Mar 16 | TpjSC | STEP | Hasama putu’uhava jy’ararã; Maria Magdalena, Maria Jacobo ishy hareka Salome, ova reta mbai pishekatuva raha ñonohẽ verã Jesús hetekue.

Mark 16

Jesús kuerajy

1 Hasama putu’uhava jy’ararã; Maria Magdalena, Maria Jacobo ishy hareka Salome, ova reta mbai pishekatuva raha ñonohẽ verã Jesús hetekue. 2 Tynonde semana õñepyruape kõ’ẽĩ kuarasy õhẽĩ, jyraha reta tã’õve ẽvape. 3 Hãma jyraha jyrerã, hei jyre: Mbavãtepo mbysyry ñandekui ita jo’oa vekua hõche jochahapya? 4 Tẽvã mãĩ kavihe retarã, hesha mbysyryhama. Hokava ita hai mãrẽyva. 5 Ichema reta ita jo’oa vekua hapyperã, hesha reta jakata kyty kunumi mondea tĩĩva pukuhea vapy’ẽ; haipe taupere opa kyje japyraha. 6 Hai heishu reta: Avy pykyje, pee rãnga pyhekapi Jesús Nazareno, kurusure mbysavava vekua. Kuerajyma rãnga! Mba’etyma kope. Pymãĩ ñonoã vekuape, mba’etyma haipe. 7 Pekua pymbeushu mbo’ehareare hareka jyve Pedro: Hai ohopo pynynonde Galileape; haipepo pyheshajykui, hei pee vekua rãĩmi. 8 Hãma haire õhẽ ñyvãhe jyrajy reta tã’õvere ẽvãivi, tẽvã mba’ẽã hei reta mbavape shara opa kyje retarã.

Jesús ijeshakashu Maria Magdalena

9 Jesús kuerajymarã ara tynonde’õ semana õñepỹrõape kõ’ẽĩ, tynonde ijeshakashu Maria Magdalena, 7 mbaiposhy mohẽshi vekua. 10 Haivi oho mbykuaaka reta Jesús mi’ĩrũre vekuare, vyamba ñynoĩva hareka jaheo ñynoĩ. 11 Tẽvã haire hendu Jesús hykovejya hareka hai heshajyvarã, rojãã reta.

Jesús ijeshakajyshu mokue mboireare

12 Haivi, Jesús yngai ijeshakajyshu mokue mboireare, jyrahajyre ñuu kytyrã. 13 Haire oho mbeujyveshu ĩrũre, tẽvã roja’ãĩteijy reta.

Jesús meẽshu mboireare japo verã

14 Koñymaheape Jesús ijeshakajy 11 mboirea retape, haire vapy ñynoĩ mesaperã. Ñyngãtashu reta jyrojãã hareka pya tãtãite retarã, shara rojãã reta kuerajya heshavare mbeute jyrerã. 15 Haivi heishu reta: Pekua oparupi yvy jerekue, hareka pymbeu Ñee kaviva opava retape. 16 Ĩme’ẽ rojavarã hareka ñymyngarairã ohojepepo, tẽvã rojambava jaheapohe. 17 Ko mbaikavi heshaha verã mĩ’ĩrũpo opaite rojavare: Shyreepe mohẽpokui mbaiposhy, ijetapo ñee py’ahuvape; 18 pysypo reta mboi hareka houpo mbai purukava, tẽvã mba’ẽãpo japohe reta, ipo ñono ĩãrã ñymbairasyvarã, kuerapo.

Jesús ohojy vate arape

19 Opama ñimiñeeshu retarã, Ñandeja Jesús hupihajy vate arape, hareka vapy Tũpa jakata kyty. 20 Hãrã haire oho mbeu Ñee kaviva oparupi, Ñandeja Jesús mboryshu reta, hareka my’ãñete ĩñee mbaikavi heshaha verã mĩ’ĩrũvare rupii. Amén.