Mark 10

Jesús pyrỹmboihe omendatẽã poijy ijuhuvivare

1Jesús õhẽ Capernaumvirã oho Judea kyty, hareka yvy ẽvã kuarasy õhẽãivi yy syryva Jordanpe. Haipe kuaretare jatyjyhe, hãrã hykuãi mboijyshu reta, hai japosea rãĩmi. 2Haipe ñymbojahe fariseore pya hããshu verãrã pyrãndushu reta, katura pente temẽ poishi hyreko. 3Hai pyrãndushu reta: Marãra hei pee aryka’e Moisés? 4Haire hei: Moisés mbypara vekuape rãnga hei, pente kuimbai katu poishi hyreko, meẽshu kuatia poishia ryhevarã. 5Haivi Jesús heishu reta: Pyndypya tãtaivi rãnga, Moisés kyrãmba mbyparape kova ñeẽ japoa verã. 6Tẽvã jypyiterãvãimba Tũpa japo “kuimbai hareka taupe”. 7“Hãrã kuimbai hejapo tuu hareka ishy, iko hãndi verã hyreko, 8hãrã mokue’iare pente tyro’oĩma ikoshi”; hãrã jyrekovare mokueveama’i, penteĩ’õ rãĩmima ikoshi. 9Hãrã Tũpa mypentevare katuã kuareta mbypoikajy ijuhuvi. 10Ĩmema ñynoijy hentaperã, Jesús mboireare hykuaĩ pyrãndujyshu reta hokava ryheva. 11Jesús heishu reta: Ĩme’ẽ kuimbai poishia hyrekorã yngava rekojya, mbai porãmba japohe tynondeite rekotẽ vekua. 12Ĩme’ẽ taupe ĩme poishia yngava kuimbai rekojya, mbai porãmba japohe tynondeite rekotẽ vẽkua.

Ñee kavikue Jesús mombohe sanjayre

13Haivi Jesús veruhashu sanjayre pokohe verãre; tẽvã mboireare poshy jyreshu veru’õre. 14Jesús hesha hokavarã poshype heishu reta: Pyma’ẽĩhe sanjayre tou shyrẽndape, avy pijocha; shara haire rãĩmivã retaĩpo ichekui Tũpa ẽvãpe. 15Añeteĩteva hai pee, ĩme’ẽ myvãhẽmbava Tũpa ẽvãpe’õ ryheva pente sanjay rãĩmirã, icheãpo vate arape. 16Haivi hupi sanjay retarã, ipo ñono ĩãrẽrã, heihe reta ñee kavikue.

Pente kunumi ikokatuva ijeta hãndi Jesús

17Jesús ohojyma verã, ñani ou pente kuimbai, ĩñesu hỹnonde hareka pyrãndushu: Pyrỹmboi’ia heko kaviva, mbaivarapo ajapo apity verã tykove opambava? 18Jesús heishu: Marã’ĩrãra rereshe heko kaviva? Mba’ety rãnga heko kaviva, koñeĩ’ẽ Tũpa. 19Rikuaa kavi rãnga ñeẽ japoa verã: “Avy jyrekomava pokojyhe, avy puruka, avy manarõ, avy ijetareiihe ndapisha, avy ndapu; japo nderu hareka ndesy heindeva”. 20Haivi kuimbai hei: Pyrỹmboi’ia, shukunumipevãĩ rãnga opa ajapo kovare. 21Jesús jyhaihukue ryheve maĩherã heishu: Pente mbai mba’etynde rijapo verã. Ekua, opa ẽvende ĩmeryreare, hãrã hepykue memeẽshu pavete’iare. Hãmerãpo ripitykui mbai hetava vate arape’õ; haivi ei shimi’ĩrũ. 22Tẽvã hai, hokava hendurã mbypy’ã, hãrã vyamba ryheve ohojy, shara hai ikokatu. 23Jesús maĩhe juri’õ retarã heishu mboireare: Javaiveposhu ikokatuvare iche verã Tũpa ẽvãpe! 24Mboireare myngyje kova mbai hendu retarã; tẽvã Jesús heijyshu reta: Shyrayre, javaive rãngashu pente kuareta ikokatukueĩ jyroja’ihea iche verã Tũpa ẽvãpe. 25Javaiãve rãngashi hai kamello hasa verã ju sakuaipi, ikokatuvare pevarã, iche verã Tũpa ẽvãpe. 26Kova mbai mboireare hendu retarã kyjeitevejy reta, haipe pyrãndu ijupe reta: Akuarã, mbavatẽpo ohojepekui? 27Jesús maĩhe retarã hei: Kuaretare pevarã javaishu hai hokava; tẽvã Tũpa pevarã javaiã; shara Hai pevãrã mba’ety katumba. 28Haivi Pedro heishu: Ore rãnga opa mba’e hejaha, ouha ndipi verã. 29Jesús heishu: Añeteĩteva hai pee, ĩme’ẽ shyrehevape hareka Ñee kaviva rehe hejava hoo, tyvy, hiindy, tuu, ishy, hyreko, tayre maĩrã jy’yvy. 30Heja vekua hendakuepe, 100 vepo hipityjy hasa’asykue ryheve ã’ẽvãĩ ko yvy’ĩãrẽ; hoorã, tyvy, hiindy, ishy, ta’y, hareka yvy, tẽvã manomarã hipitypo tykove opambava. 31Hãrã heta ã’ẽ ñytynononde’iare, taykuepo’ẽjy. Heta taykue’iare, tynondepo’ẽjykui.

Jesús hykuãĩ mbeujy mano verã

32Oho reta Jerusalen kyty, hareka Jesús mboireare tynonde ohoshu retarã, opa mỹngyje, hareka haykue ohovare kyje ryheve jyraha. Jesús hykuãĩ hẽnojy hã’ẽĩ ẽvãpe 12 mboireare, mbeujyshu verãre mbaivarapo ikohe: 33Jaha rãnga jai Jerusalen kyty, haipe kuareta Tay ñonoãpokui pai ruvisha, hareka Moisés mbypara vekua pyrỹmboi’iheare ipope, haire jururepokui jukaha verã, hareka meẽpojyshukui kuareta tenta yngaivi ouva retape. 34Ñymbyhorypohe retakui hareka myndyvypohe, nupa hareka jukapo reta. Tẽvã mbahapy arapepo pũãjykui manovare pãũvi.

Santiago hareka Juan jurureva

35Santiago hareka Juan, Zebedeo tayre, ñymboja Jesús ẽvãperã heishu reta: Pyrỹmboi’ia, pota rãnga rijapo’ore, pente mbai jururehande verã. 36Jesús pyrãndushu reta: Mbaivara pipota ajapo pyndyrehe? 37Haire hei: Ryvapymarẽĩ mburuvisha vasu hĩmbipevaperã, ma’ẽĩhe tyvapyha nendiekui, pente ndakata kyty hareka ĩrũ ndasu kyty. 38Jesús heishu reta: Pikuãã rãnga ko pirureva; peera pẽĩjyve pyhasa’asy verã, she ahasa’asy verã rãĩmi? Katurapo peuvekui irova she hau verã? 39Haire hei: Õĩha rãnga hasaha verã. Jesús heishu reta: Ãñete rãnga peupokui irova hareka pyhasa’asypokui she ahasa verã rãĩmi, 40tẽvã pyvapy verã shakata hareka shasu kyty sheeãpo ameẽpe, hokava Sheruĩpo meẽshukui opaite õĩ kavi’õ retape. 41Hãrã ĩrũ 10 ia mboireare hendurã, poshy jyreshu Santiago hareka Juan. 42Jesús hẽnoshu retarã hei: Pee rãnga pikuaakuei mburuvishare, marãra henta ĩrũre reko ipope, hãrã haire mbytepe’ẽjy vateve’õre, reko’asyshu reta. 43Pynymbytepe kyrããpo hai: Pota vateve’ia pynymbytepe, tymbory opaitevape. 44Ĩme’ẽ pota tynonde’ivarã, tiko jokuehareirea opava retape. 45Shara Kuareta Tay oũã pyrokue’i verã, koñeĩ jokueha verã rãnga hareka meẽ verã hykove, hetavape mondojepe verã mbai porãmbaivi.

Jesús mynguera Bartimeo heshamba kũvãipia

46Haivi vãhẽ jyraha Jericope. Jesús õhẽjyma oho hoka tentaivi mboireare hãndi hareka kuareta hetavarã, pente heshamba kũvãipia Bartimeo he’iashua Timeo tay, pe hỹmbeype vapy’i jururete’ẽrã. 47Hendu Jesús Nasareno hasa ohovarã, õñepyrõ sapukerã hei: Jesús, David Tay, shyparekomitẽvẽ! 48Heta’ẽ poshy ryheve ijetashuva pota jasaka’ẽshu retarã, tẽvã hai hỹnatuve sapukejy: David Tay, shyparekomitẽvẽ! 49Haipe Jesús oho ñymbourã hei: Pỹhẽno. Hẽno reta heshamba kũvãipiarã heishu: Narẽã pũ’ã, nyrẽno’i. 50Haipe heshamba kũvãipia mombo jasoirearã, oporã ñymbou, hãma ñymboja Jesús ẽvãpe. 51Haipe Jesús pyrãndushu: Mbaivara ripota ajapo ndyrehe? Hãma heshamba kũvãipia heishu: Pyrỹmboi’ia, pota rãnga aheshatẽvẽ kuvãipi. 52Jesús heishu: Ekuajyvy, rirojarã rykuerama. Haipevãi heshashamba kũvãipi vekua heshajyrã, oho Jesús haykue.