Mar 12 | TpjSC | STEP | Jesús ijetashu reta ñee ñymyhã’ãnga rupiirã hei: Pente kuimbai ñoty uva jy’yvype, opa mangora; haivi japokajyshu uva ñamihã’ẽ verãpe. Mũpũãjy pente oo vate’õ, haivi ñyngareko hareka maĩ’ẽhe verã. Haivi hepyre porykashu ju’uva rẽnda mba‘apo’ia retarã, oho mbyry.

Mark 12

Mba‘apo’iare heko porãmbare

1 Jesús ijetashu reta ñee ñymyhã’ãnga rupiirã hei: Pente kuimbai ñoty uva jy’yvype, opa mangora; haivi japokajyshu uva ñamihã’ẽ verãpe. Mũpũãjy pente oo vate’õ, haivi ñyngareko hareka maĩ’ẽhe verã. Haivi hepyre porykashu ju’uva rẽnda mba‘apo’ia retarã, oho mbyry. 2 Vãhẽma uva mỹno’õhã verãperã, mondo pente jokuehareirea mba‘apo’õre õpe jurureshu verã uva ia, hai ña’ãporã ju’uva rẽndaivi. 3 Tẽvã haire pysy, nũpa, haivi iporãĩ mondojy reta. 4 Haivi ijarã’õ mondojy ĩrũ jokuehareirea, hokavape ñaka jokashi reta, hareka heta heheishu reta. 5 Hykuãĩ yngava mondojy, tẽvã hokavape juka reta. Kyrã hetavape mondo, ĩme’ẽ nupãhãva, hareka jukahava. 6 Hãma koñemahea hembyshu tay haihuva, mondorã pyape hei: “Shyray rãnga, mba’ẽãpo japohe retakui”. 7 Tẽvã mba’apo iare hei ijupe reta: “Kova rãnga hai mbai ijarã; pei jajuka, hãrãpo ña’ãpõrãtẽ vẽkua pyta ñandekui”. 8 Hãrã pysy reta, juka, hareka nohẽ mombo reta hetekue uva rẽndaivi. 9 Haivi Jesús pyrãndu: Mbaivara pimoa japo uva rẽnda ija? Oupo opa juka mba‘apo’iare, hareka meẽpo ju’uva rẽnda yngava retape. 10 Pimbijetããra kuatia Mbyparahavape heiva?: Ita, oo japo’iare mombo vekua, ã’ẽ ikoshi ita oo jypy vapyhe verã, 11 Kova hai Ñandeja japova, hãrã haikavi ñande kova jahesharã. 12 Hãrã pota pysykajyre Jesús, shara kuaa reta ñee ñymyhã’ãnga mondoha ñynõĩherã. Tẽvã kuaretare kyjejyreshirã; ma’ẽĩhe opajy oho.

Tũpa ña’ãpova hareka mburuvisha ña’ãpova

13 Haivi mondohashu Jesús a’ãmo fariseore hareka Herodes ryhevare, ijeta porãrã ñonovaishu verãre. 14 Kovare ohorã heishu reta: Pyrỹmboi’ia, kuaaha rãnga niñee añeteĩtevarã, rỹmbyvapyã ndijehe kuaretare hei ndeva, rỹma’ẽãhe marãva kuaretara, ãñete rypỹrỹmboihe Tũpa hape. Haikavira mẽ’ẽhashu kyrypoti mburuvishavasu Cesar, maĩrã, mba’ety? Mbyhepyaraposhu, maĩrã, mba’ety? 15 Tẽvã Jesús kuaa potai kyrã jyrerã heishu: Marã’ĩrãra aapy verã piñonopẽĩ she? Perushe pente nikere tamaĩhe. 16 Hãrã verushu reta, Jesús hesharã pyrãndu: Mbava hova hã’ãngara hareka heera ẽhe? Haire heishu: Mburuvishavasu Cesar. 17 Jesús hei: Cesar ña’ãpova pymeẽjyshu Cesar, Tũpa ña’ãpova pymeẽjyshu Tũpa. Mbyry opamãĩ reta kyrã heishu retarã.

Jesús ijetahe kuerajya ryheva

18 Hãrã ou Saduseore Jesús ẽvãpe. Haire rojãã manova puãjy verã; hãrã pyrãndushu reta Jesús: 19 Pyrỹmboi’ia, Moisés mbypara vekuape rãnga hei, pente kuimbai manoshi hyrekorã, mymembyãrã tyvy omendajyhe verã tichey hyrekokue mimoña verã tichey manoshi vekua. 20 Hãma ikonda aryka’e 7 kuimbai pente’ovare; tynondeiteva omenda, tẽvã manoshi mymembymbape. 21 Haivi mokuehea omendajyhe, tẽvã hai mano jyve mymembymbape; mbahapyhea kyrãmijy. 22 Hãrã kyrã 7 õre opaĩ omendatẽhe taupe, tẽvã mbavẽã haire penteva heja hĩjapo. Koñemahea mano jyve taupe. 23 Haivi manovare kuerajymarã, marãvarapo hyrekorãĩtekui kova taupe? Shara 7 õre opapavẽĩmba omendatẽhẽ. 24 Jesús heishu reta: Pijavy rãnga, shara pikuãã Tũpa ĩñee hareka ñymbaikatukue. 25 Manovare kuerajymarã, kuimbai hareka taupe omendaveamapokui. Shara ikoposhi Tũpa jokuevare rãĩmi vate arapy. 26 Manovare kuerajya ryheva, pimbijetãmba Moisés mbypara vekua heiva, marãra Tũpa ijetashu Moisés vycheri hãka hẽndy’õĩvirã hei: “She hai Abraham, Isaac hareka Jacob ñu Tũpa”. 27 Tũpa rãnga ha’ẽã manovare ñu Tũpa, hykove’iare ñu Tũpa rãnga hai! Mbyry rãnga pijavy!

Tũpa ĩñee haikaviveva

28 Heshama Jesús haikavite heishu retarã, ñymbojahe pente Moisés mbypara vekua pyrỹmboi’ihea hai opa hendu ijeta ñynoĩrã, hãrã pyrãndushu: Opaite ñeẽ japoha verã mbyparahava, marãvara hai haikaviveva? 29 Jesús heishu: Haikaviveva ñee rãnga hai kova: “Hendu Israel, Ñandeja ñanu Tũpa rãnga hai Ñandeja koñeĩ’õ”. 30 Haihu Ñandeja nu Tũpa ndypyaivive, ndykove ryheve, mbai kuaakue ryheve, hareka opaite nypyrãtakue ryheve. Kova hai mbyparahava japoa verã haikaviveva. 31 Tẽvã ĩme’ẽjy mokuehea: “Haihu ndapisha nde rijyhaihuva rãĩmi”. Mba’ety haikaviveva kova ñeẽ japoa verã mokue’õ retaivi. 32 Hãma Moisés mbypara vekua pyrỹmboi’ihea heishu: Haikavite, pyrỹmboi’ia, ãñeteĩte ko rereva: Penteĩ’ẽ Tũpa, mba’etyjy yngava ha’ẽĩ ẽẽ. 33 Jahaihu Tũpa ñandypyaivi, opa mbai kuaakue ryheve, ñandyrykove ryheve, ñanypyrãtãkue ryheve hareka jahaihu ñandapisha jaijyhaihuva rãĩmi, haikavive mymba jajuka hareka jahapyvaivi Tũpa heepe. 34 Jesús, hendu ijeta kavitẽrã, heishu: Mbyryã rẽĩshi Tũpa ẽvãpe’õ ryheva. Hãrã mba’ẽã mbava pyrãndujyshu.

Marãva tayra Cristo?

35 Jesús pyrỹmboi’ẽ tũpaoperã pyrãndu: Marã’ĩrãra Moisés mbypara vekua pyrỹmboi’iheare hei reta, Cristo David tayva? 36 David teiva rãnga hei Espiritu Santo rupii: Ñandeja heishu Sheja: “Vapy shakata kyty, añonopeve ndyreshatamba’iare ndepy’ipe”. 37 David teiva hẽnoshu “Sheja”, Marãrapo akuarã Cristo, David tayjy? Heta’ẽ haipe kuaretare, vy’ape hendu ñynoĩ Jesús ĩñee.

Jesús ijetahe Moisés mbypara vekua pyrỹmboi’iheare

38 Jesús pyrỹmboirã heishu reta: “Pimoãshi Moisés mbypara vekua pyrỹmboi’iheare, haireta rãnga haikavishu iko mondeva pukuherã, hareka pota marãnduha reta vatahava retaipi karai vasure rãĩmi. 39 Haire heka haikavivevape vapy verã Judiore ñymbatyseape, hareka ñymyhenda kavi karuvasu ikova retaipi. 40 Hareka ĩme manovare hoo hekyjyreshi, ñemipy verãre pupuku ñymboi reta. Haire hasyitevepo nupãhãkui”.

Ĩme manoshia pavete’ia meẽva

41 Pente arape Jesús vapy’ẽ kyrypoti Tũpa pevãrã mbatyha’õ hyvache, mãĩ’ẽhe marãra kuaretare ñono ñynoĩpy kyrypoti; iko katuvare heheta ñonopy. 42 Haipe vãhẽ oujyve ĩme manoshi vekua pavete’ia, mokue nikere sa’i ovale vekuami ñonovepy. 43 Hãrã Jesús hẽnoshu mboirea retarã heishu: Añeteĩteva hai pee, ko ĩme manoshia pavetetẽva kyrypoti hyrupe hetave ñono opava retaivi. 44 Opava reta rãnga hembyshu vekuaĩ veru meẽ, tẽvã ko pavetetẽva opa veru meẽ ĩmerea, karutẽhe verã.