Luke 4

Ãña pyahãshu Jesús

1Jesús Espiritu Santo tynyhe ryheve, oujy ysyryva Jordanvi hãrã Espiritu Santo rahashu yvy ikoambaipi. 2Haipe pyta 40 ara kavi, hãrã Ãña pyarããshu. Mbaimba houva hokava arape, hasamarã ñymbahy ñandu. 3Ãña heishu: Nde ãñete hai Tũpa Tayrã, ereshu ko ita tikoshi pãhã. 4Jesús heishu: Mbyparahavape rãnga hei: “Ha’eã rãnga pãhãreĩ kuareta hykove’i verã, opaite Tũpa ĩñeere rãngapo jyve”. 5Haivi ãña rahajyshu pente yvyturusu’ĩãrẽ, hãrã mbyheshaka sapy’aite opaite tenta huvisharã yvy‘iãrẽ’õre. 6Hãrã Ãña heishu: She ameẽpo ndekui ko mbaikatu hareka hĩmbipe. Shara opa me’ẽãshe kovare, hãrã pota ameẽvapepo ameẽ. 7Opapo na’ãporãkui rĩñesu shynonderã, hareka shemombairã. 8Jesús heijyshu: Syry shyhevi, Aña, shara kuatia mbyparahavape hei: “Ñandeja nu Tũpapepo rĩñesu rẽmombai, hareka haireñõĩpo reĩ”. 9Haivi Ãña rahajyshu Jerusalénpe, haipe hupishu tũpao ‘iãre vateve’õpe, hãrã heishu: Nde hai Tũpa Tayrã, epo koivi! 10Shara kuatia mbyparahavape hei: Tũpa mboupo jokuevare ñyngareko ndyrehe verã. 11Ipope ndypysypo reta potãã ita ndepy ryrokuaherã. 12Tẽvã Jesús heishu: Kuatia mbyparahavape heijy: “Avy pya hããshu Ñandeja nu Tũpa”. 13Hãma Ãña vãhẽveãmashu marãraporejy Jesús pya hã’ãveshurã, oho poshyjyshi.

Jesús õñepyrõ mba’apo Galileape

14Hãma Jesús oujy Galileape Espiritu Santo ñymbaikatu tynyhekuepy ryheve, hãrã opa rupi kuaaha hokava yvyipi. 15Pyrỹmboi Judiore ñymbatyseape, hareka opavare õmombaishu.

Jesús Nazaretpe

16Jesús oho Nazaretpe, mbykuakuaa vekuape, hareka putu’uava jy’arape iche Judiore ñymbatyseape hai jypykuava rãĩmi, hãrã ñymboyrã mbijeta mbypara vekua. 17Hãrã meẽshu reta Tũpa ĩñee mbeu’ia Isaias mbypara vekua, haivi pearã vãheshu heiva: 18Ñandeja je Espiritu ẽẽ shearẽ, hai shymbyheko kavi ãmbeuverã Ñee Kaviva pavete’ia retape. Shymbou amynguera verã ojepy‘apy’iare; amohẽjy verã mbypereso vekuare, hareka heshajy verã kũvaĩpi heshambare; apoikajyshi verã jopya porãmba’õre; 19ãmbeu verã Ñandeja pyakavi ñy’ãño. 20Hãrã Jesús mbotyjy kuatia, meẽjyshu pyrỹmbory’ia Judiore ñymbatyseape’õrã vapyjy; hãrã opaite Judiore ñymbatyseape ẽvãre maĩtei jyrehe. 21Jesús õñepyrõ heishu reta: Ã’ẽ ikoma kova mbyparaha vekua pynynonde. 22Opaiteva ijeta kavihe Jesús, hãrã mbyrymaĩhe reta mbai kavikuere heiva rehe hareka hei reta. Ha’eãra kova José tay? 23Jesús heishu reta: Ĩmerã pereposhe pente ñee ñymyhã’ãnga heiva: “Pyrypyhano’ia, ndeii ñymynguera”; “Heta mbai henduha rijapo vekua Capernaumpe, japo jyve ko ndy’yvype”. 24Jesús heijy: Ãñete hai pee, mba’etypo Tũpa ĩñee mbeu’ia haihuhava hentaipi. 25Ãñete hai pee, heta taupe ĩme manoshia ẽẽ arykai Israelpe Tũpa ĩñee mbeu’ia Elías jy’arape, 3 ãño hareka ova jasy kavi haiviã’irã, hareka ñymbahy vasu ẽẽ opaite yvy retaipi; 26katynga, Tũpa mondoã Elías taupe ĩme manoshiare ẽvape, koñeĩ pente taupe ime manoshia Sareptape’ia õpe, Sidón hyvache’õ. 27Heta’ẽjy kuru porãmbava Israelpe Tũpa ĩñee mbeu’ia Eliseo jy’arape; tẽvã mba’ety haire mbytepe’õ mynguerahava, koñeĩmba Naamán Siriape’õ. 28Kova hendu retarã, Judiore ñymbatyseape’iare opa poshy reta. 29Opa puã retarã mõhe reta Jesús tentaivi, hãrã raha reta yvyturusu’iãre mupuãva hai hentare, haivi mombo verãre yvy kyty. 30Tẽvã Jesús haire mbyteipi hasarã, hãrã ohoshi reta.

Pente kuimbai mbaiposhy ĩmere vekua

31Haivi Jesús oho Capernaumpe, tenta Galileape’õ, hãrã mboishu kuaretare pente putu’uava jy’arape. 32Hãrã mbyrymãihe reta hai pyrỹmboiva rãĩmi, shara mbaikatu ryheve ijetashu retarã. 33Hãma Judiore ñymbatyseape ĩme’ẽ pente kuimbai mbaiposhy ĩmerea, hỹnatu sapuke’iva. 34Mã’ẽi yryrehe! Marã’irãra rỹmai yryrehe Jesús Nazareno? Reirapo opa õrẽhũndi? She arykuaa mbavara nde: Nde hai heko kyambava Tũpa mbouva! 35Jesús poshy ryheve heishu mbaiposhy: Jasaka, ẽhẽshi ko kuimbai! Haivi mbaiposhy mombo yvype kuimbai, hetavare mbytepe, hãrã õheshi mbaimba japoheape. 36Opa kyje retarã hei jyre ijupe: Mãrãva ñeerajy kova, hỹnaãtu ijetashuva hareka mbaikatu ryheve mbaiposhy retape, hãrã haire õhe! 37Hãrã opa rupi mbe’uha rahaha hai japova, hokava yvy retaipi.

Jesús mynguera Simón haisho

38Hãrã Jesús õhe Judiore ñymbatyseavirã oho Simón hentape, haisho ñymbairasy’õpe hareka haku japyrahava. Jurure jyreshu Jesús mbory verãre. 39Jesús jyroa’ĩãrẽrã poshy ryheve heishu takukue, hãrã hakukue opashi. Haivi hai puãravi hareka ñyngarekohe reta.

Jesús mynguera heta ñymbairasyva

40Kuarasy ichema’ia, opaite ñymbairasyvare hareka mbairasy opaisharei vekua rahashu reta; hãrã hai pepenteĩ ipo ñono’iãrẽrã, opa mynguera. 41Heta ñymbairasy vekuaivi õhe jyve mbaiposhy sapuke jyrerã hei reta: Nde hai Tũpa Tay. Tẽvã Jesús poshy ryheve ijetashu reta hareka mã’eĩahe ijeta reta, shara haire kuaa Cristorã.

Jesús ñimiñee Judiore ñymbatyseape

42Kõĩma ourã Jesús õhe oho tentaivi hãrã oho hã’ĩ ẽẽ verãpe. Tẽvã kuaretare heka jyre vãheshu peve. Pota jochajyre, potã ohoshi retarã, 43tẽvã Jesús heishu reta: Ambeu ñoĩrãngapo jyve tenta yngaty’õ retape Ñee Kaviva Tũpa ẽvãpe’õ ryheva, shara ha’erã shymbouha. 44Kyrã Jesús ñimiñee’i Judiore ñymbatyseapi.