Mar 11 | TpjSC | STEP | Jesús hareka mboireare vãhẽserima jyraha Jerusalenperã, tenta Betfage hareka Betania hyvache, Ñana Olivoty’õ hỹnonde. Jesús mondo mokue mboirea retarã,

Mark 11

Jesús iche Jerusalenpe

1 Jesús hareka mboireare vãhẽserima jyraha Jerusalenperã, tenta Betfage hareka Betania hyvache, Ñana Olivoty’õ hỹnonde. Jesús mondo mokue mboirea retarã, 2 heishu: “Pekua pyvãhẽ tenta ñanynonde’õpe, pichemarã pyhesharavĩpokui pente mbirikaray ñapĩtĩãvã, nde’iaveteri jupiha’ĩãrẽvã; pijora hareka perukui kope”. 3 Ĩme’ẽ mbava pyrãndupe marã’ĩrãra pijora, pereshukui: “Ñandeja rãnga pota rahahashu, areãndapo verukajyndekui”. 4 Jyraha retarã hesha mbirika ñapĩtĩãvã katoape õchepe, hãrã haire jora. 5 Hãma haipe’iare pyrãndushu: Marã’ĩrãra pijorapeĩ mbirika? 6 Haire heishu Jesús heishuva rãĩmi; hãrã ma’ẽihe raha reta. 7 Haivi rahashu reta Jesús mbirika, hãrã jykasoipya ñono’ĩãrẽ retarã, Jesús jupihe. 8 Heta’ẽ mondeva mbipysova oho verãipi, ĩme’ẽjy yvyra hãka jasyjarã hỹnonde ñono rahava pehupi. 9 Haivi tynonde ohovare hareka haykue ouvare, õñepỹrõ sapuke reta: Tomomba’eha Tũpa! Toñemombaivasu ko ouva Ñandeja heepe! 10 Tũpa tymãĩkavihe David rãĩmi mburuvisharã ouva! Tymbyveteha vate arape, Tũpa vateve’õ! 11 Jesús iche Jerusalenperã, oho tũpaoperã opa mãĩhupi marãra’ẽ. Haivi jyraha Betaniape 12 mboireare hãndi, shara ka’arumarã.

Jesús jahehe pente igo jypy iambava

12 Pareemajyrã, õhẽma reta Betaniaivirã, Jesús ñandu ñymbahy. 13 Mbyryivi hesha pente igo jypy hoky’õ, hãrã oho maĩhe i‘ãra’ẽ. Vãhẽma ohoshurã mba’ẽã heshapy, hokykuereii, shara nde’iave jy’ararã. 14 Haipe Jesús heishu igo jypy: Atẽñoĩtemaĩ mbava toukui ndi’ia! Mboireare hendu hokava.

Jesús mohẽ tũpaovi maĩnunga õvẽnde’õre

15 Hãma vãhẽjyraha Jerusalenpe, Jesús iche tũpaope, hãrã opa mohẽ tũpao hapype mba’ova hareka mavende’õre. Opa mbijaparashi kyrypoti okambia’õre ñymesare hareka pykasu õvẽnde’õre vapyhea. 16 Jesús hejãã mbava raha timbipory tũpaope poryhavare. 17 Haivi õñepyrõ mboishu kuareta retarã hei: Marãra hei Tũpa ĩñe’ẽ? “Sheru hoo, he’iaposhu oo jurureha’ẽ ipeva opaite tentare pevarã, tẽvã pijaposhi manarõ’iare ikua. 18 Hãma haipe hendu pai ruvisha hareka Moisés mbypara vekua pyrỹmboi’iheare, hãrã heka marãrapo juka reta, shara haire kyjeshi, hareka heta’ẽjy kuaretare mbyrymaĩheva pyrỹmboiva rãĩmi”. 19 Ka’arumajyrã õhẽ reta hokava tentaivi.

Igo jypy jahehahe vekua opa jipi

20 Kõ’ẽĩ hasa jyraha igo ẽvãipirã, hesha reta hokava igo opa jipi hapoivive. 21 Pedro manduaherã heishu Jesús: Pyrỹmboi’ia maĩhe, igo jypy rijahehe vekua opamba jipi! 22 Hãrã Jesús heishu reta: Pirojahe Tũpa. 23 Añeteĩteva hai pee, ĩme’ẽ heishuva ko yvyturusu: “Syry koivi hareka ekua’ea yyvasupe”, pyape pyhumba ryheverã, koñeĩ roja heiva ikoñõĩshu verãrã, ikoposhu hai heiva. 24 Hãrã hai pee, opa mba’e pirureheva pimboimapeĩrã, pyroja ĩmemapyre verãrã, me’ẽãñoĩpope. 25 Pimboipeĩrã, pyhejareiishu ĩmepyre porãmba papisha hãndirã, hãrã Ñanderu vate arapy’õ, hejareiipo jyve pyndyhevi porãmba pijapo vekua. 26 Shara pyhejareiãshu papisha japo porãmba pyndyrehe vekuarã, Ñanderu vate arapy’õ hejareiãpo jyve pyndyhevi porãmba pijapo vekua. ^{▼▼Kova ñee mishĩva mba’ety arykai mbyparavape.}

Jesús ñymbaikatu

27 Haivi oujy reta Jerusalenpe hareka Jesús vata’i tũpao jurirã, ñymbojahe reta pai ruvishare, Moisés mbypara vekua pyrỹmboi’iheare hareka tentape miñaka’õre, 28 pyrãndushu reta: Mbara heja nde rijapo kova? Mbavara meẽnde mbaikatu rijapo verã kovare? 29 Jesús heishu reta: She apyrãndupo jyvepe pente mbai; pymbeusherã, ambeupojyvepekui mbava ñymbaikatukuepera ajapo’ãĩ kova. 30 Mbavara mbou Juan pyrỹmyngarai verã? Tũpa, maĩrã, kuareta retara? Pymbeusheno. 31 Haire õñepyrõ ijeta ijupirã hei: “Tũpa rãnga mbou, jairã heipojy ñandekui: Hãmera, marã’ĩrã pyrojããshu? 32 Tẽvã jaishu: Kuaretare mbouvarã...” Tẽvã ñatẽy kyrã heishu reta, shara kyjeshi kuaretare moa puãhe retarã, shara opavare roja ãñetẽĩte Juan haiva Tũpa ĩñee mbeu’ia ^{▼▼Tũpa ĩñee mbeu’ia Karai ĩñeepe: “Profeta”.}. 33 Hãrã heishu reta Jesús: Kuaahããny. Hãma Jesús hei jyveshu reta: Ambe’ũãpo jyvepe marãva mbaikatu rupiira ajapo’ãĩ kova mbai.