Mar 6 | TpjSC | STEP | Jesús õhẽ haivirã, oho jy’yvy kyty hareka mboireare oho hãndi.

Mark 6

Jesús oho Nazaretpe

1 Jesús õhẽ haivirã, oho jy’yvy kyty hareka mboireare oho hãndi. 2 Putu’uava jy’ara vãhẽrã, õñepyrõ pyrỹmboi Judiore ñymbatyseape, heta henduvare mbyhaikavite reta, hareka hei reta: Maĩvira opaite kuaa hai kova? Marãva ãrãndura ko me’ẽhashuva, hareka mbaikavi heshaha verã hai japova? 3 Ha’ẽãra kova yvyrare mba‘apo’ia, Maria memby, Jacobo, José, Juda hareka Simón tiche’y? Ikõãra jyre jyve ñanymbyteipi, hiindyre? Kuãã reta hei verã rãĩmi. 4 Hãma Jesús heishu reta: Mba’ety Tũpa ĩñee mbeu’ia haihuambaipi, jy’yvypẽĩ rãnga haihuhãã, hentarãre hareka hentape’õre. 5 Hãrã katũã japo mbaikavi heshaha verã, mbovyĩ ñymbairasyva mynguera, ipo ñono ĩãrẽrã. 6 Jesús mbyrymaĩ rojãã retarã. Haivi Jesús oho pyrỹmboi tenta mbyrymba’õĩpi.

Jesús mondo 12 mboireare ñimiñee verãre

7 Mbatyka 12 mboireare, hareka õñepyrõ mondo momokue; meẽshu reta mbaikatu mbaiposhy retare. 8 Heishu reta potamba rahava maĩnunga pehupi pevarã: Pãhã, mbahyru, hareka kyrypoti. Koñeĩ pente yvyra ñyrãtãhevaĩ. 9 Pymonde pypasa, tẽvã avy heta pyraha pymondeva. 10 Jesús heijyshu reta: Maĩpi’õ o’ipe picherã, pypytakui haipe pehojyve haivi. 11 Hãma ĩme’ẽ potamba pymyvahẽva hentape, hareka pynyrẽndusembavarã, pẽhẽ haivi hareka pityshi yvy timbokue pypasa, hokava hai ñymarãndu haire pevarã. Ãñeteĩte hai pee, ñimbivache jy’arape, vevyveposhikui ñunupa Sodoma hareka Gomorraivi, hokava tenta pevarãĩvi. 12 Haivi mboireare õhẽ mbeushu kuaretare Tũpa ĩñee, heishu ãteñoma japo verãre mbai porãmbava, hareka oujy verãre Tũpa jykoty. 13 Heta ãña ichepy vekua mohẽshi reta, hareka mynguera ñymbairasyva asaite kytyherã.

Juan Bautista jukaharã vẽkua

14 Jesús oparupi kuaaha, hãrã mburuvisha Herode kuaamajy verã hei: Juan Bautista kuerajymbakue manovare mbyteivi, hãme rãnga ĩmere hokava mbaikatu mbaikavi heshaha verã. 15 Ĩrũre heijy: Elías rãnga. Yngavare heijy: Tũpa ĩñee mbeu’ia ^{▼▼Tũpa ĩñee mbeu’ia Karai ĩñeepe: “Profeta”.}, tynonde vekuare rãĩmiva rãnga. 16 Tẽvã Herode kova mbai hendurã hei: Juan, she rãnga ñaka ajasyjakashi, tẽvã kuerajymba. 17 Shara Herode mbyperesokamba Juan hareka ñapitĩka kadenape, tyvy Felipe hyreko Herodias rehe, shara Herodes rekore. 18 Juan heishu Herode: “Põrãny ndyryvy hyreko ryrekoryre verã”. 19 Hai rehe Herodias heshatãã Juan, hãrã pota jukakare, tẽvã katuã; 20 shara Herode kyje’ishi Juan, kuaa kavite hai kuimbai heko kyambarã, hãrã ñyngareko kavihe, hendu ijeta’ẽrã ajemaĩ kuaa kaviãshi, tẽvã Herode kyrẽ’ỹpe hendushu. 21 Tẽvã Herodia hesha pente ara ou kavishu verã, shara Herode japo karu vasu ñy’ãño mbotyrã, membeu jyveshu mburuvishare hareka syndarore juhuvishare hareka karai ikokatuva Galileape’õre; 22 karuma ñynoĩrã Herodia memby kuiñatãĩ iche jyroky, hãrã Herode hareka haipe ẽẽ hãndiare mbyvy’aite reta. Haipe mburuvisha heishu kuiñatãĩ: Jurureshe ripotava, hãrã ameẽpondekui. 23 Hai ĩñee meẽshu: Rirurevapo ameẽndekui, ajemaĩpo tentare shepope’õ mbyteipi kavi rirureshe. 24 Haivi kuñatãĩ õhẽ pyrãndushu ishy: Mbaivara airureposhu? Haipe ishy heishu: Jurureshu Juan Bautista ñakãkue. 25 Hoka kuñatãĩ narẽ’ãĩte ichejy mburuvisha vasu ẽvãperã, jurureshurã hei: Aipota ã’ẽvãĩ rymeẽshe pente yape Juan Bautista ñakãkue. 26 Hokava mburuvisha vasu mbyvya’ãĩte; tẽvã meẽ jepe ĩñee opavare hỹnonde meẽñoĩ verã, hãrã katuãma ajerai me’ẽãjy kuñataĩ jurureshua. 27 Hãma mburuvisha vasu narẽ’ãĩte mondo pente syndaro veru verã Juan ñakãkue. 28 Hãma hokava syndaro oho Juan mbyperesoa ñonoavaperã jasyjashi ñaka, yape ñonorã raha meẽshu kuñataĩ, hãrã hai meẽjyveshu ishy. 29 Juan mboireare kuaamarã, ou raha reta hetekue ñoty verã.

Jesús myngaru 5.000 kuareta

30 Hãma apostolre jyveru ñymbatyjy hãndi Jesús, haipe mbeushu reta opaite japovare hareka pyrỹmboihe vekuare. 31 Jesús heishu reta: Peii jaha japutuu yvy ikoambaipi. Shara hetaite kuareta ouva hareka ohova haire ẽvãperã, ẽẽãshu reta karu verãre. 32 Haivi Jesús hareka mboireare jyraha kanoape hã’ẽĩ yvy ikoambaipi. 33 Tẽvã heta’ẽ kuaretare heshava Jesús ohorã, hãrã kuaa retarã opa ñani jyraha hỹnonderãpe, hãrã tynonde vãhẽ jyrahashi reta. 34 Jesús vejy kanoaivĩrã, hesha kuareta heta vekua, parekoshu reta, shara avishare ñyngarekoambahea rãĩmi jyrerã, haipe õñepyrõ heta mbaire mboishu reta. 35 Ka’aruiterã mboireare jyveru Jesús ẽvãperã heishu reta: Ka’aruitema rãnga, mba’etyvãijy koipi ikova. 36 Mondojymĩte kuaretare, toho tenta hareka ñũũhupi tovareta hou verã, shara mba’etyre reta hou verãre. 37 Tẽvã Jesús heishu reta: Pymeẽshu hou verã reta. Haire heishu: Ohoarapo ovaha pãhã 200 nikere repy, opa myngarua verãre? 38 Jesús pyrãndushu reta: Mbovy pãhãra ĩmepyre? Pekua pymaĩheno. Kuaama retarã heishu: Pandepo pãhã hareka mokue pira ĩmerekoha. 39 Haivi Jesús heishu kuaretare ñymambaty vapy verãre kapi’atare. 40 Hãma vapyma jyraharã ĩme’ẽ 100 jatyva, ĩrũpe ñymbaty jyve 50, kyrã ñymbaty jyraha. 41 Haivi Jesús heky pandepo’ia pãhã hareka mokue’ia pira, maĩ ararerã ñymboi, pyseã pãhãrã haivi meẽshu mboireare mẽmeẽ hupi verã kuaretare; kyrãĩ japojy mokue’õ pira opaiteva pevãrã. 42 Opaiteva kuaretare karu hareka opa hỹvãta reta. 43 Haivi Jesús mboireare 12 kanata mynyhẽjy pãhã hareka pira pysẽvẽ opamba ho’ua vekua. 44 Haipe karuvare ẽẽ 5.000 kuimbai.

Jesús vata yy ĩãrẽ

45 Haivi Jesús heishu mboireare areã jupi verãre kanoape, oho verã yy hyvaisho kyty Betsaidape, tẽvã hai yy hymbeype ĩme mondojyrãni verã kuaretare. 46 Opajyma mondorã, Jesús ohojupi yvyturusure ñymboishu verã Tũpa. 47 Pỹntumapo’irã kanoa yy mbyteipima oho, tẽvã Jesús ĩmeĩteri’i yvyipi. 48 Jesús haivive hesha mboireare mbeveĩ ñymaña jyraha jyre, shara yvytu ñakua oushureta hỹnonderã. Kõĩma ourã, Jesús vata oho yy ĩãrẽ haire ẽvãpe, oho ñokue verã rãĩmi. 49 Hãrã haire heshama Jesús yy ĩãrẽ vata ourã, moã ijeshakaivarã opa sapuke reta; 50 opaĩ myngyje reta heshava. Tẽvã Jesús areã ijetashu retarã hei: Avy pykyje! She rãnga! 51 Jesús jupi hãndi reta kanoaperã yvytu vasukue pyta, haire mbyrymaĩ hokava heshamarã. 52 Shara ĩmeĩteri kuãã reta mbaivara he’ise Jesús pãhã mbyhetarã vẽkua, shara mbai rojãã reta.

Jesús pyrỹmynguera Genesaretpe

53 Hasama reta yyvasu hỹmbey kytyrã vãhẽ jyraha yvy Genesaretpe; ñapĩti heja ñykanoare yy hỹmbeype. 54 Vejyma reta kanoaivirã, kuaretare areã kuaa reta Jesús, 55 opaite vatahupi reta hokava tenta, opaivi veruashu ñymbairasyvare hupa ryheve, kuaama reta Jesús ĩme’ẽ haiperã. 56 Mamaĩpi Jesús ohovape, tentamire, ñuuhupi hareka tenta vasupe, kuaretare raha ñonoshu pehupi ñymbairasy vekuare, jurureshu reta ñymbairasy vekuare ma’ẽĩhe pokohe verã mondeva hymbeyre; hãrã opaite pokohe vekuare, opa kuerahe mbairasykue.