Luk 7 | TpjSC | STEP | Jesús opa ñimiñeeshu kuareta retarã, oho Capernaúmpe.

Luke 7

Jesús mynguera pente huvisha Romano jokuerea

1 Jesús opa ñimiñeeshu kuareta retarã, oho Capernaúmpe. 2 Haipemba ẽẽ 100 syndaro huvisha Romape’õ ĩmerea pente jokuereirea haihuva, hai ñymbairasy hareka mano verãĩma’õ. 3 Hãma hendu hoka huvisha Jesús he’iahevarã, mondo ẽvãpe kuakuavare Judio ryheva, heta jurure’asyshu reta ou mynguerã verã jokuereirea. 4 Haire ñymboja Jesús ẽvãpe hãrã heta jurure’asyshu retarã hei: Haikavi rãngapo rỹmborytẽ jyve kova huvisha; 5 haihu rãnga ñanyrẽta, hareka haiteiva japoka ore Judiore ñymbatyseape. 6 Hãrã Jesús oho hãndi reta. Tẽvã mbyryveãma’ẽshi hoorã, huvisha mondo ñi’ĩrũre Jesús ẽvãpe he’ikashu: Yreja, mãhe porãã’ẽ ndekui, she rãnga shyreko porãã riche verã sherope; 7 hãme rãnga sheteivãã ahaje rẽĩvape. Ereĩshu pente ñee hãrã ajokue’area kuerapo. 8 She rãnga ãĩ jyve mburuvisha ipope, hãrã ĩme are jyve syndarore shepope. Haishu penteva oho verãrã, oho; hãma ĩrũre haishu ou verãrã, ĩme’ẽ ajapokashu verã jokuehareirearã, japo. 9 Jesús hendu Centurion ĩñeerã hesharãite, hãma mãihe mi’irũrea retarã hei: Añeteva hai pee, Israelvare mbytepe aheshãteri kyrãĩte jyrojava ko kuimbai rãĩmi. 10 Oujy huvisha hentape jokueava retarã, hesha jokuehareirea ñymbairasyva kuerama.

Jesús mynguerajy ĩme manoshia memby kuimbai

11 Haivi Jesús oho pente tenta Nain he’iashua kyty, mi’ĩrũshu mboireare hareka kuaretare hetava. 12 Vãhẽserima jyraha tentaperã hesha rahaha pente manova ñotyã verã, ime manoshia memby kuimbai koñeĩrea. Heta haipe henta ĩrũre mi’ĩrũshu ime manoshia. 13 Ñandeja hesha taupe ime manoshia, parekoiterã heishu: Avy jaheo. 14 Jesús ñymbojaherã pokohe ta’õvẽ ẽpya; haipe rahavare opa ñymboy. Jesús heishu: Kunumi, She hai nde: Pu’ã! 15 Haipe kunumi mano vekua puarã õñepyrõ ijeta, haivi Jesús meẽjyshu ishy. 16 Heshama reta kovarã, opa kyje reta hãrã õmombaishu reta Tũpa, hei jyre: Pente Tũpa ĩñee mbeu’ia mbaikatuva puã ñanymbytepe. Heijy reta: Tũpa ou mbory henta ĩrũre. 17 Hãrã opaite Judea hareka juri’õ retaipi kuaaha Jesús japova.

Juan Bautista jokuevare

18 Juan hendu opaite kova mbai, shara mboireare mbeushu, haivi hẽno mõkue hai mboireare, 19 mondo Jesús ẽvãpe pyrãndushu verã, haira nde Cristo ou verã, maĩrã ĩmera’ẽjy ynga hãrõa verã? 20 Hãmã Juan jokuevare vãhẽ Jesús ẽvãperã heishu: Juan Bautista rãnga yrỹmbou pyrãnduha nde verã, haira nde Cristo ou verã maĩrã imera’ẽjy yngava hãrõa verã? 21 Haipe kavi Jesús mynguera heta ñymbairasy vekua, iko asyva, hãndi mohẽ mbaiposhyre, hareka heta mynguera heshamba kuvãipiare. 22 Haivi Jesús heishu reta: Pekua pymbeushu Juan ko pyheshava hareka pyhenduva. Pymbeushu marãra heshamba kuvãĩpia, heshajy; vatajymba’iare, vatajy; hete kuru porãmbavare, myngueraha; japysamba’iare, hẽndujy; mano vekua, kuerajy; hareka pavete’iare mbe’uashu Ñee kaviva. 23 Vy’apo poimba jyroja shyreheva. 24 Juan jokuevare opajyma ohorã, Jesús õñepyrõ ijeta Juan reherã hei: Mbaiva pyhesha verãra peho yvy ikoambaipi? Takuara yvytu mbyvava õra? 25 Mbaivara akuarã peho pyhesha? Pehora pyhesha pente kuimbai ñimimonde kavi’ia? Pee pikuaa, ñimimonde kavi’ia hareka vy ‘ape’ia, huvisha vasu hoo ipi’ia hai. 26 Mbaivara akuarã peho pyhesha? Pente Tũpa ĩñee mbeu’iara? Kyrã she hai pee, pyhesha pente mbai vasuveva Tũpa ĩñee mbeu’iaivi. 27 Juan rehe rãnga Tũpa Ĩñee ijetaherã hei: Amondo ajokueva nynonderã, ndyraperã myhẽva verã. 28 She hai pee, mba’ety kuimbaire mbytepe mbai vasuveva Juan Bautistaivi; tẽvã mishiveva Tũpa ẽvãpe’õ ryheva, mbai vasuvepo shi hai. 29 Opaite kuareta henduvare hareka kyrypoti mbatyse’iare Roma pevarã ñymyngaraikashu reta Juan, kuaakavi mondo reta Tũpa heko kavivarã. 30 Fariseore hareka Moisés mbypara vekua pyrỹmboi’iheare, ñymyngaraikamba shuare Juan, mbijicheĩmã ijuhuvi haire pevarã Tũpa potãtẽ japoheare. 31 Jesús heijy: Mbaiva rera ambivachepo ko kuaretare ã’ẽ vare? Mbaivapera ova? 32 Oova sanjayre vapy jyvavare’õre plazape, sapuke jyreshu ñi’ĩrũ retarã hei: “Mbopuape mimby, tẽvã pirokyã; pyraheape mbyrahe pavete ova, tẽvã pijahe’oã”. 33 Ou Juan Bautista, houmba pãhã hareka vino; tẽvã pee pereshu mbaiposhy ĩmerea. 34 Haivi aijyve, kuareta Tay karu hareka hauva vino, hãrã pereshu: Karuiteva hareka ka’uiteva, ñimi‘ĩrũ’ihea heko porãmba hareka kyrypoti mbatyse’iare Roma pevarã hãndi. 35 Tẽvã Tũpa mbai kuaakue ijyheshahe mbai japo kavi vekua rupii.

Jesús oho Simón fariseo hentape

36 Pente fariseo jurureshu Jesús oho karu verã hentape, hãrã oho vapy ẽ mesape karu verã. 37 Haivi pente taupe heko porãmbava hoka tentape ia, kuama Jesús oho karu fariseo hentaperã, vãhẽ ou pente mbai hyru ryheve tynyhẽ’õ mbai pisheka kavi. 38 Jaheo ryheve vãhẽ Jesús ẽvãpe, hãrã saypeĩ ipy joheshu. Haivi ñakahaapy mitĩnishu, pyterã hareka ñonohẽ ipyre mbai pisheka kaviva. 39 Fariseo jurureshu vekua Jesús oho karu verã heshama hokavarã hei pyape: “Ko kuimbai ãñete hai Tũpa ĩñee mbeu’iarã, kuaatẽ verã mãrãva tauperã poko’ẽhe, taupe heko porãmba rãnga hai”. 40 Haipe Jesús heishu fariseo: Simón, ĩme are pente mbai hai nde verã. Fariseo hei: Mbeushe, pyrỹmboi’ia. 41 Jesús heijy: Mõkue kuimbai meẽjytẽshu verã kyrypoti porykashua. Penteva oreveshu 500 nikere repy, ĩrũ 50 ara repy. 42 Katuveama meẽjy retarã, kyrypoti porykava mokueveape hejareishi reta. Ã’ẽ mbeusheno: Mbavara mokue’õ retaivi haihuveposhu? 43 Simón hei: She pevarãra hetave hejareishi vekua. Jesús heishu: Ãñete rãnga rereva. 44 Jesús mãihe tauperã heishu Simón: Ryheshara ko taupe? Aicheje ndero’ipe tẽvã rỹme’ẽã sheje yy shepy ajohepy verã; tẽvã ko taupe saypeĩ shepy johe, hãrã mitĩnijy ñakahaapy. 45 Nde shypytẽa je shy mãrãndurã, hainy iche ourãvãi poia pyte shepy mokue ryheve. 46 Rykytyã je shãkare asaite, hainy ñohẽ mbai pisheka kaviva she pyre. 47 Hãme rãnga hai nde, heta mbai porãmba japo vekua hejareiimashi, shara pyryhaihuite; tẽvã kuareta mishĩĩ hejareiiva, mishĩĩ heshaka jyhaihu. 48 Haivi Jesús heishu taupe: Mbai porãmba rijapo vekua hejareiima ndyhevi. 49 Hãrã ĩrũre mesape ẽẽ hãndiare, õñepyru hei ijupe: Mbavarajy ko kuimbai mbai porãmba vekuaave hejareiiva? 50 Tẽvã Jesús heishu taupe: Rirojarã rehojepema, kapyryĩ ekuajy.