tay, Nahum tay, Nahum haimba Esli tay, Esli haimba Nagai tay, 26Nagai hai Maat tay, Maat hai Matatias tay, Matatias hai Semei tay, Semei hai José tay, José hai Juda tay, 27Juda hai Joana tay, Joana hai Resa tay, Resa hai Zorobabel tay, Zorobabel hai Salatiel tay, Salatiel hai Neri tay, 28Neri hai Melki tay, Melki hai Adi tay, Adi hai Cosam tay, Cosam hai Elmadam tay, Elmadam hai Er tay, 29Er hai Josue tay, Josue hai Eliezer tay, Eliezer hai Jorim tay, Jorim hai Matat tay, 30Matat hai Leví tay, Leví hai Simeon tay, Simeon hai Juda tay, Juda hai José tay, José hai Jonan tay, Jonan hai Eliakin tay, 31Eliakin hai Melea tay, Melea hai Mainan tay, Mainan hai Matata tay, Matata hai Natán tay, 32Natán hai David tay, David hai Isai tay, Isai hai Obed tay, Obed hai Booz tay, Booz hai Salmon tay, Salmon hai Naason tay, 33Naason hai Aminadab tay, Aminadab hai Aram tay, Aram hai Esrom tay, Esrom hai Fares tay, Fares hai Juda tay, 34Juda hai Jacob tay, Jacob hai Isaac tay, Isaac hai Abraham tay, Abraham hai Tare tay, Tare hai Nacor tay, 35Nacor hai Serug tay, Serug hai Ragau tay, Ragau hai Peleg tay, Peleg hai Eber tay, Eber hai Sala tay, 36Sala hai Cainan tay, Cainan hai Arfaxad tay, Arfaxad hai Sem tay, Sem hai Noe tay, Noe hai Lamec tay, 37Lamec hai Matusalen tay, Matusalen hai Enoc tay, Enoc hai Jared tay, Jared hai Mahalaleel tay, Mahalaleel hai Cainan tay, 38Cainan hai Enos tay, Enos hai Set tay, Set hai Adan tay, Adan hai Tũpa tay.