Mark 7

Mbai kuareta myngyava

1Haipe ñymboja Jesús ẽvãpe fariseore hareka Moisés mbypara vekua pyrỹmboi’iheare, Jerusalenvi ouva. 2Kovare hesha Jesús mboireare a’ãmo karu ñynoĩ ipo kya ryheverã, he’ise jypoimbaa, ijeta porããhe reta. 3Shara fariseore hareka yngaa Judiore, tynondevare ikova rãĩmi ĩmeĩ japo, karuã reta jypoi kaviãrã. 4Hãma oujy maĩnunga ovaha’õĩvirã ho’uã ovava ndeiteri joherã, heta ĩmerejy kyrãvã haire jypykuava: Yy ho’uapya joheañõĩpopy, opaite timbiporyre, hareka ochehahea. 5Hãrã fariseore hareka Moisés mbypara vekua pyrỹmboi’iheare pyrãndushu Jesús: Marã’ĩrãra rỹmboivare japoã tynondevare heiva rãĩmi, jypoimba ryhevẽĩ karu jyre? 6Jesús heishu reta: Pee hova mokue’iare! Hei kavi pyndyrehe Tũpa ĩñee mbeu’ia Isaias, jykuatiape heiva rãĩmi: “Kova tentape’õ reta rãnga jurupeĩ shemombai jyre, tẽvã pyare mbyry’ẽ shyhevi. 7Shemombai rã’ãngai jyre, shara kuaretare hei vekuaĩ pyrỹmboi jyrehe”. 8Pee rãnga pijapoã ñeẽ japoha verã Tũpa heiva, kuaretare hei vekuãĩ pijapopirã. 9Heijyshu reta: Pee pipykuava rãĩmi pijapopirã, pijapoã Tũpa ĩñee japoa verã. 10Shara Moisés hei: “Japoshu nderu hareka ndesy heiva hareka ñyngarekohe reta”, tẽvã “ĩme’ẽ tuu hareka ishy jahe’ihearã, tijukaha”. 11Tẽvã pee pypyrymboikuei, pente kuimbai katu heishuva tuu hareka ishy: “Katuãny ãrỹmbory, shara opaiteva ĩme’areare hai Corban” (he’iseva: “Tũpa pevarã mbijicheava”). 12Hãma kyrãma heirã, pee pymboihekuei katuveamapo mboryshu tuu hareka ishy. 13Kyrã pimbijiche Tũpa ĩñee, pipykuava rãĩmi pijapopirã, hãrã heta maĩnunga kyrãva pijapo. 14Haivi Jesús hykuãĩ hẽnojy kuareta hetavarã heishu: Pijasakashyre opaiteva pikuaa kavi verã: 15Mba’ety ho’uavare kuareta myngyashu verã Tũpa hỹnonde; pyaivi õhẽva rãnga katu myngyashu. 16Ĩme’ẽ japysa’iarã, tyhendu. 17Jesús hejama kuareta retarã iche pente oo’ipe, haipe mboireare pyrãndushu mbaivara he’ise hokava ñee ñymyhã’ãnga. 18Hai heishu reta: Peeavera pikuãã kova? Pikuããmba mba’ety maĩnunga kuareta houva myngyashu verãrãme? 19Shara icheã pyape, hyepẽĩ vãhẽrã haivĩma õhẽjyshi. Kyrã Jesús heirã he’isema opaite ho’uavare kyambava. 20Hãrã heijy: Kuaretare pyaivi õhẽva rãnga, myngya. 21Shara kuareta pyaivi õhẽ porãmba pya mbijetava, omendava ynga mãĩ’ijyhea, omendambape jyrekova, purukava, 22manarõ, mbai pota raiviva, poshyrei’iva, japuva, ñynotimbaa, kateỹva, juruvaiva, jyroja ijeheva, opaisharei’iva, 23opaite kova mbai porãmba õhẽ typyaivi, hãrã pyrỹmyngya.

Taupe haimba Judiova jyrojahe Jesús

24Haivi Jesús oho Tiro hareka Sidon kyty; haipe iche pente oope potambatẽ mbava kuaava, katũã ñemĩ; 25pente taupe memby kuña mbaiposhy ĩmerea, hendu Jesús he’iahevarã, ou ĩñesu hỹnonde. 26Kova t aupe hai Griega, tenta Sirofeniciaivi ouva. Haipe jurure’asyshu Jesús, mohẽshi verã mbaiposhy memby ĩmerea. 27Tẽvã Jesús heishu: Ma’ẽihe tykarurãni tayre hyvãtapeve, shara porãã jahekyshi tayre houva ñameẽshu verã ñaũmbare. 28Hãrã taupe hei: Ãñete rãnga, Sheja! Tẽvã ñaũmba mesa ipe’iare, hykuaĩ houjy tayre houva ku’ikue mesaivi oava. 29Jesús heishu: Ãñete rãnga rereva, kapyry ekuajy nyrẽtape, mbaiposhy õhẽmashi nymemby. 30Taupe vãhẽjy oho hentaperã, hesha memby ñeno’ẽ hupape. Shara õhẽmashi mbaiposhy.

Jesús mynguera pente japysamba hareka ña’ẽnguva

31Jesús õhẽ Tiroivirã hasa oho Sidonpi, hareka vãhẽ oho yyvasu Galileape, yvy Decapolis he’iashuape. 32Haipe veruhashu pente kuimbai japysamba hareka ña’ẽnguva. Hãma jurureshu reta ñono ĩãrẽ verã ipo. 33Hãma Jesús hã’ẽĩ yngaity rahashi kuaretare, haipe japysa põĩpyrã, myndyvy iporerã pokohe ĩku; 34haivi Jesús vate maĩrã putuẽ mondorã hei: “Efata!” (he’iseva: “Jype’a!”) 35Haiperaveĩ jypeajyshu japysa, ĩku jera, hãrã ijeta kavijy. 36Hãma Jesús heishu reta avy mbavape mbeu verãre, tẽvã kyrãte he’iashuva ñymyrõĩteve opa mbeushu kuaretare, 37shara hãĩrãite hesha retarã hei: “Japo kavi rãnga Jesús, shara japysambavare myhendukajy, hareka ña’ẽnguvare mbijetakajy”.