Mat 13 | TpjSC | STEP | Hoka arape, Jesús õhẽ oovirã oho vapy yyvasu hỹmbeype.

Matthew 13

Ñee nymyhã’ãnga ñimity’ia ryheva

1 Hoka arape, Jesús õhẽ oovirã oho vapy yyvasu hỹmbeype. 2 Hetaite kuaretare Jesús ẽẽ jurirã, jupi vapy varkope tẽvã kuaretare yy hỹmbeypi pyta. 3 Haivĩ Jesús mboishu reta heta mbai, pory ñee ñymyhã’ãnga rupii, heishu reta: Pente mã‘ẽtỹ’ia õhẽ ñimĩty. 4 Ma’ẽtyma ohorã, ĩme’ẽ timity oava pehupi, hãrã vyrare vãhẽ ou reta hareka opa hou. 5 Ĩme’ẽjy timity oava ita paũpe, yvy ku’i mba’etyape; hokava areã hẽño, shara yvy pyrẽrĩshu. 6 Kuarasy õhẽma ourã opa hapy hareka opa jipi, shara hapo kypẽã oho. 7 Ĩme’ẽjy timity oava kapiãti paũpe, hãrã hẽñorã ñana vekua opa japyraha. 8 Tẽvã ĩme’ẽjy timity oava yvy kaviape hãrã ia kavi, ĩme’ẽ iava pente hãỹvi 100, ĩrũ jypyre 60, yngava jypyre 30. 9 Opaite japysa’iare, tyhendu kavi.

Jesús mãrã’ĩrãra mbeu ñee ñymyhã’ãnga

10 Haivi, Jesús mboireare ñymbojaherã pyrãndushu: Marã’ĩrãra ko kuaretare rijetashu, ñee ñymyhã’ãnga rupii? 11 Jesús heishu reta: Tũpa rãnga kuaaka pee, mbai ñemĩape’õ huvisha vasu vate arapy’õ ryheva, tẽvã haire mba’ety. 12 Hãrã mbai ĩmereva, me’ẽãveposhu hareka hembyposhu; tẽvã mbai mba’etyreva, hekyaveposhi, mĩshĩĩ ĩmerevaivi. 13 Hãme rãnga aijetashu reta ñee ñymyhã’ãnga rupii; shara haire mãĩte’õre heshãã reta, hãrã hẽndutẽ’õre kuãã reta. 14 Kyrã ikohe reta Tũpa ĩñee mbeu’ia Isaia heiva rãĩmi: Pee pyhendupo tẽvã pikuããpo, pymãĩpo tẽvã pyheshããpo. 15 Ko kuaretare pya tanta retarã, haire hesa opa ñymboty potã hesharã. Haire japysa opa ñymbotyshi potã hendu hareka pyape kuaa retarã, hãndi ou she ãĩvape amynguerashu verãre. 16 Pyvy’apo pee, shara pyhesha pyndyresa rupii, hareka pyhendu papysa rupii. 17 Ãñete hai pee, heta Tũpa ĩñee mbeu’iare hareka kuareta pya kaviva potatẽ hesha ko pyheshava, tẽvã heshã reta; haire kyrẽỹte hendu ko pyhenduva tẽvã henduã reta.

Jesús mbeu kavi ñymyhã’ãnga ñimĩty’ia ryheva

18 Ã’ẽ pyhendupo, mbaivara he’ise ko ñee ñymyhã’ãnga ñimĩty’ia ryheva. 19 Ĩme’ẽ henduva Mburuvisha vasurã vate araivi ouva ryheva kuãã mbaivara he’ise, ova timity oa vekua pehupi; haivi ou Aña, hekyshi timity pyape õre. 20 Ko timity oa vekua ita pãũpe, hokava hai Tũpa ĩñee henduva vy’ape rojava, 21 tẽvã hapo koĩpĩĩrã, kyããpo’ẽ. Iko‘asyma’ẽrã hareka ijeta porããhe reta jyrojakue reherã, areã sarejyhe Tũpa ĩñee. 22 Mbairãỹ oa vekua kapiãti pãũpe, hokava hai henduvare Ñee, tẽvã ojepy’apy mbai yvy‘ĩãrẽ’õvãi mbai potakue mbytavyshu. Kova mbai opa japyraha shara potã ñee ia kavi pya retaperã. 23 Tẽvã ĩme’ẽ timity oava yvy kaviape, hokava hai henduva Tũpa ĩñee, hareka kuaa kaviva mbaivara he’ise. Hokava ia kavi. Pente hãỹvi 100, yngava 60 hareka ĩrũ jya 30.

Ñanava trigo mbytepe

24 Jesús mbeujyshu reta yngaa ñee ñymyhã’ãnga ryheva: Huvisha vasu vate arapy’õ rãnga ova kuimbai timity haikaviva ñotyva jy’yvype. 25 Hãrã pỹnturã iche heshatambarea, haivi timity porãmbava ñoty trigo mbytepe hãrã oho. 26 Hãrã trigo õñepỹrõ hẽño, haivi iamarã mbytepe hẽño jyve ñana porãmba vekua. 27 Haipe jokuehareireare jyraha mbeushu koo ija: Karai, timity kavi ndekope rĩñoty vekua rãnga haikavi, mãĩvira õhẽ kapi’ati, trigo pãũpe? 28 Koo ija heishu reta: “Ĩme ãmo shyreshatamba’ia hokava japo”. Haipe jokuehareirea pyrãndushu: Ohoarapo po’oashi ñanava. 29 Hai heishu reta: “Mba’ety, mãhe ñanava pypoo sevekui trigo”. 30 Haikavivepo pyma’ẽĩ pũã hãndi mỹno’õapeve, haipokui mba’apo ia retape tynonde poo verã ñanava hareka mambaty verãre hapyha verã, haivipo mbatyhakui trigo natũã verã.

Jesús ijetahe mostaza hãỹ

31 Jesús mbeujyshu ko ñee ñymyhã’ãnga ryheva: Huvisha vasu vate arapy’õ rãnga ova mostaza hãỹ kuimbai raha ñotỹva kookuepe. 32 Mostaza hãyvi mishĩĩva rãnga mba’ety, tẽvã hẽñomãrã vateve ohoshi opaite ñotỹavare koope, yvyra vasu rãĩmi vate oho hãrã vyrare ñymby haity hãkãre.

Jesús ijetahe pãhã mby’ouhapya ryheva

33 Jesús mbeuve jyshu reta yngaa ñee ñymyhã’ãngarã hei: “Huvisha vasu vate arapy’õ rãnga ova kova pãhã mby’ouapya taupe mbihiava 21 kilo harina opa mby’oupeve”.

Mãrã’irãra Jesús pory ñee ñymỹhã’ãnga

34 Opaite kova Jesús mbeu ñee ñymyhã’ãnga rupii opava retape. Hai mba’ẽã heishu reta poryãã ñee mỹhã’anga ryhevarã. 35 Kyrã hekope kavi iko verã Tũpa ĩñee mbeu’ia mbeu vekua: Aijetaposhu kuaretare ñee ñymyhã’ãnga rupii; ambeuposhu mbai ñemiãpe’õ Tũpa japorãvãi ko yvy‘ĩãrẽ’õre.

Jesús mbeu kavivejy kapi’ati trigo pãũpe hẽño vekua

36 Jesús opa mondojy kuareta retarã iche o’ipe, hãrã mboireare ñymboja ẽvaperã heishu reta: “Mbeuvejy ore mbaivara he’ise ñee ñymyhã’ãnga ñana porãmba vekua hẽñova trigo pãũpe”. 37 Haipe Jesús heishu: Mbairãỹ kavi ñoty’ia rãnga hai, kuareta Tay. 38 Hãrã kookue hai opaite ko yvy’ĩãrẽ õ pyare. Mbai rãỹ kavi hai Mburuvisha vasurã vate araivi ouva ryhevare rãĩmiva, ñana porãmbava hai Ãña ryhevare rãĩmiva. 39 Ñana porãmbava ñotỹ’ia rãnga hai Aña. Ara mỹno’õha verãpe hai, ko yvy opa verã, mỹnoo’ia reta hai Tũpa jokuevare. 40 Ñanava mbatyha hareka hapyava rãĩmi rãngapo, ko yvy opa verã jy’arape. 41 Ko kuareta Tay, mondopokui jokuevare. Haire mbatypo hareka hekyposhi opaite tentavasu ryhevare, mbai porãmba japoka’iare hareka hapisha ity’iare porãmbape. 42 Ajokuevare ityposhu retakui tatape, haipepo jaheorã hãi opa mbupururukui. 43 Hoka arape heko kavivare himbipepo kuarasy sapeva rãĩmi Sheru Mburuvisha vasurã vate araivi ouva. Opaite japysa’iare, tyhendukavi.

Ñee ñymyhã’ãnga ita vera ijuva ñomiãva ryheva

44 Huvisha vasu vate arapy’õ ova kyrypoti yvypy ñotyãva. Ou pente vãhẽshu kyrypoti yvypy’õ hareka haipẽĩ ñomijy. Hãma vy’ape oho opa meẽ imerea kyrypotirerã ou ova ko yvy.

Ita mashyãva ryheva

45 Huvisha vasu vate arapy’õ, ova jyve japova rãĩmi pente mavende’ia heka ita mashyãvã. 46 Vãhẽshu pente mashyãvevarã oho opa meẽ ĩmerearã, hãrã ou ova ko ita mashỹãva.

Ñee ñymyhã’ãnga pysa ryheva

47 Huvisha vasu vate arapy’õ ova pente pysa yypy ityava, heta pira nohẽva. 48 Tynyhẽmarã, pira nohẽ’iare raha yy hỹmbeype, haipe vapy heka’ẽpy pirare; haikakavivare ñono kanãtape hãma poporãmba vekuare momboshi. 49 Kyrãpo jehukui ko yvy opa verã arape; Tũpa jokueva õhẽpo heky verã heko porãmba heko kavivare mbyteivi, 50 hareka porãmba vekua itypo tatape. Haipe jaheorã hareka hãĩ mbupupurupo.

Jesús ijeta mbai py’ahuva hareka tujavare

51 Haipe Jesús pyrãndushu reta: Pikuaara mbaivara he’ise kova. Haire heishu: Kuaaha rãnga. 52 Haivi Jesús heishu reta: Hãmeara, opaite Moisés mbypara vekua pyrỹmboi’ihea mbeu, huvisha vasu vate arapy’õ, ova oo ija nohẽva mbai hyruivi py’ahuvare tuja vekuaivi. 53 Jesús opa mbeu kova ñee ñymyhã’ãngarã, õhe oho haivi, 54 hãrã vãhẽ oho jypyiterã iko’i vekuaipi. Haipe õñepyrõ pyrỹmboi Judiore ñymbatyseape hendu verã Tũpa ĩñee. Opava mbyrymaĩ retarã hei: Mãĩvira nohẽ kova mbai kuava? Mbaiva rupiira japo mbaikavi heshaha verã? 55 Kova rãnga hai yvyrare mba‘apo’ia tay, hareka ishy hai Maria. Tyvyre Jakobo, José, Simón hareka Judas, 56 hiindy reta rãnga iko jyre jyve ñanymbytepe. Mãĩvira ko kuimbai nohẽ kova mbaire? 57 Hãma rojãã reta. Tẽvã Jesús heishu reta: Oparupi rãnga Tũpa ĩñee mbeu’iare ijetaha kavihe, tẽvã hentape hareka iko’iaipi mba’ety ijeta kaviheva. 58 Hãrã Jesús heta japo haipe mbaikavi heshaha verã, haire jyrojããherã.