Mark 5

Kuimbai mbaiposhy ichepya Gadarape’õ

1Vãhẽ jyraha yyvasu hyvaishope, Gadarenore jy’yvype. 2Jesús vejyĩ kanoaivi, ou hỹvãĩti tã’õvere õĩvi pente kuimbai mbaiposhy ichepya, 3ñymyhenta’iva tã’õvẽre ẽvãĩpi, mbavamba katu jokova, ajemaĩ kadenape jokuaha. 4Ajemaĩ ipy hareka jyva pokuahashi kadenape, tẽvã opaĩ mỹndoso, mba’ety jepyheva. 5Ara hareka pyharekue iko sapuke’i ñũũ hupi hareka tã’õvẽre ẽvãipi, opa ñỹmbyperepy ita. 6Hãrã mbyryivi Jesús hesharã ñani ou jykotyrã, ĩñesu hỹnonde. 7Hãma hỹnatu sapukerã hei: Jesús, Tũpa vateve’õ Tay, mbaivara ĩmeryre shendie? Airurende Tũpa heepe avy rivareite shyrehe verã! 8Jesús heishu: Mbaiposhy, ẽhẽshi ko kuimbai! 9Haivi Jesús pyrãndushu: Marãra hei’o ndyree? Hai hei: Legion he’ia rãnga she, shara yryreta. 10Haipe jurure’asyshu Jesús, potamba mohẽ verãre iko jyreaivi. 11Haipe mbyryã karu ñynoĩ kushi heta vekua, yvyturusu hyvache. 12Hãma mbaiposhyre jurure’asyshu Jesús: Ma’ẽĩ yryrehe tohoa ticheapy kushire. 13Jesús ma’ẽĩhe, hãrã mbaiposhy porãmba opa õhẽshi kuimbairã opa jyraha ichepy kushire, 2.000 kavi’õ, opa ñyvãhẽrã jyraha oapy yyvasukue, haipe opa mano. 14Hãma kushi ñyngareko’iheare opa ñyvãhẽrã, jyraha mbeu ikova tentaipi hareka ñuu hupi. Hãrã kuaretare jyraha hesha ikova. 15Vãhẽma jyraha Jesús ẽvãperã hesha reta kuimbai mbaiposhy ĩmere vekua vapy’ẽ, ñĩmimonde hareka haikavijyma’ẽrã. Hãrã kyje jyre. 16Hãma kuaretare heshava Jesús, mbeu mbaivara ikohe kuimbai mbaiposhy ĩmere vekua hareka kushire. 17Hãrã kuaretare õñepỹrõ jurure’asyshu Jesús oho verã jy’yvy retaivi. 18Jesús jupijy kanoaperã, ko kuimbai mbaiposhy ĩmere vekua, jurureshu oho hãndi verã. 19Tẽvã Jesús he’iãshu, koñeĩ heishu: Ekuajy nyrẽntape hareka mbeushu nyrẽtãrãre, mbai Ñandeja japo ndyreheva, hareka marãra ndypareko. 20Hãrã hoka kuimbai oho õñepyrõ mbeu Decapolispe, opa mbai haikaviva Jesús japohe vekua; hãrã henduvare mbyrymaĩ reta.

Jairo tajy hareka pente taupe ñymbairasy’i vekua

21Hãma Jesús hasajy yy hyvaisho kyty kanoaperã, yy hymbeypema’ẽrã, kuareta hetava jatyjyhe. 22Vãhẽ ou Jesús ẽvãpe pente mburuvisha Judiore ñymbatyseape’õva Jairo he’iashua, heshamarã ĩñesu hỹnonde. 23Jurureshurã hei: Shyrajy rãnga mano serima’i, eimĩte ndepo ñono ĩãrẽ kuerajy verã. 24Hãrã Jesús oho hãndirã; kuareta hetava oho jyve hipii hareka opa jasoishu reta. 25Haipe kuaretare mbytepe ẽẽjyve pente taupe 12 ãñoma huvy pytambashia, 26heta iko’asy pyrỹpyhãno’iare ipoipi, opama poryhe kyrypoti ĩmetere vekua potate kuerarã, katynga teiteve oho’ishu ñymbairasykue. 27Henduma Jesús he’iahevarã, ou kuareta hetavare pãũpe, ñymboja haykueivirã pokohe mondeva ĩãrẽ’õ. 28Shara pyapẽĩ hei: “Mondeva reheĩ apokorã, akueramapokui”. 29Haipevaĩ pytashi tuvykue hareka hetepy ñandu kueramava mbai’rasykueivi. 30Jesús ñandu jyve õhẽshia mbaikatukue; jerepy hetavare mbyteperã pyrãndu: Mbavara pokohe amondeva? 31Mboireare heishu: Ryhesha rãnga marãra opa ndasoi kuaretare, hãmera rỹpyrãndujy, mbavara poko shyrehe? 32Tẽvã Jesús mãĩ jyvyĩhupi kuaretare hesha verã mbavara pokohe. 33Hãma taupe kyjeiterã ryry’i, shara kuaa ijehe mbaivara ikohe, hãrã ou, hareka ĩñesu Jesús hỹnonderã opa mbeushu añeteva. 34Jesús heishu: Shyrajy, rirojarãmẽĩ rykuera. Kapyryĩ ekuajy, shara rykueramahe nymbairasykue. 35Jesús ijeta teri’õvã, vãhẽ jyveru kuimbaire Jairo hentaivi, huvisha Judiore ñymbatyseape’õ, hareka heishu reta: Ndyrajy manoma; marã’ĩrãra ĩmeĩ rỹmangãtũãrẽĩ pyrỹmboi’ia? 36Tẽvã Jesús jasakããhe haire heiva, hãrã heishu mburuvisha Judiore ñymbatyseape’õ: Avy kyje, jyrojaiño. 37Tẽvã hejãã yngare mi’ĩrũ verã, koñeĩ Pedro, Jacobo hareka tyvy Juan. 38Hãma vãhẽma jyraha Judiore ñymbatyseape’õ huvisha hentaperã hesha reta opa ikoraiva, jaheova hareka sapukeva, 39iche jyraha oo’iperã heishu reta: Mbaiva rehera opa pikorai hareka pijaheo? Kova kuñatãĩ ray manoã, ocheĩ rãnga’ẽ. 40Haipe kuaretare jojejyre. Tẽvã Jesús opa mohẽ oo ipe’iare, haivi iche tuu, ishy hareka mboireare kuñataĩ ray ẽvãpe. 41Jesús pysy ipoperã heishu: Talita, kumi! He’iseva: “Kuñataĩ ray she hainde, pũ’ã”. 42Kuñataĩ ray haipevaĩ pũãrã vatajy; 12 ãñomaĩre. Kuaretare opa mbyrymaĩ reta hokava hesharã. 43Tẽvã Jesús heishu reta mbeumba verãre yngavape ikova, haivi heishu myngaru verãre kuñataĩ ray.