Mar 13 | TpjSC | STEP | Jesús õhẽ tũpaoivirã, pente mboirea heishu: Pyrỹmboi’ia, maĩndaveheno ko ita hareka tũpao, marãra tivisharã mashyãseve!

Mark 13

Jesús hei tũpao opa mbaia verã

1 Jesús õhẽ tũpaoivirã, pente mboirea heishu: Pyrỹmboi’ia, maĩndaveheno ko ita hareka tũpao, marãra tivisharã mashyãseve! 2 Jesús heishu: Ryheshara kova oo vasukuere? Penteãpo ĩmekui ita jyvohy’õ, opaitepo mambaiakui.

Mbai jehu verã ara opaserimarã

3 Hãma jyraha reta Ñana’õ Olivoty tũpao hỹnonde, haipe Jesús vapy’ẽrã, Pedro, Jacobo, Juan hareka Andres pyrãndushu reta hã’ẽĩ õpe: 4 Mbeu’ore, mbaipeiterapo jehukui kova mbai? Mbaiva jyheshava rãnirapo’ẽkui, kova ikomapotarã? 5 Jesús õñepyrõ heishu reta: Pymãĩ kavi avy mbava pynymbytavykui. 6 Hetapo ou shyreepe heiva: “She hai Cristo”, hãma hetavapepo mbytavy. 7 Pikuama ñyrãrõva ikorã hareka mbe’uha ñyrãrovarã, avy pykyje, shara kyrãñoĩpo iko; tẽvã ha’ẽã opamahe verã. 8 Hãma tentavasure hareka mburuvishavasure opapo pũã ijehe; oparupipo iko yvy ryry, hareka õĩpojy ñymbahy; kova hai jyhasa’asy tynonde’õre. 9 Tẽvã pingareko katu pindijehe. Shara ĩmepo’ẽ pyndypysykarã pyndyrahava mburuvishare hỹnonde hareka punũpa verã Judiore ñymbatyseaipi. Shyryhevaperã pyndyrahapo mburuvisha vasu hareka huvishare hỹnonde, shyreepe piñymbeushu verãre. 10 Shara ndeiteri ara japyrã, mbe’uhañõĩpo Ñee kaviva opa tenta retaipi. 11 Hãma pyndyrahama mburuvishare hỹnonderã avy pejepy’apyhe pere verã rãĩmi, ñee me’ẽãpevaĩpo perekui, shara ha’ẽã pee pijeta verã; Espiritu Santo rãngapo ijetakui. 12 Hãma ĩmepo’ẽ meẽva tyvy jukaha verã, terure meẽpo tayre; hareka tyrayre ñymbyvaishopohe tuu hareka jukapo. 13 Opavaretapo pyndyreshatããkui shyryhevaperã, tẽvã tãtangãtu’õ japyapeve, hokavapo oho jepekui. 14 Pyheshama ko mbai porãmba’eite vekua ẽẽ, ẽmbatẽ verãperã Tũpa ĩñee mbeu’ia Daniel heiva rãĩmi (ko mbijetava tikuaa mbaivara he’ise) Judeape’iare tĩvãhe yvyturusu ẽvãipi; 15 hãma hoo ĩãrẽ’iva, avy tyvejy nohẽ verã mãĩnũnga hoo’ivi; 16 hãrã kaahupi ĩme’õ, avy toujy tyheka mondeva. 17 Tengapokui taupere purua’ia hoka arape, hareka memby kambu’iare! 18 Pirure katushu Tũpa potãã jehupe kova mbai ara ro’yperã, 19 shara hokava arape ẽpo jyhasa’asy vasu arykai ikombava, Tũpa jypy japorãvãĩ ko yvy ã’ẽpeve, hareka ikovẽãmapo kutyve. 20 Ñandeja mykoĩpĩã hokava ararã, mba’etypo ohojepeva, hãma hai pyhỹrõvare rehẽĩ mykõĩpĩĩpo hokava ara. 21 Hãrã ĩme’ẽ heipeva: “Pymaĩhe, kope’i Cristo, maĩrã, kuty’i”, avy pyroja. 22 Shara oupo Cristo rã‘angarã’ia hareka Tũpa ĩñee mbeu’ia japureiivare, hetapo japo mbai heshaha verã hareka mbaikavi heshaha verã pyrỹmbytavy verã, Tũpa pyhỹrõva retavepo mbytavy. 23 Hãrã pingareko katu pẽĩ, ambeu’ãĩpe kova mbai ndeiteri ikorã.

Jesús ndeiteri oujyrã mbaivarapo iko

24 Hokava arape, jyhasa’asy hasamarã, kuarasy ovepo hareka jasy sapeveãmapo. 25 Jasy tatare opapo oa vate araivi, hãrã mbai arapy’õre mbaikatu opapo’õmykui. 26 Hãrã ijyheshapo kuareta Tay oujy avãpỹntupyrã, mbaikatukue hareka hĩmbipekue ryheve. 27 Hãma hai mondopo jokuevare mbaty verã hai pyhỹrõvare urũndy yvytu pejuvaivi, yvy japyaivi hareka vate ara japyapeve. 28 Pikuaashi kova ñymyhã’ãnga igo jypy: Hãka hovyma’ẽrã hareka õhẽmashu hokyrãrã, pikuaakuei ara haku vãhẽmapojyrã. 29 Kyrãpo jyvepe pyheshama kova mbai jehurã, pikuaapo ara opa verãpe vãhẽserimarã, õchepema’ẽvã. 30 Ãñeteĩte hai pee, opapo iko kova mbai ndeiteri ã’ẽ ĩmeĩteri’iare, opa manorã. 31 Ara hareka yvy opapo, tẽvã shiñee opããpo hai. 32 Tẽvã hokava ara hareka ora mba’ety kuaava, Tũpa jokuevare arapy’iare hareka Tũpa Tay kuaa’ãĩ jyve, koñeĩ Tuu kuaa. 33 Pymaĩ katupẽĩ, avy peche, hareka pirure katu shara pikuãã mbaipera vãhẽpo hoka ara. 34 Pente kuimbai mbyry ohova rãĩmi; hoo hejashu jokuereirea, hãma pepenteĩ ñonoshu japo verã, hãrã õchepe ñyngareko’õ heishu ochemba’ẽ verã. 35 Hãrã avy peche, shara pikuaã mbaipera oujypo oo ija, ka’arurãra, pyhare mbytepera, uru ñyrããma’ẽrãra, kõĩ ourãra, maĩrã kõ’ẽĩra, 36 mahẽ sapy’ãĩ ourã pyndysapyakui pechepẽĩrã. 37 Kova haipeva, opaitevape hai: Avy peche.