Mar 8 | TpjSC | STEP | Pente arape hykuãĩ heta jatyjy kuaretare, tẽvã mba’ety hou verãre. Hãrã Jesús hẽno mboirea retarã heishu:

Mark 8

Jesús myngaru 4.000 kuaretare

1 Pente arape hykuãĩ heta jatyjy kuaretare, tẽvã mba’ety hou verãre. Hãrã Jesús hẽno mboirea retarã heishu: 2 Aparekonytẽ ko kuaretare, mbahapy arama’ẽ shendie, hareka mba’etyre reta hou verãre. 3 Ñymbahy ryheve ãmondojy hentaperã, ĩmepo’ẽkui pya mamano’ia pehupi; shara ĩme’ẽ mbyryivi ouvare. 4 Mboireare heishu: Maĩvirapo ñavãhẽshu ñamyngarupy verãre, mba’ety koipi ikova? 5 Jesús pyrãndushu reta: Mbovy pãhãra ĩmepyre? Haire hei: 7. 6 Hãma mbyvapyka kuaretare; haivi heky 7 ia pãhã, ohovasarã, pyseã hareka meẽshu mboireare, haivi memeẽshu verã opaite kuaretare. 7 Ĩmerejy reta mbovy pira mishishĩvã, ohovasarã memeẽjyshu reta. 8 Opaiteva karu hareka hỹvãta reta, haivi pysẽvẽ hemby vekua mynõjy retarã, 7 kanata mynyhẽjy reta. 9 Haipe karu vekuare 4.000 kuareta rupi’ẽ, haivi Jesús opa mondojy. 10 Jesús jupijy kanoape mboireare hãndirã, oho Dalmanuta kyty.

Fariseore jurure mbai heshaha verã

11 Haipe vãhẽ jyveru fariseore hareka õñepyrõ hehei ñynoĩ ijupe hãndi reta hãrã pyahããshu verãre Jesús, haire jurureshu mbai heshaha verã vate araivi ouva. 12 Jesús putuhẽ mondorã hei: Marã’ĩrãra kova kuaretare jurure mbai heshaha verã? Añeteĩteva hai, me’ẽhãpope pota pyheshava. 13 Hãrã hejashu reta, hãrã Jesús jupi kanoaperã ohojy yy hyvaisho kyty.

Fariseore jylevadura

14 Haipe mboireare sarembahe reta hou verãre, koñeĩ pente pãhãimba ĩmere reta kanoape. 15 Jesús heikavishu reta: Pymãĩ kavi, pingareko pindijeheshi fariseo hareka Herode ryhevare jylevadura. 16 Jesús mboireare ijeta ijupi retarã hei: Pãhã jaruãjerã’ãmo kyrã hei’i. 17 Jesús kuaaravĩĩ marãra ijeta ñynoĩrã heishu reta: Marã’ĩrãra pere pãhã mba’ety pyreva? Pikuaa’ãĩteirateri? Pyndypya tãtãiteirateri? 18 Pyndyresa rãngapi, pyheshããra’e? Papysa rãngapi, pyhenduãra? Pymandu’ãrahe 19 ãmbijaorã vẽkua 5 pãhã 5.000 kuimbai ẽvã retape? Mbovy kanatara pymynyhẽjy hemby vekua? Haire hei: 12 kanata. 20 Hareka 7 pãhã 4.000 kuimbai pevarã ambijaorã, mbovy kanatara pymynyhẽjy hemby vekua? Haire hei: 7. 21 Jesús heishu reta: Pikuããrateri?

Jesús mynguera pente kuimbai heshamba kũvãĩpia Betsaidape

22 Jesús hareka mboireare vãhẽ jyraha Betsaidape, haipe veruashu pente kuimbai heshamba kũvãĩpia, jurure jyreshu Jesús pokohe verã. 23 Jesús pysyshu ipope heshamba kũvãĩpiarã nohẽ raha tentaivi, myndyvy hesarerã ipo ñono’ĩãrẽ; haipe pyrãndushu heshara maĩnunga. 24 Haipe heshamba kũvãĩpia hei: Ahesha kuaretare, tẽvã yvyra vata’iare rãĩmi ahesha. 25 Jesús hykuaĩ ñonojyshu ipo hesare ĩãrẽ, hãrã kuimbai kuera. Heshajy kũvãĩpi hareka mbyryivi opa mba’e hesha kavijy. 26 Haivi Jesús mondojy hentaperã heishu: Avy ekuajy tentape.

Pedro hei Jesús haiva Cristo

27 Jesús hareka mboireare oho tentamire’õipi Cesarea Filipope’õre. Pehupi Jesús pyrãndushu mboireare: Marãra hei shyrehe kuaretare? Mbavara she? 28 Haire heishu: Ĩme’ẽ hei ndyreheva Juan Bautista, ĩme’ẽjy heiva Elías, ĩrũre heijy ndyrehe nde haiva Tũpa ĩñee mbeu’ia ^{▼▼Tũpa ĩñee mbeu’ia Karai ĩñeepe: Profeta.} aryka’eiteva. 29 Jesús pyrãndushu mboireare: Pee jyveno, marãra pere jyve shyrehe, mbavara she? Pedro heishu: Nde hai Cristo. 30 Jesús hei jyvyĩshu mboireare, potamba kova mbai mbavape mbeu verãre.

Jesús mbeu mano verã

31 Jesús õñepyrõ mbeushu mboireare hai kuareta Tay hasa’asyñoĩ verã, heshatambaa verã Judio juhuvishare, pai ruvishare hareka Moisés mbypara vekua pyrỹmboi’iheare. Heijyshu reta hai jukaha verã, tẽvã kuerajypo mbahapy arape. 32 Jesús mbeu kavishu reta kova, hãrã Pedro raha yngaity hã’ẽĩrã, poshy ryheve heishu ỹtẽñoma kyrã ijeta verã. 33 Tẽvã Jesús jerepyrã, maĩ jykoty mboirea retarã poshy ryheve hei Pedrope: Syry shyhevi Satanás! Rikuãã nde Tũpa pya mbijetava rãĩmi, koñeĩ kuareta pya mbijetava rãĩmi. 34 Haipe Jesús hẽno mboireare hareka kuareta retarã hei: Ĩme’ẽ pota shaykue ouvarã, tiñymbysare ijuhuvi, tuhupi jukurusu, tou shaykue. 35 Shara hykove potaĩ mondojepe’ia, ha’eipo jyvarejyhekui. Tẽvã hykove meẽ shyreheva hareka Ñee kaviva rehe, ohojepepokui. 36 Mbaivara mbijehupo pente kuareta opaĩ ĩmere ko yvy‘ĩãrẽ’õvarã, manoshirã? 37 Mbaivara kuareta katu meẽhe hykove hekovia? 38 Ĩme’ẽ mbava shynotivarã hareka Shiñee notiva ko tykove ñarõva hareka mbai porãmba japo’ia hỹnonde, kuareta Tay notipo jyveshukui oujyma Tuu hĩmbipekue ryheverã hareka Tũpa jokueva heko kyambare hãndi.