Luke 5

Pira heta nohẽava ryheva

1Pente arape Jesús ẽẽ yyvasu Genesaret hymbeype, kuareta jahe vekua jasoi, hendu verãre Tũpa ĩñee. 2Jesús hesha mokue kanoa mbaimba’ẽpya hareka pira nohẽ’iare opama vejyshia, johe verã jypysare. 3Jesús jupi penteva kanoape Simón ña’ãpoapy, haivi jurureshu mbyry katu ñono verã yy hymbeivi. Haipe Jesús vapy kanoaperã, haivive õñepyrõ ñimiñeeshu kuaretare. 4Opama ñimiñeerã heishu Simón: Raha nycanoa yy typyve õpe, haipe pymombo pyndypysare pynohẽ verã pira. 5Simón heishu: Pyrỹmboi’ia, jypyhahare rãnga mba’apoha, tẽvã mba’ẽa nohẽha. Katynga nde reresheva rupiipo araha amombojy pysa. 6Hãrã kyrã japo reta, itymapy reta pysarã heta mboa reta pira, hãma jypysare ajete opaite myndoroshi reta. 7Hãrã õñepyrõ hẽno reta ñi’ĩrũre ĩme ñynoĩva ĩrũ kanoape, ou mboryshu verãre. Hãrã jyverurã, opa mynyhe reta mokue’õ kanoa, ajejetei ñapyvyĩshi reta ñykanoare. 8Simón Pedro, heshama kovarã, iñesu Jesús hỹnonde hãrã heishu: Syry shyhevi, Sheja; she rãnga hai heko porãmba. 9Shara hai hareka ñi’irũre opa mbypy’ãã reta pira nohẽvare rehe. 10Kyrãĩ jyve Jacobo hareka Juan Zebedeo tayre, Simón ñi’irure. Tẽvã Jesús heishu Simón: Avy kyje; ã’e haimapondekui kuaretare nohẽ’ia. 11Haivi verujyma kanoa yy hymbey perã. Opa heja reta jyraha hipi Jesús.

Jesús mynguera pente kuru porãmbava

12Iko Jesús imeteri’ẽ pente tentaperã, vãhe oushu pente kuimbai kuru porãmbava, hãrã heshama Jesús perã, iñesu hỹnonde hova yvyre ñono hareka jurure asyshurã heishu: Sheja, ripotarã, shymynguerapo. 13Haipema, Jesús ipo mondoshurã, pokohe, hãrã hei: Aipota rãnga! Arỹmynguera! Hokava opa heirã kuru porãmbava opa kañyshi. 14Hãma Jesús heishu: Avy mbavape mbeukui. Koñeĩpo reho rijeshakashu pai, hareka raha meẽ opama ndoheava Moisés hei vekua rãĩmi, opavare hesha verã rykueramava. 15Tẽvã haipe Jesús kuaahave raha opa rupi, hareka heta kuareta ñymbaty jasakahe verãre ĩñee, hareka ñymyngueraka verã mbairasykueivi. 16Tẽvã Jesús ohoshi reta mbamba’ẽẽvaipi, haipima ñymboi.

Jesús mynguera pente vatamba

17Pente arajyape Jesús pyrỹmboi evãpe, vapy ñynõi haipe fariseore hareka Moisés mbypara vekua pyrỹmboi’iheare ouva opaite tenta Galilea, Judea hareka Jerusalénvi. Hãrã Ñandeja ñymbaikatu ẽẽ hãndi pyrỹnguera verã. 18Haivi õhe ou kuimbaire veruva hupa ryheve pente kuimbai vatamba, hãrã õñehãtẽ minjejyre oo’ipe, ñono hỹnonde verãre Jesús. 19Tẽvã vãheãshu reta mãivi rapo minje shara kuaretare hetaiterã; hãrã jupi reta oo’iãrẽrã heky reta teha, haivima mbyvejy reta ñymbairasyva hupa ryheve haire mbytepe Jesús hỹnonde. 20Jesús heshama haire jyrojakuerã, hei ñymbairasyvape: Kuimba’e, mbai porãmba rijapo vekua hejareima ndyhevi. 21Hãrã Moisés mbypara vekua pyrỹmboi’iheare hareka fariseore pyapei hei jyre: “Mbavarajy ko Tũpare ijeta porãmba’ia? Mbavara katu hejareii mbai porãmba vekua? Koñẽĩi ranga’ẽ Tũpa”. 22Tẽvã Jesús opaĩ kua ẽẽ haire pyape hei õrã pyrãndushu reta: Marã’irãra kyrã pypya pimbijetapi? 23Mbaivara javaiã jai: “Mbai porãmba rijapo vekua hejareima ndyhevi”, maĩrã “Puã, vata”? 24Aheshakapo pee kuareta Tay, ime’are mbaikatu ko yvy’iãre, hejareii verã mbai porãmba. Haivi Jesús heishu kuimbai vatamba: Pũ’ã, hupi ndurupa hareka ekuajy nyrẽtape. 25Haipevãi vatambaa puã hỹnonde reta, heky hupa ñeno’ipyarã ohojy hentape õmombaijy oho Tũpa. 26Opaite mbyry mãi reta, hãrã õmombaivasu reta Tũpa, haivi kyje ryheve hei jyre: Ã’ẽ mbai haikaviteveva jahesha.

Leví henoharã vekua

27Kova mbai oparã Jesús ohojy. Haivi hesha pente kyrypoti mbatyse’iare Roma pevarã, Leví he’iashua, vapy ẽẽ mesape okorase’õpe. Jesús heishu: Eive shaykue. 28Leví puãrã opa heja, hãrã oho hipi. 29Haivi Leví japo karuvasu hentape Jesús pevãrã, heta’ẽjyve kyrypoti mbatyse’iare Roma pevarã, hareka ynga kuaretare vapy ñynoĩ hãndi mesape. 30Tẽvã Moisés mbypara vekua pyrỹmboi’iheare hareka fariseore ĩñee mombo jyrehe Jesús mboireare hãrã heishu reta: Mãrã’irãra pykaru hareka piñymbyu hãndi kyrypoti mbatyse’iare Roma pevarã, hareka mbai porãmba japo’iare hãndi? 31Jesús mbyhovaishu reta: Mambaimba’ia ikoteveãhe pyrỹpyhãno’iare, koñeĩ ñymbairasy’ivãi. 32She aiã aheno heko kavivape, heko porãmba’ia retapei, oujy verãre Tũpa kyty.

Jesús pyrãndushu reta karumbaa ryheva

33Heishu reta Jesús: Juan Bautista mboireare hareka fariseore poiã karumbape jyre hareka ñymbo’e reta, tẽvã rymboiryreare poiã karu hareka poiã ñymbyu hai reta. 34Jesús heishu reta: Katurapo pee pymyngaruã henohakavare omendava ẽvape, temerã imeteri ñynoĩ hãndirã? 35Tẽvã vãhe pokui ara temerã rahahajyshi verãre, hãmerãpo hoka arape karumbape ñynoĩkui. 36Jesús heijyshu reta kova ñee ñymyhã’ãnga: Mba’ety chĩchiva pente mondeava py’ahuva pyseve mbojahe verã mondeava tujava. Kyrã japorã myporãã mondeava py’ahuva; hareka py’ahuva porãã’ẽẽjy tuja vekuare. 37Kyraijy mba’ety ñonova vino py’ahuva vakapi tujavekuapy, shara vino py’ahuva myndoropo vakapi tujavekua, haivi jyvarereipo ijehe vino hareka vakapi. 38Shara vino py’ahuva mbyhyruañõipo vakapi py’ahuvapy. 39Mba’ety vino tuja’õ houmava, kyrẽy houjy verã vino py’ahuva, shara heiñoĩpo: “Tujava kapyryvehai”.