Mar 9 | TpjSC | STEP | Jesús heijyshu reta: Añeteĩteva hai pee, ĩme’ẽ kopepẽivã manomba verãre, ndeiteri hesha Tũpa ẽvãpe’õ ryheva ou ñymbaikatukue ryheverã.

Mark 9

1 Jesús heijyshu reta: Añeteĩteva hai pee, ĩme’ẽ kopepẽivã manomba verãre, ndeiteri hesha Tũpa ẽvãpe’õ ryheva ou ñymbaikatukue ryheverã.

Jesús opa hĩmbiperã vẽkua

2 Haivi 6 arama hasajyrã, Jesús koñeĩ raha Pedro, Santiago, hareka Juan, oho hãndi reta yvyturusu vate’õpe; hesapẽĩ Jesús hete opa yngai’ẽ. 3 Mondeva hĩmbiperã tĩĩrai, mba’ety mondeava johe’ia yvy‘ĩãrẽ’õ kyrãite mitĩĩjy verã. 4 Haipe ijeshakashu reta Elías hareka Moisés, ijeta ñynoĩ hãndi Jesús. 5 Haipe Pedro heishu Jesús: Pyrỹmboi’ia. Haikavimbaje kope ĩmehã’ẽrã! Tijapoha mbahapy oo rãĩmi, pente na’ãporã, ĩrũ Moisés ña’ãporã hareka Elías pevarã jyve. 6 Shara Jesús mboireare kyjekue japyraha retarã, Pedro kuããmba marãra hei’i. 7 Haipe sapy’ãĩ vejy ĩãrẽ ãvãpỹntu, opa jasoi reta. Hãrã ãvãpyntuivi ñyhendu ñee heiva: Kova hai Shyray ahaihuva, pijaposhu heiva. 8 Haivi sapy’ãi mãĩjy juriretarã, mba’etyjy hesha’ẽ hãndiare, koñeĩ Jesús hã’ẽĩ i. 9 Vejyjyma jyveru yvyturusuivirã, Jesús heishu reta avy mbavape mbeu verãre ko heshava, kuareta Tay kuerajypeve manovare mbyteivi. 10 Hãrã nãtu reta hokava ñee, tẽvã pyrãndujyre ijupe mbaivara he’ise pũãjyva manovare mbyteivi. 11 Pyrãndushu reta Jesús: Marãjyrãra Moisés mbypara vekua pyrỹmboi’iheare heijyre Elías rãni ou verã? 12 Jesús heishu reta: Ãñete rãnga, Elías rãnipo ou opa mbai ñono kavi verã. Hãmera marã’ĩrã kyrã heijy Tũpa ĩñee, kuareta Tay hasa’asy verã hareka mymorãhamba verã? 13 Tẽvã she hai pee Elías ouma rãnga, pota japohevãĩ japohe reta; Tũpa ĩñee heiheva rãĩmi katĩ iko.

Jesús mynguera pente kunumi Ãña ichepya

14 Haivi oujy reta mboireare’õperã hesha kuareta hetava jere vasĩhe, hareka Moisés mbypara vekua pyrỹmboi’iheare, ijao ñynoĩ hãndi reta. 15 Kuaretare Jesús heshamarã, mbyrymaĩhe reta, hãrã opa ñani jyraha marãndushu. 16 Jesús pyrãndushu reta: Mbaiva rehera pijaopẽĩ hãndi reta? 17 Haipe pente kuimbai hetava mbyteivi heishu: Pyrỹmboi’ia! Kope aru nde shyray, Ãña ichepyrã ma’engureva, 18 mãĩpi ĩme’õĩpi mbaiposhy ityshu yvyperã juru mbytyryju, hãĩre opa rorokua ijehe hareka opa myvỹrãkuaseve. Hãma rymboiryreare airurematẽshuje mohẽshi verã, tẽvã haire katuã mohẽ. 19 Jesús heishu reta: Ko kuareta jyrojambaare! Mbaipeverapo’ãi penendie? Mbaipeverapo aiko pyndyrehe? Perushe kope kunumi ray! 20 Hãrã verushu reta kunumi ray; tẽvã mbaiposhy Jesús heshamarã, hỹnatu opa mbyryry kunumi ray, ity yvyperã japajere’i hareka juru opa mbytyryju. 21 Jesús pyrãndushu kunumi ray tuu: Mbaipevãĩra kova jehushu? Tuu hei: Ndei ryhevevãi rãnga kyrã’i. 22 Hetajy rãnga ityshu tatape hareka yype potaite jukarã; ĩme’ẽ katu rijapohevarã, yrypareko hareka ỹrỹmborymitẽ. 23 Jesús heishu: Marã’ĩrãra rere “ĩme’ẽ katu rijapohevarã”? Opa mba’e rãnga katu, jyrojava pevarã! 24 Haipe kunumi ray tuu sapukerã hei: Airoja rãnga, shymbory tairoja katu! 25 Jesús heshama heta kuaretare jatyherã, poshy ryheve heishu mbaiposhy: Nde, mbaiposhy ña’ẽnguva hareka japysamba, she hai nde ẽhẽshi kova kunumi ray, hareka ỹtẽñoma ichepykui! 26 Haipe mbaiposhy sapuke, hỹnatu opa mbyryry kunumirã õhẽshi; juka ñonorã manova rãĩmi’ẽ, hãrã heta’ẽ heiva manomava. 27 Tẽvã Jesús pysyshu ipoperã mupuãjy, hãrã kunumi ray ñymbou. 28 Haivi Jesús iche o’ipe, hã’ẽĩ õpe mboireare pyrãndushu: Marã’ĩrãra mbaiposhy katuã mohẽãshi’ore? 29 Jesús heishu reta: Kyrãvã mbaiposhy, koñeĩ mbaimba ho’uavape hareka ñymboi katu mohẽhã.

Jesús mokueheape mbeu mano verã

30 Õhẽjy reta haivirã hasa jyraha Galileaipi, tẽvã Jesús potãã mbava kuaa, 31 shara mboi’ẽ mboireare. Heishu reta: Ko kuareta Tay ñonoãpokui kuaretare ipope, haire jukapokui, tẽvã mbahapy arapepo kuerajykui. 32 Tẽvã haire kuãã mbaivara he’ise hokava hai heiva, hareka kyje pyrãndushu reta.

Mbavara hai vateve’õ

33 Vãhẽ jyraha Capernaumpe, o’ipema ñynoĩrã Jesús pyrãndushu reta: Mbaivarera pijetapeije pehupi? 34 Tẽvã haire jasasakãi jyre, shara pehupi ijetamba jyveruhe, mbavara haire mbytepe vateve’ẽ. 35 Hãma Jesús vapyrã hẽno 12 iare, haipe heishu reta: Ĩme’ẽ pota vateve’iarã, ikopo taykue’õ rãĩmi, hareka opava retapepo mbory. 36 Haivi ñono haire mbytepe pente sanjay, hupirã heishu reta: 37 Ĩme’ẽ myvãhẽva shyreepe kova sanjay rãĩmivarã, she shymyvãhẽ. Shymyvãhẽva ha’ẽã shẽĩ shymyvãhẽva, shymbouvape rãnga myvãhẽ jyve.

Ñymbyvaishomba ñandyreheva ẽẽ ñanendie

38 Juan heishu: Pyrỹmboi’ia, hesha rãngaje pente kuimbai mohẽva mbaiposhy ndyreepe, tẽvã jochahashije, shara ha’ẽã jaiko jai hãndiarã. 39 Tẽvã Jesús hei: Avy pijocha, mba’ety mbaikavi heshaha verã vateivi ouva japova shyreepe, ijeta porãmba’ijy shyrehe verã. 40 Shara ñymbyvaishomba ñandyreheva ẽẽ ñanendie. 41 Ĩme’ẽ yyintẽ meẽpeva Cristo ryhevaperã, ãñete hai pee Tũpa meẽñõĩposhukui hekovia.

Mbai porãmba rijaporã

42 Ĩme’ẽ ityva mbai porãmbape pente jyroja shyreheva sanjay rãĩmiterivarã, haikavivepo momboha yyvasupe jajure jokuahashu ita marẽyvarã. 43 Ndepo ndirity mbai porãmbaperã, jasyja; haikavivepo ndepo hyvaishoĩ riche Tũpa ẽvãpe, mahẽ ndepo mokue ryheve rehokui tata vasupe, tata katumba oveape, 44 haipe tasore manoã hareka tata ove’ãĩtei. 45 Ndepy ndirity mbai porãmbaperã, jasyja; haikavivepo ndepy hyvaishoĩ riche Tũpa ẽvãpe, mahẽ ndepy mokue ryheve nymombohakui tata vasupe, tata katumba mboveavape; 46 haipe tasore manoã hareka tata ove’ãĩtei. 47 Ndyresa ndirity mbai porãmbaperã, nohẽ ndijuhuvi; haikavivepo ndyresa hyvaishõi riche Tũpa ẽvãpe, mahẽ ndyresa mokue ryheve nymombohakui tata vasupe, 48 haipe tasore manoã hareka tata ove’ãĩtei. 49 Shara opava reta joheapo tatape. 50 Haikavi rãnga juky; tẽvã hymboshyveãmarã, mbaivaperapo pyporyjykui? Pyreko juky pyndypyape, hareka opavare piko kavi hãndi.